Bukanaku kata Nasare di kulat Jesus
6
Ña Jesus nagam ban, nâlaañul be di êsukay yatawool Nasare. Kurebooraaku katawool, di kureboor d'oo. 2 Na hîyyaayahu hata jûdewwi hûrimmi, Jesus nakay di eluupay yata kâmebooraku katayiil alhikiten êsukay elobay yata Emitay. Bukan kameeŋe ka ya katallhenoom di kujaahali noon, ña ya kêenul: “Kama âynaaw ume poop naane ûtey nâcaalhumulom di balhikitera'ube? Bu nagawe ma âjaalhi ume? Nabaj poop sembaasu sa âgawumem di ume? 3 Kama ntuwa oo agaagaaw ata utaaguwaaw aamom añool Mariya? Oo ntuwa atii Tiyaagu, di Jose, di Judas, di poop Simoŋ? Ntuwa kûliinool, ulaal oomaam ute?” Ña di mulaañiil d'oo. 4 Be Jesus naaniil: “Añaaŋena ata elobay yata Emitay, ârembeeloriiti tiŋ takeel, be di êsukay yatawool, di poop yanŋool ta bukanool kemmi, narembeeleyim.” 5 Ña Jesus abajut aga di êsukool miñ mata sembaasu sata Emitay, ma aga uŋenaw watawool di bukan kaaku keb ma abuuneniil. 6 Ña Jesus nâjanaŋen mata ma kûynentoom. Be ya areesoor di mûsukamu mata bo, ma ya alhikiten bukanaku elobay yata Emitay.Jesus naboñ kurebooraaku katawool
7 Ban nâwool kurebooraaku katawool kaamom kunŋen di egabaay, ma awuliil sembaasu sata jâcaalhenaju jata kumalaku di bukanaku, ban naboñiil ma kukay egabagaba. 8 Ban naaniil: “Aatuba mbi jiŋarurer miñ makeel jîkayetum. Jeetuba jîkayetum miñ mata huri, palimo humboota, palimo poop bancaam. Be mante huginkum keb jîreesum. 9 Mbi jikatabo, be aatuba jiŋar ûjupa ugaba.” 10 Ban naaniil joon: “Di eluupay da mbi jiwalen, di jilako dô be na mbi jîcaalh di jîsuka'uju. 11 Be bukan kata jîsuk jakeel kuyaañowutuul jaa, be mante koo kulatum katallhenuul, na mbi jeen jîcaalh, di jihank kaporaku kammi di ûkandumaw watawuul, ma mbi ga êmanjumay be batayiil.”
12 Ña kurebooraaku katawool na kugam kukaye, ya kuñaaŋen bukanaku ma keeniil kuwatatenooro mata kûbajumiñaku katayiil. 13 Ya kûcaalhen kumal kameeŋe di bukanaku, di kusaas poop mûkiramu bukan kameeŋe ma kubuuneniil.
Eketay yata Joŋ Batista
14 Ña Erodis aganom âyyaw, najam non ma kañaaŋaku kata Jesus kujammom, ma bukan kaaku ya kemmi: “Joŋ Batista oo ma alhaalowulom di kuketaaku, momakiimom ma âgawumem di miñamu mata sembaasu sata Emitay.” 15 Bukaaku di kêenul: “Oo Êliyas.” Be bukaaku di kêenul: “Oo ata di buñaaŋenaabu baabu bata kûboñaku kata Emitay bapiyaabu.” 16 Na Erodis ajammom, nâanul: “Ay! Joŋ Batista! A înje ibommi kuŋaal, nâlhaalowul di kuketaaku!”
