Jesus nalob mata bêetabu bata añakanaw di eluupay
19
Na Jesus aloom umu, ban nâcaalh di êsuka yata Gâlileeya, ma akay be di bantaabu bata Jûdeya bammi kareb kaaku kata kaalaku kata Jordoŋ. 2 Be buyooŋabu bata bukanaku di kusoolhenool, ña nabuunen bukanaku kâjuutum.3 Ña phârisewwi di kûkayil ki kutookoo'to ma kûhopool ma keenool: “Kama jake pîya ma ânniine aan apañoorool aat di eluupay, mata wah wakeel?” 4 Ña Jesus naaniil: “Kama jipisenut non ma Baŋiicerabu buloom kaan ‘Âwwenaaw bûtiyaar ânniinaaw koo di anñaakanaw nâwuwemmi?’ 5 Ban di yêenul: ‘Momakiimom ma ânniinaaw mbi âwalhum bo kubajawool ma kubomoor di apañoorool. Ña buko egabaay di kuga eniilay yanoray.’ 6 Ña kugawut ban siniilasu sigaba, ma kuga eniilay yanoray. Momakiimom bukanaku ka Emitay ebomum, ajamaat mumulet bi awaasiil.” 7 Ña phârisewwi di keenool: “Kama mata wa ma Moyses âanumolim nooliye uŋiic apañoori kaytaku kata bêetabu ban nugawool ma aat?” 8 Be Jesus naaniil: “Moyses agawuu'mo mata ma ûyegetaw watawuul wankum, momakiimom nawalhuu'bo ma ya jiwaasoor di kupañooruul. Be noo kâtiyaar, ntuwa mo magam. 9 Moo neenuul, anaw a mbi aan apañoorool aat, ban ntuwa mata kâmooraaku, ma âyabul anñaakan aahu, ânniinaaw umu nabaje kûbajumiñ. Anaw poop a mbi ayab anñaakanaw umu aatum, oo poop nabaje kûbajumiñ.”
10 Ña kurebooraaku katawool di kêenul: “Ga jaa non bûyababu mo ma bugam, ña kama yoo yeemom haŋ majak ma an atukayab.” 11 Be Jesus naaniil: “Wahaw uwu, ntuwa an peh aalim ayetoor di wo, be keb kaaku ka Emitay egamom. 12 Mata kaaku koku to kaaliitum kuyab, mata mo ma kûwum, kaaku bukanaku kugawiimom, bukaaku poop kuyabut, mata Kâyyaku kata hatiya di emitay. Moo anaw aalim aga mo, naga mo.”
Jesus nalob mata balaabu
13 Ban bukan kaaku di kûŋarul balaabu be baabu Jesus ma nki aga uŋenaw watawool di buko ma alhaw Emitay be batayiil. Be kurebooraaku katawool di kûlhusiil. 14 Be Jesus naaniil: “Jiwaa'bo balaabu ma bûkayil be baabu d'înje, aatuba jîlhusiil mata kâyyaku kata hatiya di emitay, kata bukanaku kagam non buko.” 15 Ban Jesus naga uŋenaw watawool di balaa'ubu, ban ña nakay.
Jesus nalob mata busaanumuwaabu
16 Ban âynaaw aahu nakay be baabu Jesus âriiŋ narinkool aanool: “Alhikitenaaw, wa pîya mbi iga wajakum ma eeli ibaj eroŋ yâbaworiit.” 17 Be Jesus naanool: “Mata wa ma urinkumem mata wahaw wajakum? Wah ulet wajake, wâbutim di uwe wanoraw. Moo, ûkin jaa ubaj eroŋay yâbaworiitaay, mbi ya uga non ma kûboñaku kata Emitay kuloom.” 18 Ña âynaaw umu narinkool aanool: “Kûboña'ukey?” Be Jesus naanool: “Aatuba ubuj an, aatuba ukay kâmoora, aatuba ûkuut, aatuba ucal; 19 mbi ya ujam di ampayi, koo di iñaayi, nûkin poop anaw a jîhugoorum non ma ûkinoorom.” 20 Ña âynaaw umu naanool: “Kûboña'uku kaŋ peh kata Emitay, koo nisoom kata kaŋ înje di aŋil be kaŋ jaat. Moo, waywoom waŋañunuwommi?” 21 Ña Jesus naanool: “Ûkin jaa ma mbi uga anaw alhegenumaayaw, ukay ki unoom wahaw watayi peh wa ubaam, ban nuŋar bancaama'ubu uwul kûsukateenaku; ña nubaj husaanumahu hatiya di emitay. Ban nûkayil ma usoolhellom.” 22 Ña na âynaaw umu ajammi ma Jesus aloboom umu, ña naga ñânkiiteni ma aat, mata ma asaanumom noon.
23 Ña Jesus naan kurebooraaku katawool: “Ma iñaaŋenuul malhegen eenuul, gîitiye ma an asaanumuwe anebej di kâyyaku kata hatiya di emitay. 24 Moo ma ilobuul eenuul, haŋ mâsuum ma kameelu enebej di esiih yata kasingiy di maama mbi an asaanumuwe anebej di kâyyaku kata Emitay.” 25 Na kurebooraaku katawool kujammi ma aloom umu, ña di kujaahali kaŋ noon, ban ya kêenul: “Ña ma aloom umu, ay mbi aali apak?” 26 Ña Jesus najikeriil, ban naaniil: “Non di ejamaatay, an aaliit aga mo; be, be bata Emitay, wah ulet wa yeeliitum ega.”
27 Ña Pedru naanool: “Jijaa, ûli nubetulo ban wahaw wâtooli peh ma usoolheni. Moo, wa mbi ûli ubaj?” 28 Ña Jesus naanool: “Ma ilobuul malhegen eenuul, na mbi Emitay ecookoorlanken wahaw peh, ma Añool Ajamaat aleeho di hulhikahu hata di kâyyaku hatiya di emitay, miwuul peh jasoolhenem d'înje, mbi jileeho poop di kulhikaku kunŋen di kugaba, ma jiga batalenabu sîbajoorumasu saamom kunŋenay di sigaba sata êsukay yata Israyel. 29 Ban poop anaw abetulom eluupay yatawool, be mante atiyool, be mante âliinool, be mante kubajawool, be mante kuñoolool, be mante ulhaakaw watawool mata înje, mbi ayab bugalabu bahammi uyaasaw êteemeer, ban mbi abaj eroŋ yâbaworiit. 30 Momakiimom bukan kameeŋe kûtiyaaraku, mbi kûyooli, ma bukaaku kameeŋe kâyoolim, mbi kuga kûtiyaaraku.”