Jesus nalhikiten bukanaku elobay yata Emitay di hurimbiliŋahu
5
Na Jesus ajuum buyooŋabu bata êsukay, ña naŋool di hurimbiliŋahu âriiŋ naleeho dô; ña kurebooraaku katawool di kukay ki kutookoo'to. 2 Ña nalhikiteniil elobay yata Emitay ma aaniil:3 “Bukanaku karembeeloorom kayooŋ di Emitay, kubaje hûpiira, mata mbi kêemi di kâyyaku kata hatiya di emitay.
4 “Bukanaku kakaawem, kubaje hûpiira, mata Emitay mbi ebeesiil mukulamu.
5 “Bukanaku kahepum bukan, kubaje hûpiira, mata buko mbi kuŋar etaamay.
6 “Bukanaku kahakenem ma kuga wahaw wa Emitay êkimmi, kubaje hûpiira mata mbi egawiil kûririgen.
7 “Bukanaku kañankiitem bukan, kubaje hûpiira mata Emitay poop mbi eñankiitiil.
8 “Bukanaku ka ûyegetaw watayiil usetum, kubaje hûpiira mata mbi kujuk Emitay.
9 “Bukanaku kagawem bukanaku kubaj kâsuumaayaku, kubaje hûpiira mata mbi keeni kuñool Emitay.
10 “Bukanaku ka bukanaku kûlaamenem di buko mata ma kûkimmi kuga non ma Emitay êkimmi, kubaje hûpiira mata mbi kêemi di kâyyaku kata hatiya di emitay.
11 “Miwuul jibaje hûpiira na mbi bukanaku kûgelikooruul, di kûlaamenuul, di kusoosenuul mata înje. 12 Jîsuumaay ma jimaayoor, mata wahaw wâamak wowu to ban hatiya di emitay be batawuul; mata moomu poop kaŋ ma kûlaamemmi buñaaŋenaabu bata kûboñaku kata Emitay bala miwuul.”
Miwuul musisamu, di poop ehikitenumay yata etaamay
13 “Miwuul musisamu mata etaamay; kama musisamu muga jaa balalal, wa mbi uga mo joon ma mulaañ muhir? Mujakut ban kâgawum makeel, be keb ma mubeti ma muyokoseni.
14 “Miwuul ehikitenumay yata etaamay; mata êsukay yateepim di hurimbiliŋahu, mumulet bi êñooro. 15 Moomu poop kaŋ ma an âyabenoriitum ehikitenum, ban nabaahen yo di êkut, be mbi aga yo tiŋatu hatiya ta yeelim ehikiten ma jaaŋ, ma bukanaku peh kata di eluupay kujuk. 16 Moo, jiga ma majaaŋaamu matawuul muhikiten bukanaku ma mbi kujuk wahaw wajakaaw wa jigawem, ña di kusal Ampawuul ammi hatiya di emitay.
17 “Aatuba jinong kaan înje akaylom bi îbuy kûboñaku kata Emitay, di kata buñaaŋenaabu bata kûboñaku kata yo, be îkayil bi iga non ma kuloom. 18 Mata ma ilobuul malhegen eenuul: Hatiya di emitay, di poop etaamay mbi bûyo, be jileeter janor jahammi mâtiiti, be mante jitij jata eleeter jata di kûboñaku kata Emitay, jeetubi jîcaalheni dôo bagawuti non ma kuloom. 19 Momakiimom anaw a mbi ahuusul kûboñ kakeel kata Emitay kahammi mâtiiti, be mante nalhikiten bukanaku ma kuhuusuu'ko, anaw umu mbi aga anaw ahammi mâtiiti di kâyyaku kata hatiya di emitay; be anaw aga jaa non ma kuloom, ban nalhikiten poop bukanaku ma kuga non ma kuloom, anaw umu mbi aga anaw âamak di kâyyaku kata hatiya di emitay. 20 Moo, ma iñaaŋenuul eenuul, bagawerabu batawuul buhaŋut jaa majak bata phârisewwi, di bata bulhikitenaabu bata kûboñaku kata Emitay, mumulet bi jinebejurer di kâyyaku kata hatiya di emitay.
21 “Miwuul jijame wahaw walobim simpawuul sihaan kaan: ‘Aatuba ubuj an, mata anaw a mbi abuj anaw, mbi agawi batalenabu.’ 22 Be înje neenuul, anaw abirikum di apaalool bakooŋut, mbi agawi batalenabu; anaw poop agee'jaa atiyool, be mante naanool nânuutuwe, mbi agawi batalenabu di kâyyaku kata batalenabu; aahu ammi atiyool omu ma awuutom, mbi abeti di sambun sâbaworiit. 23 Moo, na mbi uŋar opherta yatayi be di Altar, uwollho jaa kaan anaw omu to a jibajoorum, 24 nuwalen para opherta uyu ñata di Altar, ma ukay ki jîlobul di anaw umu ma jiga kâsuumaay, ban nkit nukay ki uwul opherta uyu. 25 Anaw akeesuwi jaa, ma âanul aŋari be di kâyyaku kata batalenabu, jake ma jilob ma jiga kâsuumaayaku d'oo di buruŋabu, ma aatuba âriiŋ naŋari awul atalenaaw, atalenaaw poop naŋari awul âpoliisaw ma akullhi. 26 Malhegen ma iñaaŋeni eeni, mumulet bi ûcaalhul di ekullhay aw bancaamut ma ûriren non ma kulobim.