17 Malhegen Erodis oo abiim aboñ ma kusoh Joŋ kugenk ban di kukulhool. Ma âgawumom, mata Erodiyas aamom apañoor atiyool Philiipi, a abotum ayab, 18 mata ma Joŋ ya aanoom: “Di bagawerabu batoolaal, ñôñoy ma uyab apañoor atiyi.” 19 Momakiimom Erodiyas nabrik di Joŋ, poopii nâkin abujool. Be aaliit, 20 mata Erodis ya âkoli Joŋ mata ma âmiim kaan oo anaw alhegenumaayaw ajamem di Emitay. Momakiimom Erodis ya acookoorool. Palimo poop magawem ajam baloberabu batawool di lhibool, be ya âkin atallhenool ñaa.
21 Na hukahu hûrimmi hata na Erodis âriiŋenen kajaañ kata na abajim, ña naga bûneŋabu. Di bûneŋa'ubu, nâwoolul yahaanay yamakoom, di yahaanay yata esellooraay, di poop yahaanay yata Gâlileeya. Di huka'uhu Erodiyas nâriitowum to. 22 Na kugam koku dô di bûneŋabu, âjuraw aamom añool Erodiyas, nakay dô amag, poopii Erodis di bukanaku ka âwollom di kûririgen. Ña Erodis naan âjuraw umu: “Ulhawom miñ kaŋ peh ma ûkimmi, mbi iwuli mo.” 23 Ban anuur aanool: “Miñoomiñ ma ulhawommi, mbi iwuli mo. Palimo aw ulhawe ma îgiit etaamay yûmbaam ujimaw ugaba ma iwuli kaaku, niwuli ko poop!” 24 Ña âjuraw umu nakay arink iñaawool aanool: “Wa mbi ilhaw?” Be iñaawool naanool: “Ulhawool Hûkowahu hata Joŋ Batista.” 25 Ña to kaŋ cab, âjuraw umu, nañaah âriiŋ naanool: “Nîkine uwulom mowme mowme Hûkowahu hata Joŋ Batista di jiboolaju.” 26 Ña Erodis di gawool kaŋ gôñol. Be mata ma anuurum êsukay yoo to, mumulet bi agawut mo. 27 Ña to kaŋ cab, naboñ asellooraaw ma nki âŋarul hûkowahu hata Joŋ Batista. Ña asellooraaw umu nakay be di ekullhay, âriiŋ nâŋalul Joŋ Batista, 28 ban nâgawul Hûkowahu hatawool di jiboolaju awuu ho âjuraw umu. Ban âjuraw umu naŋaa'ho awul iñaawool. 29 Na kurebooraaku kata Joŋ Batista kujammom, di kûkayil ki kuŋar ehuluŋaayay yatawool ki kuhok.
Jesus nawul buyooŋabu bata bukanaku kuri
30 Na kumakaaku kata Jesus kugam kulallo ba aboñiim, di kuñaaŋenool miñamu peh ma kugalobom, di poop maama kulhikitellom bukanaku. 31 Be êsukay di ega to kaŋ lhay, mata kaaku koo kalaañem, kaaku ya kûkayil, poopii Jesus di kumakaaku katawool, kubajut kuga ma kuri. Ña Jesus naaniil: “Jîkayil ma ukaayaal be tiŋ taatu ta mbi uwaynooraal ma jeeli jihepulen kotiit.” 32 Ña di kûjupo di busaanaabu buko diyooniil ma kukay be bo.
33 Be bukan kameeŋe di kujukiil koo ma kukayem, di kumanjiil. Ña bukanaku di kûcaalhul di mûsukamu mata bo peh, ma kutey ki kukobiil ta mbi kuya. 34 Be na Jesus agam nawalowulom di busaanaabu, najuk buyooŋabu bata bukanaku, nañankiitiil noon, mata koku ma kugam poop non, sîgaraniina sabajutum âtekena. Ña nalhikiteniil miñ mameeŋe. 35 Na jaley agam nareenene, kurebooraaku kata Jesus di kûkayil be ta ammi ki keenool: “Tiŋa'ute tiwaynoore, ban tire kajon; 36 Oon êsukay ekay be di kukinaku, di poop mûsukamu mammi ute reeken ma nki kunoom miñ mata huri.” 37 Be Jesus naaniil: “Miwuul jiwuliil kuri.” Kurebooraaku katawool di keenool: “Mante pîya uŋar bancaam bâriiŋe sîteemeer sigaba sata praata, ûnoomumul kûmburuwaaku be batayiil?” 38 Jesus naaniil: “Kama kûmburuwaaku ka jibaam, keemom bu?” Jikay ki jîjuku'ma! Di kûjukul ban, di keenool: “Kûmburuwaaku hutok di muwolamu mugaba keb nubaam.”
