Jesus nâcaalhen kumalaku kûjupom âynaaw
5
Ña Jesus di kurebooraaku katawool di kukay be kareb kaaku kata hulhuwahu hata Gâlileeya, di bantaabu bata gadarenuwi. 2 Na Jesus agam nawalowulo di busaanaabu, âynaaw a kumalaku kûjupom nâcaalhumul di husaahahu ma nki kupam. 3 Âynaaw umu di husaahahu nagam hukinahu hatawool. An mumulet bi ayetoor ma aŋar egenk ma agenkool. 4 Mata kuk kameeŋe na kuŋaam sigenkasu di kuseelaku ma kugenkool, be ya atii'ko. 5 Ña ya alako kukaku pooko di kurimbiliŋaku di poop kusaahaku, ma ya âruuren, naŋar poop kuwaaliisaku ma yaalhibooro. 6 Be na âynaaw umu aŋandemmi Jesus, nâteyil âtiigen ta Jesus ammi, 7 be âynaaw umu nâŋaaŋulo lhînŋa ma âanul: “Jesus, Añool Emitay Yahammi Wah Peh, wa nigawi? Nilhawi di kañaaŋaku kata Emitay, ma aatuba ulesom!” 8 Ma aloom umu mata ma Jesus ammi kumalaku kûcaa'd'oo. 9 Ña Jesus narinkool aanool: “Kama nooneyim bu?” Nalaañenool aanool: “Înje neeneyim buyooŋabu, mata ûli numeeŋe.” 10 Ban kumala'uku di kuwaasiyenoor Jesus ma kulhawool ma aatuba âcaalhen koo di bantaa'ubu.11 Di rewoo'no buyooŋabu bata sikumbaasu soo too di hurimbiliŋahu ma sihenem. 12 Ña kumala'uku di kulhaw Jesus keenool: “Ûwalholibo ma nki unebej di sikumbaa'usu.” 13 Jesus naan ko aawo. Ña di kûcaalh di âynaaw umu ki kunebej di sikumbaasu. Sikumbaa'usu sârimmi sînjunnaasu sigaba, di siga hîlibib pooso ki silo di hulhuwahu ma sîmee'dô.
14 Kûynaaku ka ya kâtekemmi sikumbaa'usu, ña di kutey ki kuñaaŋen mo bukanaku kakimmi di kankaku di poop kaaku kakimmi di mûsukamu mammi tîyaŋ. Ña êsukay di êcaalhul ma nki ejuk miñamu ma kulobiim. 15 Na kugam kûriiŋe ta Jesus ammi, di kutoo'to âynaaw umu a kumalaku kûjupuwemmi oo too ma aleehom, ma âjum jak, ban nalhiimo, ña di kûkoli. 16 Bukanaku kajuum na miña'umu mugayim, di kuñaaŋeniil mata âynaaw umu di poop mata sikumbaa'usu. 17 Ña di kulhaw Jesus di kañakat ma ya keenool âcaalh di êsukay yatayiil.
18 Na Jesus agam ma âjupo di busaanaabu, âynaaw umu a kumalaku kûjupuwemmi, nawaasiyenoorool aanool awalhoo'bo ma kureboor. 19 Be Jesus nalat, ban naanool: “Ukay be yanŋi ma nki ulob bukani miñamu ma Ata Emit agawim di maama añankiitim.” 20 Ña âynaaw umu, nakay be di kankaku kaamom kunŋenay kata di êsukay yatawool, âriiŋ nañaaŋeniil maama Jesus agawoom. Ña bukanaku peh kata bo di kujaahali.
