Jesus akiim hîyyaayahu hata jûdewwi
6
Huk haahu di hîyyaayahu hata jûdewwi, Jesus koo di kurebooraaku katawool di kuyab di kalhaakaku kata muriyaayamu maanom noon emaano. Kureborawool di kupuulh muriyaaya'umu ya kupoopoy kutokoñ. 2 Bukan kaaku kata di kaasaaku kaaneyim phârisewwi di kêenul: “Mata wa ma jigawmem di umu, ma oonaam mûñoyye kaga di hîyyaayahu hatoolaal?”3 Jesus naaniil: “Kama miwuul jipisent maama David agam na bacaarabu busohiim koo di kupaalool? 4 Na kunebeem di eluupay yata Emitay ki kutokoñ kûmburuwaaku kâñoyyaaku, ka bumaaŋenaabu bata Emitay keb keelim kutokoñ?” 5 Ban naaniil: “Añool Ajamaat, oo akiim hîyyaayahu hata jûdewwi.”
6 Di hîyyaayahu hata jûdewwi haahu, Jesus nakay be di eluupay yata kâmebooraku kata jûdewwi kalhikiten bukanaku elobay yata Emitay, âynaaw dôo a kaŋenaku kûriraku kukeem. 7 Bulhikitenaabu bata kûboñaku kata Emitay, di phârisewwi, ya kulasuwool ma kujuk mante nabuunen an akeel ma mbi keeli kûbajunto ma keenool nahuusule hîyyaayahu hatayiil. 8 Be Jesus ma âmiim hunongoorahu hatayiil, naan âynaaw umu ata kaŋenaku kakeem: “Ulhaalo ma ujuum tutaru.” Ña nâlhaalowul ma ajuum. 9 Ban Jesus narinkiil: “Miwuul bu jinongum? Kama di hîyyaayahu hata jûdewwi, momu ma mulobim kaan uga jak, be mante uga kôji? Mante umelhen an di eketay, be mante uwalhool ma aket?” 10 Ña Jesus najikeriil poopiil, ban naan âynaaw umu: “Ûraawul kaŋenaku.” Âynaaw umu nâraawu'ko, ña di kûrawulo kaŋ jak.
11 Ña bulhikitenaabu bata kûboñaku kata Emitay, di phârisewwi di kubirik kaŋ noon, ña di kutabulhenoor maama mbi kuga Jesus.
Jesus najot kumakaaku katawool
12 Ban di kuka'uku, Jesus naŋool di hurimbiliŋahu ma alhaw Emitay, busonnaaru be kaŋ na titijemmi. 13 Na titijemmi, nâwoolul kurebooraaku katawool. Ban, najot di buko kunŋen di egaba, agam kumakaaku katawool, 14 kaamom: Simoŋ a Jesus agam kañaaŋaku kata Pedru, di atiyool Andre, di Tiyaagu, di Joŋ, di Philiipi, di Bartolomew, 15 di Matews, di Tome, di Tiyaagu añool Alphew, di Simoŋ âwoleyim Zelotia 16 di Judas añool Tiyaagu be di Judas Iskariyotis, aamom anommi Jesus.
Discípulos Escolhidos
17 Ban Jesus nâwalowul di buko âriiŋ di kujuum ta etaamay erem kerebeb ta kayooŋaku kata kurebooraaku katawool kemmi, di poop buyooŋabu bata bukanaku kâcaalhumulom di bantaabu bata Jûdeya, di bata Jerusaleŋ, di poop baabu bakotum kasamaaku baaneyim Tiiru, di Sidoŋ, 18 kakaylom ki kutallhenool, di keeli poop kubuunen, be di bukaaku ka kumalaku ya kûlaamemmi, nabuuneniil poop. 19 Bukanaku poopiil ya kûkin kugorool mata sembaasu sata Emitay sammi d'oo ña ya abuunen bukanaku peh kagoroom.
Kûboñaku kata kâyyaku kata Jesus
20 Ban Jesus najooŋoor di kurebooraaku katawool, ma aaniil:
“Miwuul jâsukateenom, jibaje hûpiira, mata mbi jêemi di kâyyaku kata Emitay.
21 “Miwuul jacaaretum mowme, jibaje hûpiira, mata kajom Emitay mbi epooñenuul.
“Miwuul jammi ma jikaawem mowme, jibaje hûpiira, mata kajom mbi jîlhu.
22 “Miwuul, jibaje hûpiira na mbi kubirik di miwuul, di kugeluul, di kulatuul ma kucah di miwuul, ma kêenul jijakut mata ma jemmi di buruŋabu bata Añool Ajamaat. 23 Jimaayoor na mbi kugawuu'mo, mata kajom Emitay mbi encaamuul bancaamabu barem kaŋ noon hatiya di emitay, mata moomu kaŋ ma simpayiil sîlaamemmi napiyaanu buñaaŋenaabu bata kûboñaku kata Emitay.
24 “Be miwuul jasaanumom jîgunuwe, mata jiyabe ban bûgiituul.
25 “Miwuul jammi ma jipommi mowme, jîgunuwe, mata kajom mbi jicaaret. Miwuul jammi ma jîlhuwem mowme, jîgunuwe, mata kajom mbi jikaaw ma jilhooŋooro meeŋ.
26 “Miwuul jîgunuwe na mbi bukanaku peh kusaluul, mata mo ma simpayiil sigam taate buñaaŋenaabu bata elobay yagawutum yata Emitay.
