Jesus nalob mata bûyababu
10
Ban Jesus nâcaa'to ma akay be kajim kaaku kata kaalaku kaaneyim Jordoŋ kammi di bantaabu bata Jûdeya. Buyooŋabu bata bukanaku di kukay joon ki bûmeboor ta ammi. Ña ya alhikiteniil non ma agawem. 2 Bukan kaaku kata di phârisewwi, di kukay ki kûhop Jesus ma keenool: “Kama jake pîya ma ânniinaaw aan apañoorool aat di eluupay?” 3 Be Jesus nalaañeniil aaniil: “Kama Moyses bu naanuum jiga?” 4 Di keenool: “Moyses naane, ânniinaaw mbi aŋiic kaytaku kata bûwaasoorabu awul apañoorool, ban naanool aat.”5 Be Jesus naaniil: “Wa ukiim Moyses naŋiicumuul kûboña'uku, hurim mata ma ûyegetaw watawuul wankum. 6 Mata di hûcukumahu na Emitay êwwemmi miñamu peh, êwuwewemmi ânniinaaw di anñaakanaw. 7 Momakiimom, ânniinaaw mbi âcaalh taatu kubajawool, ma akay ki kukin di apañoorool, 8 ma buko egabaay kulaañ kuga an anor. Ña ketubi kaga joon bukan egaba, be anaw anor silh. 9 Momakiimom, bukanaku Emitay egam ma kuyaboor, mumulet bi ajamaat awaasiil.”
10 Na kugam kûriiŋe di eluupay, kurebooraaku katawool di kurinkool joon mata eloba'uyu. 11 Be Jesus naaniil: “Ânniinaaw aan jaa apañoorool aat ma âyabul aahu, ânniinaaw umu nabaje hûbajumiñ di apañoorool âtiyaaraw. 12 Be nokoor jaa non anñaakanaw âcaam, ma nki asoño di ânniinaaw aahu, oo poop nabaje kûbajumiñ mata nakaye Kakumenaku.”
Jesus nalob mata balaabu
13 Ban bukan kaaku di kûkayetum balaabu ma nki Jesus alhaw kâsuumaayaku be batayiil, be kurebooraaku katawool di kûlhusiil. 14 Be na Jesus ajukiim, di mulaañool, ña naaniil: “Jîwaabo balaabu ma bûkayil be baabu d'înje, aatuba jeeniil see, mata bukanaku kagam non buko mbi kêemi di kâyyaku kata Emitay. 15 Malhegen ma ilobuul eenuul: An awalentum buynumabu batawool non aŋil, ma âynen Emitay, aatuba anebejurer di kâyyaku kata yo.”
16 Ban Jesus nalhom balaa'ubu ban nalaken uŋenaw watawool di buko ma alhaw kâsuumaayaku be batayiil.
Jesus nalob mata eroŋay yâbaworiitaay
17 Ban Jesus nâcaa'to, oo di buruŋabu ma akayem, âynaaw aahu nâteyil bi âtiigen di ûkandumaw watawool ma arinkool aanool: “Alhikitenaaw âsuumaaw, bu neelim iga ma ibaj eroŋ yâbaworiit?” 18 Be Jesus naanool: “Mata wa noonom înje anaw âsuumaaw? Bajut an âsuume, Emitay keb êsummi. 19 Kama ûmirut kûboñaku kata Emitay? Keene: ‘Aatuba ubuj an, aatuba ukay kâmoori, aatuba ûkuut, aatuba usoosen an, aatuba uhol an, ujam hurim ampayi di iñaayi.’ ”
20 Be âynaaw umu naanool: “Alhikitenaawe, no kaŋ no înje di aŋil, ihuusulut kûboña'uku.” 21 Be Jesus najiker âynaaw umu, nâkinool ña naanool: “Wah wanor keb uŋañunuwim. Ukay ki uŋar miñamu matayi peh unoom, ban nuŋar bancaama'ubu uwul kûsukateenaku. Uga mo jaa, mbi ubaj husaanumahu hatiya di emitay; ban nûkayil ma usoolhellom.” 22 Âynaaw umu, mata ma asaanumom, na jammi maama Jesus aloboom, ña di ketool kaŋ bononon.
23 Ña Jesus nâtiiwo ma ajiker kurebooraaku katawool poopiil ta kemmi ma kuŋoomenoom, ban naaniil: “Gîiti gîiti noon ma an asaanumuwe âkin ma Emitay egawool anebej di kâyyaku kata yo!” 24 Na kurebooraaku katawool kujammi ma aloom umu di kujaahali. Be Jesus nalaañ aaniil: “Kuñoolom, gîiti gîiti ma an asaanumuwe âkin ma Emitay egawool anebej di kâyyaku kata yo! 25 Non ma gîitim ma kameelu enebej di esiih yata kasingiy, moomu poop kaŋ ma gîitim ma an asaanumuwe âkin ma Emitay egawool anebej di kâyyaku kata yo.”
26 Na kurebooraaku katawool kujammi balobera'ubu, di kujaahali kaŋ noon ña ya kurinkoor kêenul: “Kama ña ay mbi aali apak?” 27 Jesus najikeriil kew, ban naaniil: “Malhegen ajamaat aaliit aga mo, be Emitay yeeliye. Mata bajut miñ ma Emitay yeeliitum ega.”