Aŋilaw ata Jayru akeem, di añakanaw âjuutum
21 Ban Jesus nâjupo di busaanaabu ma alaañ be kareb kaaku kata hulhuwahu, buyooŋabu bata bukanaku, di bukay ki butookool di hubeereeraahu. 22 Âynaaw aahu ata di yahaanay yata Eluupay yata kâmebooraku yata jûdewwi aaneyim Jayru, nâkayil be baabu Jesus, najukoom, na âtiigen ñata di ûkandumaw watawool, 23 ban nalhawool di kañakat ma aanool: “Añoolom aaraaw oo ma aketem! Ûñankiit ma ukaya ki uga kaŋenaku katayi d'oo ma aroŋ.” 24 Ña Jesus di kukay di âynaaw umu. Buyooŋabu bata bukanaku di kureboor di Jesus poopii di kulitenoorool.
25 Di rewoo'no anñaakan aahu âjuutum ma hûsimahu ya ûcaalhul d'oo dâada, poopii naga di ko simitasu kunŋen. 26 Añakanaw umu, miñamu matawool nakajemmi peh di bubuunenaabu, be akoyit ma kâjuuta'uku kuhaŋ to mâkoji. 27 Be na ajammi mata Jesus, nagoloŋoor di buyooŋa'ubu bata bukanaku kujeeŋanda Jesus âriiŋ nagor bûjupaabu batawool. 28 Mata ma anongoorum di hûkowahu hatawool nâanul: “Palimo înje igore wañaw watawool keb, mbi îju.” 29 Be na agoom wañaw watawool keb, ña hûsima'uhu ha ya âcallhom d'oo di huwalh, ña nanamulen kaan nâjuwe.
30 Ña Jesus nâmir kaan sembaasu satawool sibuunene anaw. Ña nâtiiwowul be bata buyooŋa'ubu, ma arinkiil aaniil: “Kama ay agoom wañaw wûmbaam?” 31 Kurebooraaku katawool di keenool: “Inja nujuke non ma buyooŋabu bata bukanaku bemmi ma bulitenoorim, ya urink anaw agorim?” 32 Be Jesus ya ajegoor ma mbi ajuk anaw agoroom. 33 Ña añakanaw umu nâkoli ma ya aboboken, mata ma âmiim maama gawoom, ña nâkayil bi âtiigen ñata di ûkandumaw wata Jesus, ban nañaaŋenool peh non ma agam. 34 Be Jesus naanool: “Añoolom, nûjuwe mata ma ûynenommi, kâjuutaku katayi kûcaalhe ban; ukay kâsuumaay.”
35 Jesus oo baroŋ ma alobem, bukan kaaku kata di bugorooraabu kata di eluupay yata Jayru, di kûkayil ki keenool: “Jayru, jijaa añooli nawaluwe ban, aatuba ûlaamen Alhikitenaaw.” 36 Be Jesus lantoo'bo, naan Jayru: “Aatuba ûkoli, ûynen keb.” 37 Ban Jesus awalhut an akeel areboor d'oo, ma kay keb di Pedru, di batiyaayabu baamom Tiyaagu koo di Joŋ. 38 Na kûrimmi di eluupay yata Jayru agam annahaanaw ata eluupay yata kâmebooraku katayiil, Jesus nâjuu'do bukanaku peh ma kugam ban gûlhagulh, ma ya kukaaw ma kûruuren. 39 Na Jesus agam nanebeje, naaniil: “Kama mata wa ma jîgawummi ban ume gûlhagulh di ekaaway? Aŋilaw aketut omu ma aŋotum.” 40 Ña di kûlhuwool. Be Jesus naga bukanaku peh ma kûcaalh ma awaa'bo keb kubajaaku kata âacuu umu, di kurebooraaku êhaajiyaay katawool, ban di kunebej di êwaanaatay da âacuu umu atalim. 41 Na ârimmi, nasoh kaŋenaku katawool, ban naanool: “Talita kûmi.” Daamom: “Âacuu, înje eenen d'aw, ulhaalo!” 42 Ña to kaŋ cab, âacuu umu abaam ujaañaw kunŋen di ugaba, nâlhaalowul ma arees. Bukanaku peh di kujaahali kaŋ non. 43 Be Jesus naaniil aatuba mbi kuloburee'mo an akeel. Ban naaniil kuwul âacuu umu ari.