Bem-Aventuranças
27 “Be miwuul jammi ma jitallhenem d'înje neenuul: Jîkin bukanaku katiikewuum, di jiga poop jak bukaaku kâsuumutuum. 28 Di Jilhaw kâsuumaay be bata bukanaku kâlobikoorewuum, di jilhaw poop Emitay ma ega jak bukanaku kalesewuum. 29 An amabi jaa kamiñ di karaabaku, nûtiiwo ma amabi di kaaku. An abot jaa humantaahu hatayi, nuwalhoo'bo poop ma aŋar bûjupaabu. 30 Mbi ya uwul anoowan alhawim miñ. An aŋar jaa wahaw watayi, aatuba ulaañ urinkoo'wo. 31 Mbi ya jiga bukanaku jak non ma jîkimmi kugawuul.
32 “Mata jîkin jaa keb bukanaku kâkinuum, kasal bu mbi jibaj hatiya di Emitay? Palimo sîkusumasu ya kûkin poop kaaku kâkiniim. 33 Mata jiga jak keb bukanaku kagawewuum jak, kasal bu mbi jibaj hatiya di emitay? Mata palimo sîkusumasu ya kuga poop jak kaaku kâkiniim. 34 Mata jicaasen jaa keb bukanaku ka mbi kuga ban di kulaañenul, kasal bu mbi jibaj hatiya di Emitay? Palimo sîkusumasu ya kucaasen poop kaaka mbi kulaañeniil. 35 Be miwuul mbi ya jiga bûti! Jîkin bukanaku katiikewuum. Jigawiil jak, di jicaaseniil, ban aatuba jikob ma mbi kulaañenul. Mata jiga mo jaa, mbi jiga kuñool Emitay Yahammi Wah Peh, ban mbi encaamuul bancaamabu barem kaŋ noon hatiya di emitay, mata yoo ya ega jak bukanaku kânongikoorem, di poop bûlhapitaabu. 36 Mbi ya jiñankiit an poopool non ma Ampawuul Emitay eñankiitewuum.
O Sermão da Montanha
Aatuba jeen bukan kujakut
37 “Aatuba jiwataten bukan, ma aatuba Emitay ewatatenuul poop. Aatuba jeen bukan kubaje kûbajumiñ, ma aatuba Emitay elobuu'mo poop. Jibonket jaa, Emitay mbi ebonketuul poop. 38 Jiwul jaa, Emitay mbi ewuluul poop. Yo mbi ewuluul poopii di jihaŋen to, mbi emeeŋen sîkutasu satawuul sututut, ban di etos so kaŋ lit. Mata êkutey ya jîliikummi, yooyu poop ya mbi Emitay eliikumuul.”
39 Ban Jesus nañaaŋeniil kaliikuma'uke, ma aaniil: “Kama non poo'non anaw âpuumaaw, naaliye areesen anaw âpuumum poop? Ketubi kulo poopiil di busunabu? 40 Anaw ammi ma alhikitenem di wah, aaliit ahaŋ anaw alhikitenem d'oo. Be aban jaa jalhikitenaju jatawool, mbi aali poop non umu alhikitenoom.
41 “Bu nugawe ma ujuk kaporaku kammi di ñîkilañu ñata atiyi, ujukut huyaajahu hammi di ñîkilañu ñatayi? 42 Bu noolim ôonul atiyi: ‘Atiyom, ukobom mihooli kaporaku kammi di ñîkilañu ñatayi’, aw ujukut huyaajahu hammi di ñîkilañu ñatayi? Âhoolooruwaawe! Ûcaalhen para huyaajahu wammi di ñîkilañu ñatayi, ma mbi ooli ujuk jak, ma ûcaalhen kaporaku kammi di ñîkilañu ñata atiyi.”
Buyaaj bajake ya âmirumi di muriyaayamu
43 Jesus nâanul joon: “Buyaaj bajake, bûwolhoriit muriyaay majakut. Non poo'non baabu bajakutum, betu kawolh muriyaay majake. 44 Mata buyaajoobuyaaj, ya bumanjumi di muriyaayamu mata bo. Mata an aatuba ajooben muriyaayamu maaneyim phigu di busasag, aatuba ajooben poop muriyaayamu maaneyim uuba di bucalh. 45 Anaw a êsigiray yatawool ejakum, ya aga wahaw poop wajakaaw. Be an a êsigiray yatawool ejakutum, ya aga poop wahaw wajakutaaw. Mata miñamu mammi di êsigiray, mo ma an alobem.
Bukanaku kâgaworiitum non ma Emitay eloom
46 “Mata wa ma jeenumewommi ‘Ata Emit, Ata Emit’, ban jîgaworiit non ma ilobewuum? 47 An peh akaylom be baabu d'înje, ma ajam elobay yûmbaam, ban naga non ma iloboom, mbi îyisuul anaw a anokoorum d'oo. 48 Oo anokoorum poo'non anaw ateepum eluupay ban nabaken yo jak, na mbi buyelenooraabu bûteyil bugor hukalahu, hetu kalo. 49 Be anaw ajammi eloba'uye, ban agawut non ma eloom, oo agam poo'non anaw ateepum eluupay yatawool di hulhuusahu ban abakent yo, buyelenooraabu di bûteyil bugor hukalahu, di elo ma ekaaño kaŋ pooyo.”