Kaliikumaku kata abetaaw ata Esepeyay
4
Ña Jesus nakay joon ka alhikiten bukanaku elobay yata Emitay di hubeereeraahu hata hulhuwahu hata Gâlileeya. Buyooŋabu bata bukanaku di bukay ki bûmeboor to, poopii Jesus nâjupo di busaanaabu balakotom ñata di hubeereeraahu ta êsukay yemmi. 2 Ban ya alhikitenumiil uliikumaw di wah wameeŋe ma ya aaniil: 3 “Jitallhen! Awañaaw âcaam abet esepeyay. 4 Nagam oo ma abetem di yo, yaayu di elo di kakotenaaku kata buruŋabu, basuwaabu di bûkayil ki buri yo peh. 5 Yaayu di elo tiŋatu ta bawaalisabu bemmi, ña di êcaalhul no kaŋ cab mata ma kalhuusaku kuyejututom. 6 Be na baleyabu burumulom, esepeya'uyu di elhaah mata ebajut kuhaar kâraagiye. 7 Esepey yaayu di elo di tutaru tata ûlhantumaw. Na ûlhantumaw ukoobemmi di uhooten yo, ña ewolhut. 8 Be yaayu yalom di etaamay yajakum, di êcaalhul, di ekooben, na êcaalhemmi, di ebaj batoojerabu barem kaŋ non. Esepey yaayu di ebaj ujaabaw weemo anabawo di kunŋen, yaayu kûyyaku kûhaaji, yaayu di ebaa'wo weemo êteemeer.” 9 Na Jesus aloom umu, ban naaniil: “An abaam ûjaŋay wata jatallhen, najam.”10 Na êsukay egam yeete, kumakaaku katawool di bukan kaaku kalakotom, di kurinkool mata uliikumaw. 11 Be Jesus naaniil: “Miwuul Emitay egawuul jîmir huhaanaahu hata kâyyaku kata yo. Be bukan kaaku ya ilhikitenumiil uliikumaw, 12 ma ga non ma elobay yata Emitay eloom:
‘Ma kujiker bajukut,
di kutallhen bajamut.
Mata gayeenut mo, mbi kûlaañeenul be bata Emitay,
yoo di epas kûbajumiñaku katayiil.’ ”
13 Ban Jesus narinkiil aaniil: “Kama jinamulent jaa mata kaliikuma'uke, bu mbi jinamulen mata waawu? 14 Awañaaw oo agam poop non añaaŋenaaw ata elobay yata Emitay. 15 Esepeyay yalom di kakotenaaku kata buruŋabu, yagam poop non bukanaku kajamem elobay yata Emitay, ban to kaŋ cab, Esatanaay di êkayil êcaalen yo di sîsigirasu satayiil. 16 Yaayu yalom ta bawaalisabu bemmi, ya egam poop non bukanaku kajamem elobay yata Emitay di kûririgen mata yo, 17 be ma kâynenaku katayiil di Emitay kubajutum kuhaar, na mbi kûlaam, êsukay di elowumiil mata elobay yata Emitay, di kûcaalh. 18 Yaayu yalom di tutaru tata ûlhantumaw, ya egam poop non bukanaku kajamem elobay yata Emitay, 19 be hurim hunongoorahu hata mâsuumaamu mata etaama'uye, di hata husaanumahu, di poop hata miñ mameeŋe, di hugayiil elobay yata Emitay ya kujammi yetu kabaj kuhaar di buko. 20 Be esepey yaayu yalom di etaamay yajakum, yagam poop non bukanaku kajamem elobay yata Emitay di kûynen yo. Koo kugam poop non esepeyay yabaam batoojerabu barem kaŋ non: Husepey haahu di hubaj kutoojeraku keemo anabawo di kunŋen, haahu kîyakuhaaji haahu êteemeer.”
