Jesus nabuunen âynaaw a kaŋenaku kukeem
3
Ban Jesus nakay joon be di eluupay yata kâmebooraku yata jûdewwi. Âynaaw dô a kaŋenaku katawool kukeem. 2 Di eluupa'uyu yata kâmebooraku, bukan kaaku poop dô kâkimmi kulaso Jesus mante mbi abuunen âynaaw umu di huka'uhu hata hîyyaayahu hatayiil, ma mbi keenool nahuusule kûboñaku kata Emitay. 3 Be Jesus naan âynaaw umu: “Ûlhaalowul ma ûkayil be ute tutaru!” 4 Ban narinkiil aaniil: “Kama jake pîya di kukaku kata hîyyaayahu hatoolaal ma an aga wah wajake, be mante wah wajakut? Mante poop jake di hîyyaayahu hatoolaal ma upaken an, be mante ubujool?” Be di kupato gib. 5 Ña Jesus najikeriil poopii, di mulaañool ban nalaañ añankiitiil ma kûynenoriitoom mata ma sîsigirasu satayiil sijaakutum. Ban naan âynaaw umu: “Ûraawul kaŋenaku!” Na âynaaw umu âraawukom, ña di kûju.6 Ña phârisewwi di kûcaalh dô ki kubom di bukan kaaku kata di kaasaaku kata Erodis ma kutabulhenoor ma mbi kuga ma kubuj Jesus.
Jesus nabuunen joon bukan kaaku
7 Ban Jesus nâcaalh di kurebooraaku katawool be di hubeereeraahu hata hulhuwahu hata Gâlileeya. Buyooŋabu bata bukanaku kata bantaabu bata Gâlileeya di kusoolhenool. Na bukanaku kata Jûdeya, di kata 8 Jerusaleŋ, di kata Idumeya, di kata kajim kaaku kata kaalaku kata Jordoŋ, di poop kata bantaabu bata Tiiru di Sidoŋ, kajammi mata wahaw wa Jesus ya agam, ña buyooŋabu bata bukanaku di kukay be baabu d'oo. 9 Mata ma bukanaku kumemmi noon, ña naboñ kurebooraaku katawool ma kupaamulool busaana, ma êsukay eetubi elitenoorool. 10 Mata ma bukanaku ka abuunemmi kumemmi, ña bukanaku peh kâjuutum ya kuñuusoor ma ya kupaam ma kugorool. 11 Poopii bukanaku ka kumalaku kûjupom, ya kuga kujuk Jesus, di kulo di etaam ta ammi, ban ya kûŋaaŋulo ma kêenul: “Aw Añool Emit!” 12 Be Jesus ya âlhusiil di sembe ma kûyis kaan oo Añool Emit.
Jesus najot kumakaaku katawool
13 Ban Jesus naŋool di hurimbiliŋahu, ban nâwool bukan kaaku ka âkimmi, ña di kukay be ta ammi. 14 Ban najot di buko kaaku kunŋen di egaba kagam kumakaaku katawool, ka mbi kuleeho tanor d'oo ma mbi ya aboñiil ma kukay ki ya kuñaaŋen bukanaku elobay yâsuumaay. 15 Ban nawuliil sembaasu sata jâcaalhenaju jata kumalaku kâjupom bukanaku. 16 Kumakaa'uku koo keemom: Simoŋ, a Jesus agam kañaaŋaku kata Pedru, 17 di Tiyaagu di Joŋ kaamom kuñool Jebedew, agam kañaaŋaku kata Bowanersis: Daamom kuñool kararanjuun; 18 di Andre, di Philiipi, di Bartolomew, di Matews, di Tome, di Tiyaagu añool Alphew, di Tadew, di Simoŋ ata di kaasaaku kâkimmi kuyab etaamay yatayiil, 19 be di Judas Iskariyotis aamom agam ban nanoom Jesus.
20 Ban Jesus nakay be di eluupay, buyooŋabu bata bukanaku di bulaañ joon ki bûmeboor to, poopii Jesus di kurebooraaku katawool kubajut ma mbi kuga ma kuri. 21 Bukan kaaku ya kêenul Jesus hûkowahu hatawool hûsuumut. Na bukanool kujammom, di kukay ma nki kuŋallool. 22 Yahaan yaayu yata di buŋiicaabu bata kûboñaku kata Emitay kâcaalhumulom Jerusaleŋ, ya kêenul: “Âynaaw ume Bêlsebu aamom annahaanaw ata kumalaku ômajupuwoom. Mata sembaasu sata Bêlsebu nâcaalhenumem kumalaku.” 23 Ña Jesus nâwolliil poopiil, ban nalhikitenumiil uliikumaw ma aaniil: “Bu Esatanaay eelim êcaalhenooro? 24 Êsuk êgiitoor jaa ma ega waasaaw ban di utiikoor, non ña êsuka'uyu, mbi ewaas. 25 Bukan kammi di eluup kûgiitoor jaa ban di kutiikoor, non ña eluupa'uyu mbi ewaas. 26 Nokoor jaa non kâyyaku kata Esatanaay kûgiitoorum ma kutiikoor, non ña kama kâyyaku kata yo mbi kûbuyo. 27 An aaliit anebej di eluup yata an agawe hûlaat âkuut miñ matawool, oo bajenkutool para. Be ajenkool jaa, non mbi aali âkuut miñamu matawool.”
28 Ban Jesus naaniil: “Ma ilobuul malhegen eenuul, an abaa'jaa kûbajumiñ be mante âgelikoor an, kûbajumiña'uku peh keeliye kupasi, 29 be anaw âgelikoorum Buynum Bunapaabu, Emitay eetubi epasurer miña'umu, mata hûbajumiña'uhu ya hulako di ajamaat be nanoonan.” 30 Jesus ma âlobumom, mata ma bukanaku ya kemmi amalaw ômajupuwoom.
Jesus nalob mata iñaawool di kutiyool di poop kûliinool
31 Ban iñaaw Jesus, di kutiyool, di kukay be to, kûriiŋ di kulako tîyaŋ ma kuboñ ma kûwolliil Jesus. 32 Êsukay yoo too lhay ma eleehom ma eŋoomenool, bukan kaaku di keen Jesus: “Jijaa, iñaayi, di kutiyi, konka tîyaŋ kokapaamem d'aw.” 33 Jesus narinkiil aaniil: “Yeymoom kagam iñaawom, di kutiyom?” 34 Najikeriil poopiil kaleehotom ma kuŋoomenool, ban nâanul: “Jijaa, buke kugam iñaawom, di kutiyom. 35 Mata anaw agawem non ma Emitay êkimmi, oo agam iñaawom, di atiyom, di âliinom.”