Jesus nanebej Jerusaleŋ
11
Ban Jesus di kurebooraaku katawool di kukay be Jerusaleŋ na kugam kuhuute, di kûriiŋ di mûsukamu maaneyim Betphaje di Betaaniya makotum hurimbiliŋahu haaneyim Oliveyra. Ña Jesus naboñ kurebooraaku katawool egaba 2 ma aaniil: “Jikay be di jîsukaju jammi kayooŋ; be na mbi jiga jinebeje, nki jitook jimbaamaju ja an ageeluwortum ma jikokim; di jîhelhuu'jo ban di jîŋaru'jo. 3 Be an arinkuu'jaa aanuul: ‘Mata wa ma jîgawummom?’ Di jeenool: Ata Emit asoholojom, be mbi âlaañenu'jo maame.”4 Ña di kukay, na kûrimmi, di kutook jimbaamaju tîyaŋ di hûluulahu ñata di êtingaay ma jikokim. Na kugam ma kûhelhu'jo, 5 bukan kaaku kalakotom, di kurinkiil keeniil: “Kama miwuul, wa jigawem di wo? Mata wa ma jihelhumem di jimbaamaju?” 6 Be di kulaañeniil ma kulobiil non ma Jesus alobuliim. Ña bukana'uku di kuwalhii'bo ma kukay di jo.
7 Ña di kukay di jimbaama'uju ki kuwul Jesus. Na kûrimmi di kutal bulhiimaabu batayiil hatiya di bajeeŋandabu bata jimbaama'uju, ban Jesus nageelo jo. 8 Bukan kameeŋe di kutal bulhiimaabu batayiil di buruŋabu, bukaaku di kûtijul waanaw di bujalabu kuray di buruŋabu. 9 Be bukanaku kayaboom kayooŋ, di poop kaaku kâyooliilom, ya kûŋaaŋulo ma ya kêenul: “Osaanaa Emitay ewul kâsuumaay anaw akaylom di kañaaŋaku kata Ata Emit! 10 Kâsuumaayaku kulako di kâyyaku kata ampawolaal David ka mbi kûriiŋul! Osaana, hatiyatiya di emitay!”
11 Be na Jesus agam nanebeje Jerusaleŋ, nakay be di Eluupay yata Emitay, âriiŋ, najuk miñamu mândom peh. Be ma tiren kajon, ña nakay di kurebooraaku katawool kunŋen di egabaay, be Betaaniya.
Jesus nañaan buyaajabu baaneyim phigeera
12 Nagam hata kajom, koo ma kûlaañumewuum Betaaniya, bacaarabu ma busoom Jesus. 13 Ña naŋanden buyaajabu baaneyim phigeera ma bugam bîlap bîlap. Ña nakay be ta bemmi, mante nâbaju'dô muriyaay. Be na ârintom, ajukut makeel, ma âjuu'dô keb utojaw, mata ma tîriiŋutum na uwolhem. 14 Ña naan buyaaja'ubu: “An aatuba ariyer muriyaayi!” Kurebooraaku katawool di kujam non ma aloom.
Jesus oo di eluupay yata Emitay
15 Na Jesus koo di kurebooraaku katawool kugam kûriiŋe Jerusaleŋ, nakay anebej di Eluupay yata Emitay. Na ârindom, ña nâcaalhen bukanaku peh ka ya kajaayum, di kunoom dô poop wahaw; natah simeesaasu sata buwecekaabu bata bancaamabu, di poop kûtekaku kata kaaku bukanaku ka ya kânondom sîpaakiitasu. 16 Ban awalhut poop an akeel âŋarul miñ, ma ayaa'dô di ekaakay yata Eluupay yata Emitay, 17 ban ya alobiil aaniil: “Kama let ma ŋiicim kaan: Eluupay yûmbaam yo mbi yeeni eluupay yata kalhawaku kata Emitay yata âmbasuk peh? Be miwuul di jiŋaa'yo jiga tiŋatu ta bûkuutaabu bûñooruwem!”
18 Ña yahaanay yata bumaaŋenaabu bata Emitay, di bulhikitenaabu bata kûboñaku kata Emitay, ya kupaam maama mbi kuga ma kubuj Jesus. Be di kûkoliyool, mata êsukay ya êjaanaŋen mata balhikitenerabu batawool.
19 Na jaley areenemmi, Jesus di kurebooraaku katawool di kûcaalh di hânkijahu hata êsukay.
Jesus nalob mata kâynenaku
20 Hata kajom bûjomaru, na Jesus di kurebooraaku katawool kugam kokahulhem, di kujuk buyaaja'ubu baaneyim phigeera bo ma bulhaalhum be kaŋ di kuhaaraku. 21 Ña Pedru nawolho, naan Jesus: “Alhikitenaawe, jijaa buyaajabu ba uñaanum ma uloo'bo kaan an aatubi ariyer joon muriyaayamu mata bo, bulhaalhe.”
22 Be Jesus naaniil: “Jîynen Emitay. 23 Ma ilobuul malhegen eenuul, an âanuu'jaa hurimbiliŋa'uhe: Uroocooro ulo di hulhuwahu, ban âlandeelut di êsigiray yatawool, ma âynen kaan miñamu ma aloom mbi muga, di ga kaŋ non ma aloom. 24 Moo makiimom neenuul, miñ kaŋ peh ma jilhawum Emitay, ban di jîynen kaan ewuluu'mo ban, mbi Jijuu'mo. 25 Be na mbi jeen jilhaw Emitay, ga jaa non jibajoore di an akeel, di jiñankiitool, ma Ampawuul Emitay yammi hatiya di emitay mbi epas poop kûbajumiñaku katawuul. 26 [Mata jiñankiitut jaa anaw atilum di miwuul, ampawuul poop Emitay yammi hatiya di emitay yeetubi epas kûbajumiñaku katawuul.]”
Sembaasu sata Jesus
27 Ban di kulaañ be Jerusaleŋ. Na Jesus ya areesoorum di Eluupay yata Emitay, yahaanay yata bumaaŋenaabu bata Emitay, di bulhikitenaabu bata kûboñaku kata Emitay, di yahaanay yata êsukay di kûkayil be ta ammi, 28 ki kurinkool keenool: “Kama sembe bu nûgawumem miña'umu? Ay awulisom?” 29 Be Jesus nalaañeniil aaniil: “Înje poop irinkuul, jilaañenom jaa jak, niñaaŋenuul poop mata sembaasu sîgawumem miña'ume. 30 Jiñaaŋenom, kama jâbatisaju ja Joŋ ya âbatisum bukanaku, jîkayumul hatiya di emitay, be mante di bukanaku?”
31 Ña di kutabulhenoor ma ya kêenul: “Oonaawoo'jaa kûkayumul hatiya di emitay, mbi aanola: Moo mata wa ma jîynentummi? 32 Be oonaawoo'jaa poop, ya kûkayumul di bukanaku, leetubi jakola!” Di kûkoli êsukay mata bukanaku peh kûynene kaan Joŋ añaaŋenaaw ata kûboñaku kata Emitay. 33 Momakiimom di kulaañenool keenool: “Ûli ûmirut.” Jesus poop naaniil: “Înje poop, etukañaaŋenuul mata sembaasu sata anaw sa îgawumem di so wahaw uwe!”