Kaliikumaku kata âkutuwaataaw
18
Ban, Jesus nagawiil kaliikuma'uke ma âyisiil kaan mbi ya kuliyen kalhawaku ma aatuba kubeño. 2 Naaniil: “Di êsukay yaayu baje âynaaw agawem batalenabu âkoliitum Emitay, ban âjegoriit an. 3 Di êsuka'uyu añakanaw âkutom, ya akay hukoohuk baabu di âynaaw umu agawem batalenabu, ki ya aanool di kañakat: Ugawom batalenabu di âsuumutaaw ûmbaam. 4 Oo ya ajaŋen kaŋ ma ya alhawool kañakat, be âynaaw umu âjegoriitool. Âriiŋ poop haahu âynaaw umu nanongoor di bûyegetabu batawool, nâanul: Palimo jaa ma îkoliitum Emitay, laañoriitom poop kajeg an, 5 be añakanaw ume mbi igawool batalenabu ma aatinki âlaañul hukoohuk bi âlaamenom.”6 Jesus narinkiil: “Jijame ma âkojiinuwa'umu aloom? Palimo ma ajakutum, be naga batalenabu âkutuwaataaw umu. 7 Be inkiteemo Emitay! Kama yeetukaga batalenabu be bata bukanaku ka ejotum, kâwooleyom tutulay di busonna mata ma eñankiitim? 8 Neenuul: Mbi egawiil batalenabu cab. Be Añool Ajamaat na mbi âlaañul mbi ajuk pîya bukanaku koo ma kûynemmi Emitay?”
Kaliikumaku kata phârisew koo di ayabaaw ata buyuupabu
9 Jesus nalaañ joon aga kaliikumaku ma añaaŋen mata bukanaku kâynenooruwem, ban ya kunongoor di kaan kubajut kûbajumiñ, ban poop ya kurembeel bukan. 10 Ma aaniil: “Haahu kûynaaku egaba aahu phârisew, aahu ayabaaw ata buyuupabu. Di kukay be di eluupay yata Emitay ma nki kuga kalhawaku. 11 Phârisew najuum ma alhaw Emitay di êsigiray yatawool ma âanul: Emitaye, nisali noon mata eenowut non bukan kaaku kâkuutem, di kaaku kagugujoorem, îkayoriit poop kâmoori. Nisali poop, mata eenowut noon ayabaaw ume ata buyuupabu, 12 ban hîyaayoohiyaay, ya iga bawoorabu ñagaba, ban poop ya iñohi dîisimu.a
13 “Be âynaaw ata di buyabaabu bata buyuupabu oo to kaŋ ta ajummi râagi bâlharlowut, ma abaatulenooro, nalob ma ya âanul: ‘Emitaye, uñankiitom mata înje anaw abaam kûbajumiñ.’ ”
14 Ban Jesus naaniil: “Jitallhen ma ilobuul, ayabaaw ata buyuupabu naate kâsuumaay, kûbajumiñaku katawool kupasi ban. Mata anaw âyisem di kaan nahaŋe an poopool, mbi Emitay erembeelool. Be anaw arembeeloorom, Emitay mbi esookenool.”
A Parábola do Fariseu e do Cobrador de Impostos
Jesus nawul kâsuumaayaku balaabu
15 Ban, bukan kaaku di kuŋar balaabu be baabu di Jesus ma nki aga uŋenaw watawool di buko, be kurebooraaku katawool di kujukiil di kûlhusiil. 16 Ña Jesus nâwooliil, ban naaniil: “Jiwaa'bo balaabu ma bûkayil be baabu d'înje, aatuba jîlhusiil. Mata bukanaku kagam non buko, kugam kata di kâyyaku kata Emitay.” 17 Ban, naaniil joon: “Jijaa, ma ilobuul malhegen, anaw awalentum buynumabu batawool ma âynen Emitay non aŋil, aatuba anebejurer di kâyyaku kata yo.”
Âynaaw âkimmi eroŋay yâbaworiitaay
18 Annahaanaw aahu ata êsukay yata Israyel narink Jesus ma aanool: “Alhikitenaaw âsuumaaw, bu mbi iga ma ibaj eroŋ yâbaworiit?” 19 Jesus naanool: “Mata wa noonom înje anaw âsuumaaw? Bajut an âsuume, Emitay keb êsummi. 20 Nûmire kûboñaku kata Emitay, keene: Aatuba ukay Kakumenaku, aatuba ubuj an, aatuba ûkuut, aatuba usoosen an, uga buynumabu jak be bata ampayi di iñaayi.”