39 Ña Jesus naaniil keen êsukay peh kuga waasaaw ma kuleeho di mahosamu. 40 Ña bukana'uku di kuga waasaaw; waawu wata bukanaku êteemeer, waawu wata bukanaku kûyaku kugaba di kunŋen ma kuleeho di mahosamu. 41 Jesus naŋar kûmburuwaa'uku hutokay, di poop muwola'umu mugabaamu, ban nalhag hatiya di emitay ma asal Ata Emit, ban natijer kûmburuwaa'uku awul kurebooraaku katawool ma kûgiiter ko êsukay. Ban di kûgiiter mo poop muwola'umu mugabaamu. 42 Êsukay peh di eri, di epooñ. 43 Kurebooraaku kata Jesus di kûŋarul bâmonkabu bata kûmburuwaa'uku di bata siwola'usu baŋañunom, di kumeeŋen sîkutasu seemo kunŋen di sigaba. 44 Bukanaku katokommi kûmburuwaa'uku di siwola'usu, yîinaay keemo sînjunnaasu hutok.
Jesus narees di mumelamu
45 Ban Jesus naan kurebooraaku katawool kûjupo di busaanaabu ma kuyabool kayooŋ, ma kûtip hulhuwahu be kajim kaaku kata Betsayda, ma oo aga para êsukay ma keet. 46 Nagam êsukay yeete, Jesus naŋool di hurimbiliŋahu ma nki alhaw Emitay. 47 Nagam jaley najone, busaanaabu ma bûrimmi ban tutaru tata hulhuwahu, be Jesus oo baroŋ para tîyaŋ diyoonool. 48 Ña naŋanden kurebooraaku katawool koo ma kûlaamen di jaweenaju, hurim ma ya kulaajum ehentelaay. Na hukahu hugam huyiiliye, Jesus narees hatiya di mumelamu ma ya asoolheniil, âriiŋ naga non ma ahulhiil. 49 Be na kurebooraaku katawool kujukoom ma ya areesum hatiya di mumelamu, di gawiil non âpurapuraw kujuum, ña di kûruuren, 50 mata ma kûkolim. Be Jesus naaniil: “Sâkoli! Înje kaŋ.”
51 Ban nâtookii'dô di busaanaabu, ña ehentelaay di eyin jub. Ña kurebooraaku katawool di gawiil jamalaŋ, 52 mata ma uynumaw watayiil wemmi ma ugam lhop, ña kunamulent mata miñamu mata sembaasu sata Emitay ma Jesus agalom kûmburuwaaku.
Jesus nabuunen bukanaku di etaamay yata Jenesare
53 Ban Jesus di kurebooraaku katawool di kûtip hulhuwahu, ki kuya di huyaahu hata etaamay yata Jenesare. 54 Be na kugam kuwalowulo di busaanaabu, êsukay di emanjool. 55 Ña êsukay di etey ma ewaasoor di bantaa'ubu peh ma ya kûgawul kumboliñaaku bukaniil kâjuutum ma kuŋariil be ta Jesus ammi. 56 Ña tiŋ kaŋ peh ta Jesus ya akayum, palimo di mûsukamu, palimo di sîsukasu, palimo poop di ulhaakaw, êsukay ya kuga bukaniil kâjuutum di kânkijaaku kata sîsukasu satayiil, ban ya kulhawool ma bûjuutaabu palimo kugor keb kabeyaku kata bulhiimaabu batawool. Ña bûjuutaabu peh kagoroom di kûju.