Jesus Nâwool Kureborawool Kûtiyaaraku
5
Haahu Jesus nakay be di hubeereeraahu hata hulhuwahu hata Jenesare, buyooŋabu di bulitenoorool ma ya kutallhen maama ya aloom elobay yata Emitay. 2 Ña Jesus najuk usaanaaw ugaba di hulhuwa'uhu; bumbaalaabu koo ma kuwalowlom di usaanaaw ma ya kukulhen kûmbaalumaku. 3 Ña Jesus nakay âjupo di baabu bata Simoŋ, ban naanool añuusoo'bo jinŋet be di mâlahaamu ma ârangi hubeereeraahu, ban naleeho, ma ya alhikiten buyooŋa'ubu elobay yata Emitay.4 Nagam nabane, naan Simoŋ: “Jikay be dâlahaadu ki jiraac kûmbaalumaku katawuul ma jimbaal.”
5 Ña Simoŋ naanool: “Alhikitenaawe, jaat numbaale hukare kaŋ pooho, be usohut kaŋ luuli. Be ma ulobolim ume mbi ukay uraac kûmbaalumaku ma umbaal.” 6 Ña di kuraac kûmbaalumaku di kusoh siwolasu kaŋ poopii kûmbaalumaku di keen kurusulo. 7 Ña di kûwiit kupaaliil kata di busaana baabu ma kûkayil ki keeneniil. Di kûkayil, di kumeeŋen usaanaaw ugabaaw poopii di ween uhooj. 8 Na Simoŋ Pedru ajuum bagawera'ubu, nâtiigen ta Jesus ammi ban naanool: “Ata Emit, ûrangiyom, mata înje anaw abajem kûbajumiñaku.”
9 Ña Simoŋ koo di kupaalool di kujaahali kaŋ noon mata siwola'usu sa kusoom. 10 Tiyaagu koo di Joŋ kuñool Jebedew kaamom kupaal Simoŋ koo poop di kujaahali kaŋ noon. Be Jesus naan Simoŋ: “Aatuba ûkoli, maame mbi uga ambaalaaw ata bukanaku.”
11 Di kuŋar usaanaaw ki kuya di hubeereeraahu ma kuwalen wahaw peh, ban di kusoolhen Jesus.
A Pesca Milagrosa
12 Haahu Jesus oo di hank haahu, âynaaw âjuutum kâjuutaku kata êtoogoonay nakayiil âriiŋ nâtiigen ta Jesus ammi ban nalhawool aanool: “Ata Emit, ûkin jaa nubuunenom.”
13 Ña Jesus nañuur kaŋenaku katawool ma agorool, ban naanool: “Nîkine ûju.” Ña âynaaw nâju to kaŋ cab. 14 Ban naanool: “Aatuba uloo'mo an akeel, be ukay ki bumaaŋenaabu bata Emitay kûyili, mata ma ûbuyorum ban di yo, ban nuwul opherta non ma kûboñaku kata Emitay kuloom.”
15 Ña kajamaaku kata Jesus di kuhaŋ to mawaasoor, bukan kameeŋe ya kûkayil ki kujam elobay yatawool, ban nabuuneniil. 16 Ban nâcaalh be tiŋatu tawaynoorum ma alhaw Emitay.
Jesus nabuunen âynaaw agam hubapuwooraahu
17 Haahu Jesus oo ma alhikitenem di bukanaku, phârisewwi koo di bulhikitenaabu bata kûboñaku kata Emitay, kâcaalhumulom di bâsukabu bata di bantaabu bata Gâlileeya, di Jûdeya di poop bata Jerusaleŋ, koo to ma kuleehom. Ata Emit oo ma awuloonom sembaasu sata jabuunenaju. 18 Ña kûynaaku di kûgawul humboliñaahu âynaaw agam hubapuwooraahu, ban ya kupaam maama mbi kuga ma kuŋarool be ta Jesus ammi. 19 Be mata ma bukanaku kumemmi, ña kubajutum ma mbi kuga ma kunebej di eluupay da Jesus ammi, ña di kuŋool di âynaaw umu, kûriiŋ di kûkabul bûniigenabu ban di kuwalellool di humboliñaahu be dô ta Jesus ammi. 20 Ña Jesus najuk ma kûynaa'uku non ma kûynenoom, ña naanool: “Kûbajumiñaku katayi, nipasi ko ban.”