21 Âynaaw umu naanool: “Noo kaŋ no înje di aŋil, ihuusulut kûboña'uku kata Moyses.”
22 Na Jesus ajammi balobera'ubu, naanool: “Ŋañuwi wah wanor. Uŋar miñamu poomo ma ubaam unoom, ban nuŋar bancaama'ubu uñoh kûsukateenaku. Uga mo jaa, mbi ubaj husaanumahu hatiya di emitay. Ban nûkayil buga arebooraaw ûmbaam.” 23 Na ajammi umu, ña naga ñânkiiteni. Mata oo anaw asaanumom noon. 24 Jesus najuk ma agam ñânkiiteni, naanool: “Gîiti gîiti noon ma an asaanumuwe, âkin ma Emitay egawool anebej di kâyyaku kata yo. 25 Non ma gîitim ma kameelu enebej di esiih yata kasingiy, moomu poop kaŋ ma gîitim ma an asaanumuwe, âkin ma Emitay egawool anebej di kâyyaku kata yo.”
26 Bukanaku kajammi eloba'uyu, di keenool: “Ña ma uloom ume, ay mbi aali anebej di kâyyaku kata Emitay?” 27 Jesus naaniil: “Miñoomiñ ma ajamaat aaliitum aga, be Emitay yeeliye ega mo.”
28 Pedru naanool: “Jijaa, ulume ma uwalhulom miñamu mâtooli poomo, ma ureboor d'aw.” 29 Jesus naanool: “Ma ilobuul malhegen eenuul, bajut an a mbi awaa'bo eluupay yatawool, be mante apañoorool, be mante kutiyool, be mante simpawool, be mante kuñoolool, mata kâyyaku kata Emitay, 30 aatumbi ayaburer wah wameeŋe ute di etaamay, ban mbi abaj eroŋay yâbaworiitaay.”
Jesus nalob joon mata eketay yatawool
31 Jesus nâwool kumakaaku katawool kaamom kunŋen di egabaay buko keb, ban naaniil: “Jijaa, ma ukaayaal be Jerusaleŋ. Be miñamu poomo ma buñaaŋenaabu bata kûboñaku kata Emitay kuŋiicum mata Añool Ajamaat mbi muga. 32 Mbi kusohool kuñoh bukanaku kagawutum kata Israyel, buko mbi kurinenool, di kûgelikoorool, di kucuhenool, 33 na mbi kûnagulool ban di kubujool. Be di hukahu hûhaajutahu, mbi âlhaalowul di kuketaaku.”
34 Be kumakaaku katawool kunamulent kaŋ kuur. Kusohut miñamu ma âkimmi alobiil.
Jesus Prevê Sua Morte e Ressurreição
Âynaaw âpuumaaw ata Jeriko
35 Na Jesus agam ña nahuute hânkijahu hata Jeriko, di buruŋabu ba ayaam, âynaaw âpuumaaw oo to ma aleehom di kakotenaaku ma ya alhaw miñamu mata huriyahu. 36 Najam kayooŋaku kata bukanaku kareboorum di Jesus ma kuhulhem. Narink ma âanul: “Kama wa ubaje?” 37 Di keenool: “Jesus ata Nasare ahulhem.” 38 Ña nâŋaaŋulo lhînŋa ma ya âanul: “Jesus aŋilaw ata David, uñankiitom!”
39 Bukanaku kareboorum di Jesus, di kûlhusool ma keenool apato. Be oo nahaŋ mâŋaaŋulo ma ya âanul: “Aŋilaw ata David, uñankiitom!” 40 Jesus najuum, ban naaniil kuŋallool. Na ârillom, Jesus narinkool: 41 “Wa nûkimmi igawi?” Âynaaw âpuumaaw naanool: “Ata Emit, nîkine ilaañ ijuk.” 42 Jesus naanool: “Ña ujiker. Nûjuwe mata ma ûynenommi.”
43 Ña âynaaw umu, nalaañ ajuu'to kaŋ cab. Ña nasoolhen Jesus ma ya asal Emitay. Bukanaku poopiil kajukoom, di kusal Emitay.
A cura de Bartimeu