Jesus nañaaŋen mata ehikitenumay
21 Ban Jesus naaniil joon: “Kama ehikitenum ya eyabeni ban di ebaaheni kâweyum, be mante ban di êhuneni di elal? Iyiy! Ehikitenum ya eyabeni ban di egawi tiŋatu hatiya. 22 Bajut miñ mâñoorim maatumbi mujuki. Bajut poop miñ mâñoorim maatumbi mûmiri. 23 An abaam ûjaŋay, natallhen.”
24 Naaniil joon: “Jitallhen ma jijam ma ilobem di miwuul. Mata miñamu ma jîliikummi bukanaku moomu poop kaŋ ma Emitay mbi eliikumuul, ban di ebaŋenuul ma jihaŋen to. 25 Anaw abaam miñ, Emitay mbi ebaŋenool ma ahaŋ to. Be anaw abajutum, palimo maama abaam minŋet, mbi muŋari.”
Esepeyay yaliikumim kâyyaku kata Emitay
26 Ban Jesus naaniil: “Kâyyaku kata Emitay koo kugam poop non esepey ya an abeem, 27 ban palimo oo aŋotut be mante oo aŋote, esepeya'uyu mbi êcaalhul, di ekooben, oo bâmirut maama egam ma êcaalhul poopii di ekooben. 28 Mata etaamay egawem miñ mûleepul. Na mbi meen mûleepul, ûsitaw mbi ûcaalhul para, ban di mukooben, ban di muguben, ban nkit di mubaj batoojerabu. 29 Na mbi muriyaaya'umu muga mutate, ña anaw umu agiitemmom nkit nakay ka âhaluu'mo mata ma tata mo tîrimmi.”
Jikoolaju jaliikumim kâyyaku kata Emitay
30 Naaniil joon: “Miñ bu nooliyaam oonaal kâyyaku kata Emitay kunokoore di mo? Be mante kaliikum bu nooliyaam ugawaal ma ulhikitenumaal mata ko? 31 Kâyyaku kata Emitay koo kugam poop non, jikool jata buyaajabu baaneyim mustarda, jahammi mâtiiti bakool peh bata uyaajaw. 32 Be na mbi jigiiten, buyaajabu bata jo di buga buyaajabu bâamak bahammi uyaajaw peh. Waanaw wata bo di urayoor poopii basuwaabu di bûwul dô.”
33 Jesus ya aga no uliikum wameeŋe non uwe âlhikitenum êsukay ma mbi keeli kunamulen. 34 Ya alhikitenumiil kaŋ keb uliikumaw, be na mbi kulako diyooniil di kurebooraaku katawool, ya anamuleniil mata wo.
Jesus nâlhus hulhuwahu
35 No huka'uhu, na jaley agam ma ajon, Jesus naan kurebooraaku katawool: “Ûtipaal be kareb kaaku kata hulhuwahu.” 36 Ña di kuwaa'to êsukay, ma kûjupo di busaanaabu da Jesus âjupom ma kukay. Usaanaaw waawu poop di ureboor d'oo. 37 Piyowut, buhentelaabu di bûtekul di sembe, waajeelaaw di ûlhaalowul di sembe ma ûyuur be di busaanaabu, poopii di been buhooj. 38 Nagam umu, Jesus oo ma aŋotum ñata di hûlaamahu hata busaanaabu ban nâkagorum hûkagorumahu. Ña di kutonkool ban di kurinkool keenool: “Alhikitenaawe, kama lanti bo ma ulaal oomaam ma uketaalem?” 39 Jesus nâlhaalowul ma âlhus buhentelaabu di hulhuwahu, ma âanul: “Buhentelaabe uyin, hulhuwahe upato.” Ña buhentelaabu di hulhuwahu dô kaŋ peh di yin jub. 40 Narinkiil aaniil: “Kama mata wa di jîkoli? Be maame jîynenorutom?” 41 Ña kurebooraaku katawool di kûkoli ma ya kurinkoor ma kêenul: “Kama an bu ume, agawem alob di ehentelaay di hulhuwahu di ujam d'oo.”