21 Ña phârisewwi koo di bulhikitenaabu bata kûboñaku kata Emitay, di kûŋuŋunoor ma ya kêenul: “An bu ume arembeelem di Emitay? Baje an a mbi aali apas kûbajumiñ noon Emit?”
22 Be ma Jesus anamulemmi hunongoorahu hatayiil, ña naaniil: “Mata wa ma jinongoorumem di umu? 23 Kama bala oon an: ‘Ulhaalo ma urees, haŋut mâsuum ma oonool kûbajumiñaku katayi, nipasi ko ban?’ 24 Be ma îyisuul kaan Añool Ajamaat, nabaje sembe ute di etaamay ma apas kûbajumiñaku.” Ña naan hubapuwooraa'uhu: “Ulhaalo ma usoh humboliñaahu hatayi ma oot be yanŋi.”
25 Ña nalhaalo to di êsukay, ma asoh humboliñaahu ha kugawumuloom ma aat be yanŋool, ban ya asal Emitay. 26 Bukanaku peh di kujaahali kaŋ noon ma ya kusal Emitay, di kûkoli poop ma ya kêenul: “Jaat nujukaale wah wâamak.”
Jesus nâwool Levi
27 Na Jesus agam nâcaa'to, najuk ayabaaw ata buyuupabu aaneyim Levi, oo ma aleehom tiŋatu tata buyuupabu. Jesus naanool: “Usoolhellom.” 28 Ña nalhaalo, ma awaa'bo wahaw peh, ma asoolhenool.
29 Ban naga Jesus bûneŋabu bâamak yanŋool. Kayooŋaku kata buyabaabu bata buyuupabu koo to, di poop bukan kaaku kakaylom bi kuri tanor. 30 Be bukan kaaku kata di phârisewwi, koo di kupaaliil bulhikitenaabu bata kûboñaku kata Emitay, ya kutem kurebooraaku kata Jesus, ban di kurinkiil keeniil: “Kama mata wa ma jiriyumem di jijaaken tanor di buyabaabu bata buyuupabu, di sîkusumasu?”
31 Be Jesus nalaañeniil aaniil: “Bukanaku kâjuututum kûpaamoriit abuunena, be kaaku kâjuutum keb kupaamewoom. 32 Înje akayloot bi ipaam bukanaku kagawem jak, be kaaku kagawem kûbajumiñaku nikaymulom, ma keeli kuwatatenooro.”
Jesus Passa Tempo com Pecadores
Bukanaku di kurink Jesus mata bawoorabu
33 Ban bukan kaaku di kurink Jesus keenool: “Kama mata wa ma kurebooraaku kata Joŋ, be di kata phârisewwi kugawem bawoorabu, di kulhaw poop Emitay, be katayi kûgaworiit mo?”
34 Be Jesus naaniil: “Jeeliye jiga bukanaku kâwoollim be bûneŋabu bata bûyababu, ma kuga no bawoorabu koo too di âbutuwaaw? 35 Be hukahu hohu to na mbi âbutuwaaw âcaalheni ute di buko, manooman mbi kuga no bawoorabu.”
36 Ban Jesus naga joon kaliikumaku ma aaniil: “An âkiiculoriit jibey jata wañ wunkul âbahum waawu uhaanaw, aga mo jaa, uwu wunkulaw mbi ukaaño. Mata jibeyaju jata wañaw wunkulaw, jeetubi jiyabunoor di waawu uhaanaw. 37 An âgaworiit bunuk balelaabu di humboota huhaan hata kabaŋ, mata na mbi bulab, mbi hucaculo, bunuka'ubu di bûyuwo. 38 Bunuk balele, ya agayi di humboota hata kabaŋ kunkul. 39 Anaw ajakemmi bunukabu bankaabu, aatuba âkin baabu balelaabu. Mata mbi âanul: Baabu bankaabu buhaŋ mâsuum.”