Jesus nakay be Jerusaleŋ
21
Na kuhuutum Jerusaleŋ, di êsukay yata Betphaje yammi ñata di hurimbiliŋahu hata Oliveyra, ña Jesus naboñ kurebooraaku katawool egaba ma aaniil: 2 “Jikay be di êsukay yammi utu kayooŋ, nki jijuk embaamay ma ekokim, di poop jimbaam jaaju, ña di jîheluu'so ma jîŋaruu'so. 3 Be anaw alobuu'jaa makeel, di jeenool Ata Emit omasoholosom, be mbi aga ban nâlaañenuu'so.” 4 Wahaw uwe uga mo, ma coohen non ma añaaŋenaaw ata kûboñaku kata Emitay aloom âanul:5 “Jeen êsukay yata Siyoŋ:
‘Âyyaw atayiil ahepum bûyeget,
ômareesewuum be baabu di buko,
ban omu ma ageelowulom embaamay
di poop huŋilahu hata embaamay, yagam encaamay yapeenuwem wah.’ ”
6 Ña kurebooraaku katawool di kukay kûriiŋ, di kuga non ma alobiim, 7 ma kûŋarul embaamay, di poop yaayu yagam huŋilahu. Na kuŋallosom kûriiŋul, di kutal wañaw di so, ban Jesus nageelo yo. 8 Ña bukan kameeŋe kata di buyooŋa'ubu di kuŋar wañaw watayiil kutal di buruŋabu. Bukaaku di kûtijul maanamu mata uyaajaw ma kutal mo di buruŋabu. 9 Ña êsukay kayaam kayooŋ, di poop kaaku kâyooliilom, ya kûŋaaŋulo ma kêenul: “Osaana Añool David! Usalaal anaw akaylom di kañaaŋaku kata Ata Emit! Osaana Emitay yammi hatiyatiya!”
10 Be na kugam kunebeje Jerusaleŋ, ña hankahu peh di huloloboor ma ya kurik kêenul: “Kama ume ay?” 11 Ña buyooŋa'ubu bata bukanaku di keeniil: “Ume Jesus, agam añaaŋenaaw ata kûboñaku kata Emitay, ata Nasare yata Gâlileeya.”
Jesus oo di eluupay yata Emitay
12 Na Jesus anebeem di eluupay yata Emitay, ña nâcaalhen bukanaku peh ka ya kajaayum, di kunoom dô poop wahaw, ban natah simeesaasu sata buwecekaabu bata bancaamabu, di poop kûtenkaku kata bujaayaabu bata sîpaakiitasu. 13 Ban naaniil: “Momu ma muŋiicim kaan, Emitay yeene: ‘Eluupay yûmbaam, eluupay yata kalhawaku,’ be miwuul di jiga yo eluupay dâ bûkuutaabu bûñooruwem.”
14 Ña bûpuumaabu, di kubapuwooraaku, di kûkayil ki kutookoo'dô, ña nabuuneniil. 15 Na yahaanay yata phârisewwi, di bulhikitenaabu bata kûboñaku kata Emitay kujuum miñamu mata sembaasu sata Emitay ma Jesus ya agam, di kujam poop ma balaabu ya kûŋaaŋulom ma ya kêenul: “Osaana Añool David.” Ña di kubirik d'oo. 16 Ban di kurinkool keenool: “Kama ulee'ma ujamem maama balaa'ubu kulobem di mo?” Be Jesus naaniil: “Nijame! Kama jipisent kûboñaku kata Emitay kammi:
‘Aw ugam balaabu, di kaaku karommi di baraahabu, ma kûŋaaŋulo ma kusali kasalaku kalhegenumaayaku’?”
17 Ban Jesus nawalhii'to ma akay be di êsukay yata Betaaniya, âriiŋ namoo'bo.
Buyaajabu baaneyim phigeera bawolhutum
18 Ña hata kajom bûjomaru, na agam omalaañem be di hânkijahu, bacaarabu boo d'oo. 19 Ña najuk phigeera di buruŋabu, nakay be to, be ajukut dô muriyaay, ma ajuk utojaw keb. Ña naan bo: “Ootunki uwolhurer muriyaay!” Ña too kaŋ cab, di bulhaalh. 20 Na kurebooraaku katawool kujuum wahaw uwu, ña di kujaahali, ban ya kêenul: “Kama mata wa ma bûlhaalhummi umu cab?” 21 Ña Jesus naaniil: “Ma iñaaŋenuul malhegen eenuul, jîynen jaa bamantiirut, ntuwa non ma igam ume keb jeelim jiga, be jeeliye poop jeen hurimbiliŋa'uhe, huroocooro ma nki ugiit di kasamaaku, di huga mo. 22 Moo jîynen jaa, wahaw peh wa mbi jilhaw Emitay, di ewuluu'wo.”
