Kaliikumaku kata bugorooraabu
20
Ban Jesus naaniil joon: “Kâyyaku kata hatiya di emitay, koo kugam poop non anaw abaam etoolay yata ûuba. Ban nâcaalh bûjomaru bîb ma akay ki âpaamul bugorooraabu ka mbi kugoroor dô. 2 Be di kujamoor di buko ma mbi ancaamiil bugoroorabu bata hukahu hanor, anoowan empeesaay yanor yata praata; ña di kukay ki kugoroor. 3 Na ewooraay yagasom hutok di sibakiir yata bûjomaru êrimmi, nâcaalh joon be di êsukay, âriiŋ najuk bukan kaaku kaleem di kuga makeel. 4 Ña naaniil: ‘Miwuul poop jîkayil ma nki jigoroor di etoolay yûmbaam yata ûuba, ma mbi incaamuul non ma caameyim.’ Ña di kukay. 5 Na jaley agam najuumene, nâcaalh joon; be na ewooraay yagasom sîhaaji êrimmi yata baheperabu, najuk joon bukan kaaku, nalobiil non ma aloom bukaaku, ña di kukay. 6 Na ewooraay yagasom hutok êrimmi yata baheperabu, nâcaalh joon be di êsukay, âriiŋ najuk joon bukaaku, narinkiil aaniil: ‘Kama mata wa ma jemmi ute kata kaŋ bûjomaru bagawut makeel?’ 7 Di keenool: ‘An âboñutoli bugoroor.’ Ña naaniil: ‘Kama miwuul poop jikay ki jigoroor di etoolay yûmbaam yata ûuba.’8 “Be na tigam ma tijon, ata etoolay naan annahaanaw ata bugorooraabu: ‘Ûwoolul bugorooraabu ma uncaamiil, be mbi ûcukum kaaku kâyoolim, ma ûyooliwum kaaku kûtiyaaraku.’ 9 Ña buku kakaylom bugoroorabu di ewooraay yagasom hutok yata baheperabu na kûrillom, di kuyab anoowan empeesaay yanor yata praata. 10 Ña kaaku kûtiyaaraku na kûrillom, di gawiil non buko mbi kuyab bancaamabu bahammi, be nancaamiil poop anoowan empeesaay yanor yata praata. 11 Be na kugam kuyabe bancaamabu banorabu non buku, ña di kûŋuŋunoor mata wahaw wa ata etolaay agawiim, 12 ma ya kêenul: ‘Inja buke kâyooliilom, ewooraay yanor keb kugoroorum; moo, nuncaamiil kure d'ûli jâlaamum di bugoroorabu di hututulaayahu pooho di baleyabu?’ 13 Be ata etoolay naan aahu ata di buko: ‘Apaalom, înje ibajut batila di miwuul. Kama ntuwa empeesaay yanor nujamooraam ya mbi incaam anoowan? 14 Usoh bancaamabu batayi, ma ukay. Mata înje îkimmi iwul buke kâyooliilom bancaamabu non batayi. 15 Kama înje eeliit îgawum bancaamabu bûmbaam wahaw wa îkimmi? Be mante dôo sûumutiim mata ma igawiim jak?’
16 “Mata bukanaku kâyoolim, koo mbi kulaañ kuga kûtiyaaraku, kaaku kûtiyaaraku, di kûyooli.”
Jesus nalob joon mata eketay yatawool
17 Na Jesus agam omakayem be Jerusaleŋ, nâwool kurebooraaku katawool kaamom kunŋen di egabaay di buruŋabu buko diyooniil ma aaniil: 18 “Jijaa, ulaal mareesaalem be Jerusaleŋ, be na mbi ûriiŋaa'bo, Añool Ajamaat mbi aŋari ma awuli yahaanay yata bumaaŋenaabu bata Emitay, di poop buŋiicaabu bata kûboñaku kata Emitay. Be buko mbi kêenul najoone ma abuji, 19 ban mbi kuŋarool kuwul bukanaku kagawutum jûdewwi. Be buko mbi kurinenool, di kûnagulool, ban di kuriiŋool di êkrusay; be di hukahu hûhaajutahu, mbi âlhaalowul di kuketaaku.”
Iñaaw Tiyaagu koo di Joŋ, nalhaw be batayiil
20 Ña apañoor Jebedew nâkayil be to di kuñoolool âriiŋul nâtiigen ñata Jesus ma mbi alhawool wah wakeel. 21 Ña Jesus narinkool: “Kama wa nûkimmi?” Añakanaw umu naanool: “Nîkine ilhawi ma ulob, ma mbi uga kuñoolom buke egabaay ma kulheeho di Kâyyaku aahu di kaŋeni kûrir, aahu di kaŋeni kumay.” 22 Be Jesus naaniil: “Miwuul jîmirut wahaw wa mbi jilhaw. Kama jeeliye jisiben jikoopaajua ja înje mbi isiben?” Di keenool: “Aa, nooliye.” 23 Jesus naaniil: “Malhegen mbi jisiben jikoopaaju ja înje mbi isiben; be jaleehaaju jata kaŋenom kûrir, di kaŋenom kumay, ntuwa înje ikiim mata jo; mata Ampawom nañuure ban bukanaku ka mbi awuu'to.” 24 Ña na kurebooraaku katawool kunŋenay kujammi, di kubirik di batiyaaya'ubu egabaay. 25 Ña Jesus nâwooliil poopiil ma kûhugool, ban naaniil: “Miwuul jîmire kaan yahaanay yata sîsukasu kâynentum Emitay, ya kubaj sembe di êsukay, ban ya kugawiil maama kûkimmi. 26 Be di miwuul, ntuwa mo ma mbi ga. Mata anaw âkimmi aga an âamak di miwuul, oo mbi alaañ aga agorooraaw atawuul. 27 Anaw poop âkimmi aga anaw âtiyaaraw di miwuul, mbi alaañ aga amiikeelaw atawuul. 28 Mata palimo Añool Ajamaat, akayloot bi aga bukanaku ma kugoroorool, be nagoroor matayiil, ban nawul eroŋay yatawool êsukay ma apaken bukan kameeŋe.”
Jesus nabuunen bûpuumaabu egaba kata Jeriko
29 Na Jesus koo di kurebooraaku katawool kugam kôkacaalhem Jeriko, buyooŋabu bata bukanaku di kureboor d'oo. 30 Ña bûpuumaabu egaba kaleehom di kakotenaaku kata buruŋabu, di kujam kaan Jesus omahulhem. Ña di kûŋaaŋulo ma keenool: “Ata Emit, Añool David, uñankiitoli.” 31 Be buyooŋa'ubu bata bukanaku, di kûlhusiil ma keeniil kupato, be buko di kenken ma kuhaŋ mâŋaaŋulo ma ya kêenul: “Ata Emit, Añool David, uñankiitoli.” 32 Ña Jesus najuum, ban nâwolliil ma arinkiil aaniil: “Wa jîkimmi igawuul.” 33 Di keenool: “Ata Emit, nûkine ujuk.” 34 Ña Jesus nañankiit, ña nagor kûkilaku katayiil, ña to kaŋ cab, di kujuk. Ña di kusoolhenool.