28 Ña Pedru naanool: “Ûli nubetulo ban wahaw wâtooli peh, ma usoolheni.” 29 Be Jesus nalaañenool aanool: “Ma ilobuul malhegen eenuul, bajut an a mbi âbetul eluupay yatawool, be mante kutiyool, be mante kûliinool, be mante iñaawool, be mante ampawool, be mante kuñoolool, be mante butondaabu batawool, hurim înje di poop mata elobay yâsuumaay yata Emitay, 30 aatubi ayaburer maame ute di etaamay siluupasu, di kutiyaayaku, di kûliinaayaku, di siñaawaayasu, di kuŋilaku, di utondaaw, ii be ñeemo êteemeer; di poop hûlaamahu, ban mbi baj eroŋ yâbaworiit. 31 Mata bukan kameeŋe kagam kûtiyaaraku, mbi kûyooli, kaaku kâyoolim di kulaañ kuga kûtiyaaraku.”
Jesus nalaañ alob joon mata eketay yatawool
32 Ña Jesus di kurebooraaku katawool di kuŋiten ma kukay be Jerusaleŋ. Koo ma kukayem, Jesus nayabiil kayooŋ. Ña kurebooraaku katawool di kujaahali, bukan kaaku poop ka ya kareboorum d'oo, di kûkoli. Be Jesus nalaañ âwool joon kurebooraaku katawool kunŋen di egabaay ma kukay kuwaynoro diyooniil, âriiŋ ya añaaŋeniil maama mbi kugawool ma aaniil: 33 “Jitallhen! Ulaal makayaalem be Jerusaleŋ ba mbi kusoh Añool Ajamaat, kuwul yahaanay yata bumaaŋenaabu bata Emitay, di poop yahaanay yata bulhikitenaabu bata kûboñaku kata Emitay. Buko mbi kêenul nabaje hûbajumiñ ha mbi âketum, ban mbi kuŋarool kuwul bukanaku kagawutum jûdewwi. 34 Be buko mbi kurinenool, di kucuhenool, di kûnagulool, ban di kubujool; be di hukahu hûhaajutahu mbi âlhaalowul di kuketaaku.”
Wahaw wa Joŋ koo di Tiyaagu kulhawum
35 Ban Tiyaagu koo di Joŋ, kaamom kuñool Jebedew, di kukay ki kutoo'to Jesus ma keenool: “Alhikitenaawe, ûli nûkine ma ulhawi ma ûgawoli wah wakeel.” 36 Naaniil: “Wa jîkimmi igawuul?” 37 Di keenool: “Ûli nûkine na mbi uleeho di kâyyaku katayi, nûgawoli aahu aleeho di kaŋeni kûrir, aahu di kaŋeni kumay.” 38 Jesus naaniil: “Miwuul jîmirut wahaw wa jilhawem di wo. Kama jeeliye jisiben jikoopaaju ja înje mbi isiben? Be mante jeeliye jiyab kâbatismaku ka înje mbi iyab?” 39 Di keenool: “Aa, nooliye.” Jesus naaniil: “Malhegen mbi jisiben di jikoopaaju ja înje mbi isiben, mbi jiyaa'poop kâbatismaku non ma înje mbi iyab. 40 Be jawulaju jata tiŋatu tata kaleehaaku kata di kaŋenom kûrir di kaŋenom kumay, ntuwa înje mbi iga mo. Be tiŋa'utu Emitay yoyu ma ebandortom ban be bata bukanaku ka êkimmi ewuu'to.”
41 Na kupaaliil kunŋenay kujammi ma Tiyaagu koo di Joŋ kuloom umu, ña di kubirik di buko. 42 Ña Jesus nâwoolul kurebooraaku katawool ma kûkayil be ta ammi ban naaniil: “Miwuul jîmire kaan bukanaku kagam yahaanay yata bukanaku kagawutum jûdewwi, kubaje sembe di êsukay, ban ya kugawiil non ma kûkimmi. 43 Be miwuul mumulet bi jiga umu, mata anaw âkimmi aga annahaanaw atawuul, oo mbi aga agorooraaw atawuul. 44 Anaw âkimmi aga anaw âtiyaaraw di miwuul, mbi aga amiikeelaw atawuul peh. 45 Mata Añool Ajamaat poop akayloot bi aga ejamaatay emiikeelay yatawool, be naga amiikeelaw ata êsukay, ban nawul eroŋay yatawool ma apaken bukan kameeŋe.”
Jesus nabuunen âpuumaaw aaneyim Bartimew
46 Ña Jesus di kurebooraaku katawool di kûriiŋ di êsukay yaaneyim Jeriko. Na agam ma âcaalhul dô di kurebooraaku katawool, di poop buyooŋabu bata bukanaku, di kutook âpuumaaw aaneyim Bartimew aamom añool Timew. Âpuumaaw umu oo ma aleehom di kakotenaaku kata buruŋabu ma ya alhaw esarahay. 47 Âpuumaaw umu na ajammi kaan Jesus ata Nasare ammi ma ahulhem, ña nâŋaaŋulo ma âanul: “Jesus, añool David, uñankiitom!” 48 Ña bukan kameeŋe ya kûlhusool, ma keenool apato. Be oo nahaŋ mâŋaaŋulo ma ya âanul: “Añool David, uñankiitom!” 49 Ña Jesus najuum, ban nâanul: “Jiŋallommool.” Di kûwollool ma keenool: “Sâkoli! Ulhaalo mata oo ma âwoolem d'aw.” 50 Ña Bartimew naraac humantaahu hatawool, ma alhaalo hâak, ban nakay be ta Jesus ammi. 51 Ña Jesus narinkool aanool: “Wa nûkimmi igawi?” Âpuumaaw umu naanool: “Alhikitenaawe, nîkine ilaañ ijuk!” 52 Ña Jesus naanool: “Ukay nûjuwe ban, mata ma ûynenommi.” Ña to kaŋ cab, Bartimew nalaañ ajuk. Ña nasoolhen Jesus.