Jesus narink yahaanay mata Joŋ Batista
23 Be na Jesus ârimmi di Eluupay yata Emitay, ya alhikiten êsukay, ña yahaanay yata bumaaŋenaabu bata Emitay, di poop yahaan yaayu yata êsukay, di kûhugool ma kurinkool keenool: “Kama di sembe bu nugawmem wahaw uwu? Aymoom awulim Semba'usu?” 24 Ña Jesus naaniil: “Înje poop ma irinkuul, jiñaaŋenom jaa, înje poop niñaaŋenuul sembaasu simanasu sa igawmem di so wahaw uwe. 25 Kama jâbatisaju ja Joŋ ya âbatisum bukanaku ûbey jîcaalhumulom? Mante hatiya di emitay, be mante di ejamaatay?”
Ña yahaana'uyu di kutabulhenoor, ña di kêenul: “Oonaawoo'jaa, hatiya di emitay kûcaalhumulom, noon mbi aanolaal: Moo mata wa ma jîynentummi Joŋ? 26 Be oonaawoo'jaa di ejamaatay kûcaalhumulom, ûkoliyaal êsukay, mata kûynene kaan Joŋ oo añaaŋenaaw ata kûboñaku kata Emitay.” 27 Ña di keen Jesus: “Ûli ûmirut.” Ña Jesus naaniil: “Înje poop etukañaaŋenuul sembaasu sata anaw sa îgawumem di so wahaw uwe.”
Kaliikumaku kata balaabu egaba
28 “Moo, bu jinongum di eloba'uye? Baje âynaaw abaam kuŋilaku egaba. Be nâriiŋ huk haahu, naboñ aahu âtiyaaraw ma aanool: ‘Jimpaa, ukay ki ugoroor umba di etoolay yata ûuba.’ 29 Be añoolool umu naanool: ‘Ampoom, înje îkint ikay!’ Be naga ban, nawatatenooro ma akay. 30 Be ampayiil nakay ki aboñ joon aahu agabutaw. Ña umu agabutaw naanool: ‘Aa, mbi ikay.’ Be ban akayut. 31 Moo, kuŋila'uku egabaay, aymoom âgawummi non ma ampayiil âkimmi?” Ña di keenool: “Aahu âtiyaaraw.” Ña Jesus naaniil: “Ma iñaaŋenuul malhegen eenuul, buyabaabu bata buyuupabu, di yaaraay kagam sîkusumasu, koku ma kunebejem di kâyyaku kata Emitay ma kusinguul. 32 Mata Joŋ Batista oo akaylom ma âyisuul buruŋabu bata malhegen, be jîynentool; ma buyabaabu bata buyuupabu di yaaraay kagam sîkusumasu kûynenool. Mata palimo ma jijuum wahaw uwu, jîynentool ma jiwatatenooro.”
Kaliikumaku kata buwañaabu bâlhapitaabu
33 Ban Jesus naaniil joon: “Jitallhen ma iñaaŋenuul kaliikum kaaku: Moma awañaaw agam, nagiiten etoolay yata ûuba, ban nâwul yo, ban nâcookoor dô tiŋatu tata jaguncenaju jata ûuba, naga dô poop jîngungaju jâraagim be hatiya jata apooyaaw, ban nawuu'yo buwañaabu baabu ma mbi ya kuncaamool, ma oo akay be êsuk.
34 “Nagam tîriiŋe ma ûuba ehaluli, âynaaw umu akiim etoola'uyu naboñul bugorooraabu batawool ma nki kûyabul bûgiitabu batawool. 35 Na kûrimmi, buwañaa'ubu ka agam di etoola'uyu, di kusoh aahu kûnagul, di kubuj aahu, aahu di kumabool kuwaaliisaku. 36 Be âynaaw akiim etoola'uyu naboñ kugorooraaku kaaku katawool kahammi mayej kaaku kâtiyaaraku. Na kûrimmi, buwañaa'ubu di kugawiil joon non ma kugam kaaku kâtiyaaraku. 37 Di hûbanumahu, âynaaw umu ña naboñ añoolool ma âanul: ‘Ma agam añoolom, mbi kujam d'oo.’ 38 Be na buwañaa'ubu kuŋandellom añoolool, ña di kulob ma kêenul: ‘Inja añoolool ômareesewuum di umma, mbi ubujaawool ma mbi uŋaraal etoolay.’ 39 Na ârimmi, di kusohool ma kûcaalh d'oo di etoolay ma kubujool. 40 Ban Jesus narinkiil aaniil: Na ata etoolay mbi âlaañul, bu mbi aga buwañaa'ubu?”
41 Ña di keenool: “Mbi âbujikoor buwañaa'ubu bâlhapitaabu, ban naga dô buwañaabu baabu ka mbi ya kuga muriyaayamu mutat, di kuwulool bûgiitabu batawool.” 42 Ña Jesus naaniil: “Kama jipiseneenorut Baŋiicerabu baloom kaan:
‘Huwaaliisahu ha buteepaabu bulatum,
hohalammi huga kâjajaku kasoom eluupay;
wahaw uwe, Ata Emit agawom, nujukaa'wo nujaahaliyaal.’
43 “Moo, ma iñaaŋenuul eenuul kâyyaku kata Emitay, mbi kûcaalheni di miwuul, ma kuwuli êsuk yaayu ka mbi ya kuwolh muriyaayamu. 44 Be anaw a mbi alo di huwaaliisa'uhu, mbi aga batijabu; be huwaaliisa'uhu poop, hûlowum jaa anaw, mbi apunculo.”