Esatanaay di ebunten Jesus
4
Ña Buynum Bunapaabu, di bukay di Jesus be di ekinkay ma nki Diyaabu êhubool. 2 Ña na Jesus awoorum kukaku bukanaku egaba (40), bariit, basibet poop, ña bacaarabu di busohool. 3 Ña âhubaaw aamom Esatanaay, di êkayil ki êhugool ma yeenool: “Ga jaa non aw Añool Emitay, noon siwaalisa'use silaañ siga kûmburuwaaku.”4 Be Jesus naan yo: “Dôdu ma ŋiicim di kaan: Ajamaat âroŋumoriit keb mata wahaw wata huri, be ya aroŋum poop elobay yâcaalhumulom di butumabu bata Emitay.”
5 Ban diyaabu di eŋarool be Jerusaleŋ ki egawool hatiya tiŋatu tahammi mâraagi di Eluupay yata Emitay, 6 ban di yeenool: “Ga jaa non aw Añool Emitay, nubellho be di etaam; mata dôdu ma ŋiicim di kaan: Emitay mbi elob di kumalaakaku kata yo ma kuyaamuleni, ma aatuba mbi ûkandumaw watayi ûpingo di kuwaaliisaku.”
7 Be Jesus naan yo: “Dôdu ma ŋiicim poop kaan: Aatuba ûhop Ata Emit aamom Emitay yatayi.” 8 Ban di eŋarool joon be hatiya di hurimbiliŋahu hâraagim noon, ma êyisool ûyyaw peh wata ube di etaamay, di poop majakaamu mata wo. 9 Ban di yeenool: “Wahaw uwe kaŋ peh, mbi iwuli wo aw bâtiigener ma ûbinkenom.”
10 Ña Jesus naan yo: “Esatanaaye, ukay! Mata dôdu ma ŋiicim kaan: Ata Emit keb mbi ûbinken, oo poop keb mbi ugoroor be batawool.” 11 Ña diyaabu di ewalhoo'bo ma ekay, ña kumalaakaku di kûkayil bi kucookoorool.
Jesus nâlaañul be Gâlileeya
12 Ban na Jesus ajammi kaan Joŋ omu di ekullhay, ña nâlaañul be Gâlileeya. 13 Be na ârimmi, akayut be Nasare ma akay ki alako di êsukay yata Kâpharnawuŋ, yakotum kasamaaku di bantaabu bata Zebuloŋ, di bata Naphtali. 14 Aga mo ma mbi deeli ga non ma añaaŋenaaw ata kûboñaku kata Emitay, aaneyim Isayiyas aloom âanul:
15 “Êsukay yata Zebuloŋ, di yata Naphtali
sammi di buruŋabu bata kasamaaku, ñata kaalaku kata Jordoŋ,
di bantaabu bata Gâlileeya dâ bukanaku kagawutum jûdewwi kukimmi;
16 bukanaku kalakuwemmi di emuucenay,
mbi kujuk ehikitenumay yâamak;
kaaku kammi poop di hûlaamahu hata eketay,
ehikitenumay ehikiteniil.”
17 Ban Jesus nâcuk ma ya añaaŋen êsukay elobay yata Emitay ma ya aaniil: “Jiwatatenooro mata kûbajumiñaku katawuul, mata kâyyaku kata hatiya di emitay kure kâriiŋul.”
Jesus nâwool kurebooraaku katawool kûtiyaaraku
18 Na Jesus ya areesum di hubeereeraahu hata hulhuwahu hata Gâlileeya, najuk batiyaayabu egaba kagam bumbaalaabu, Simoŋ aaneyim poop Pedru, koo di Andre, koo ma kumbaalem. 19 Ña naaniil: “Jîkayil ma ukaayaal, ma mbi igawuul bumbaalaabu bata bukanaku.” 20 Ña di kuwalen cab kûmbaalumaku, ma kusoolhenool.
21 Ban arees deh, najuk joon batiyaay baabu egaba, Tiyaagu, koo di Joŋ, kaamom kuñool Jebedew, koo di busaanaabu di ampayiil ma kumahem di kûmbaalumaku. Ña nâwooliil. 22 Ña too kaŋ cab, di kubee'to ampayiil, di busaanaabu ma kusoolhen Jesus.
23 Ban Jesus ya areesoor Gâlileeya pooyo ma ya alhikiten êsukay di siluupasu satayiil sata kâmebooraku, ma ya añaaŋeniil Elobay Yâsuumaay yata kâyyaku kata Emitay, ban ya abuunen bukanaku peh kâjuutum, di poop kaaku kacokom. 24 Ña êriibiinaay yata Jesus di ewaasoor di bantaabu poobo bata Siiriya; ña êsukay ya kuŋallool bukanaku peh kâjuutum, kâjuut peh: kaaku ka kumalaku kûjupom, di kalowem ugekaw, di kubapuwooraaku, be nabuuneniil peh. 25 Ña buyooŋabu bata bukanaku ya busoolhenool, kaaku kata di bantaabu bata Gâlileeya, kaaku kata di baabu bata Dekaapoli,a kaaku kata Jerusaleŋ, kaaku kata di bata Jûdeya, di poop kaaku kata di bata kajim kaaku kata kaalaku kata Jordoŋ.