27 “Jijame poop wahaw walobim: ‘Aatuba ukay kâmoora.’ 28 Be înje neenuul: Anaw âjikerikoorum anñaakanaw ma anongoorool mata kâmooraaku, ña nâmooriye ban d'oo. 29 Momakiimom ga jaa non ñîkilañu ñatayi ñîrirañu mbi ñigawi ubaj kûbajumiñ, ña yeemom ûkooluu'ño ubet, mata haŋ majak ma uga ñîkil ñanor, di maama mbi aw poopii ubeti di sambun sâbaworiit. 30 Ga jaa poop non kaŋenaku katayi kûriraku, mbi kugawi ubaj kûbajumiñ, utii'ko ubet, mata haŋ majak ma uga kaŋen kanor, di maama mbi aw poopii ubeti di sambun sâbaworiit.”
Bûyababu bawaasoorum
31 “Di lobi poop kaan: ‘Anaw acahum di apañoorool, mbi aŋiicool kaytaku kata ma kuwaasoor.’ 32 Be înje ma iñaaŋenuul eenuul, anaw a mbi acah di apañoorool basohutool bata kâmoora, mbi aga anñaakanaw umu ma abaj kûbajumiñaku kata kâmooraaku. Be poop ânniinaaw a mbi ayabool, oo poop mbi abaj poop kûbajumiñaku kata kâmooraaku.
33 “Jijame poop wahaw walobim simpawolaal sihaan kaan: ‘Ootuba unuur ebeebel, be mbi uga non ma unuurum uya di Ata Emit.’ 34 Be înje neenuul, aatuba jinuur; aatuba jinuur palimo jiya hatiya di emitay, mata dôo di gam hulhikahu hata Emitay. 35 Aatuba jinuur poop jiya di etaamay, mata yoo kapenkaku da Emitay ejuumenem ûkandumaw wata yo. Aatuba jinuur poop jiya di Jerusaleŋ, mata yoo egam hankahu hata âyyaw âmakaaw. 36 Aatuba jinuur poop jiya di miwuul, mata jeeliit jiga kal kanor katawuul ma kuhinet, palimo poop ma kulaañ kulheen. 37 Moo, mbi ya jêenul aawo, na mbi ga wahaw wa mbi jêenul aawo; di jêenul poop see, na mbi ga wahaw wa mbi jêenul see; mata jilobut jaa ume, non wahaw wa mbi jilob wata Esatanaay.
38 “Jijame poop wahaw walobim kaan: ‘Ñîkil, di ñîkil, kâŋiiŋ poop, di kâŋiiŋ.’ 39 Be înje neenuul: Aatuba jigalen di bukanaku kagawuum kôji. Moo, anaw amabi jaa kamiñaku di karaabaku, nûtiiwool kareb kaaku ma amab poop kaaku. 40 Anaw akeesuwi jaa ma abot bûjupaabu batayi, nuwalhoo'bo poop ma aŋar humantaahu. 41 Anaw agawi jaa di sembe ma jirees ekilometer yanor, nuwalhoo'bo poop ma jirees sigaba. 42 Mbi ya uwul an peh alhawim wah; anaw aani jaa poop ucaasenool miñ, aatuba ulat.”
Jîkin bukanaku kâsuumutuum
43 “Jijame poop wahaw walobim: ‘Ûkin anaw âkinim, aatuba ûkin anaw âkintim.’ 44 Be înje neenuul: Jîkin bukanaku kâkintuum, di jilhaw poop Emitay be bata bukanaku kammi ma kûlaamenem di miwuul; 45 ma mbi jiga kuŋilaku kata Emitay yammi hatiya di emitay. Mata ya ega ma jaley âcaalhul ma ahikiten be bata bukanaku kata uynumaw wajakutaaw, di poop kata waawu wajakaaw, di êlubul be bata kata wajakutaaw, di poop kata waawu wajakaaw. 46 Mata jîkin jaa keb bukanaku kâkinuum, bugal bu mbi jiyab? Kama buyabaabu bata buyuupabu, kûgaworiit mo? 47 Kama jisaap jaa keb kutiyuul, wa jigawe joon wajakum? Kama ntuwa bukanaku kâmirutum Emitay kugawemom? 48 Moo, jake ma jiga bukanaku kanapum, non ma Ampawuul ammi hatiya di emitay, anapum.”