Elobay yata Joŋ Batista
3
Nownu na âyyaw âmakaaw ata Rooma aaneyim Tibeeriw agam ujaañaw kunŋen di hutok di kâyyaku, Ponsiw Pilaatus oo ma aganom âyyaw ata bantaabu bata Jûdeya, Erodis naga no âyyaw ata baabu bata Gâlileeya, atiyool Philiipi naga no âyyaw ata baabu bata Itureya be di Trakonitis, Lisaniyas naga no poop âyyaw ata baabu bata Abileni; 2 Kayphaas koo di Anaas di kuga no yahaanay yata bumaaŋenaabu bata Emitay. Nownu Emitay di êboñul hurimahu hata yo Joŋ aamom añool Jakariyas oo di ekinkay. 3 Ña Joŋ ya añaaŋoor di bantaabu bata kakotenaaku kata kaalaku kaaneyim Jordoŋ, ma ya añaaŋeniil, ma aaniil: “Jiwatatenooro, ma Emitay epas kûbajumiñaku katawuul, ma jiyab kâbatismaku ma jîyis di kaan jiwatatenooruwe.” 4 Non ma Isayiyas, aamom añaaŋenaaw ata kûboñaku kata Emitay, aŋiicum di kaan:“Anaw ômaŋaaŋuluwem di ekinkay, ma âanul:
‘Jicookoor sîsigirasu satawuul jak non buruŋ,
be bata Ata Emit na mbi âkayil.
5 Mata ûlahaw peh, mbi ulhinki, kurimbiliŋaku kâmakaaku di kaaku kinŋetaaku, mbi kureweni.
Kubangaku kaŋonoorum, mbi kulhebeni ukolhaw peh mbi ulhinki.
6 Anoowan mbi ajuk maama mbi Emitay emelhen bukanaku di kûbajumiñaku katayiil.’ ”
7 Ña buyooŋabu bata bukanaku ya bukay ma nki Joŋ âbatisiil, be ya aaniil: “Miwuul jagam silunasu! Bu jigawe ma jîynen di kaan mbi jimellh di batalenabu ba mbi Emitay egawuul, ban jiwatatenoorowut? 8 Jake ma jîyis di eroŋay yatawuul di kaan jiwatatenooruwe. Ma aatuba jîririgen di kaan miwuul mbi jimellh di batalenabu bata Emitay mata ma jigam kuñool Abrawoŋ; ma iñaaŋenuul kaan palimo siwaalisa'use Emitay yeeli ega so siga kuñool Abrawoŋ. 9 Hûniirahu hohu to ban di kuhaaraku kata uyaajaw. Buyaajoobuyaaj babajutum muriyaay majake, mbi butiji ban di buraaci di sambunasu.”
10 Ña êsukay di kurinkool keenool: “Ña ma uloom umu, ûli bu noolim uga?” 11 Joŋ naaniil: “Anaw abaam ûjupaaw ugaba nawul apaalool baabu abajutum. Anaw abaam ari, nawul apaalool abajutum.”
12 Bukaaku kata di buyabaabu bata buyuupabu di kûkayil ma nki Joŋ âbatisiil. Di kurinkool keenool: “Alhikitenaawe, ûli poop, bu noolim uga?” 13 Ña naaniil: “Aatuba jiyab bancaam di kaŋenaku kata êsukay jihaŋen non ma kuboñuum.”
14 Esellooraay poop kaaku di kurinkool, keenool: “Ûli poop, bu noolim uga?” Naaniil: “Aatuba jiyab bancaam di êsukay di sembe, aatuba jisoosen an. Jîririgen di maama yahaanay yatawuul kuncaamewuum.”
15 Mata ma êsukay ya kukoom Kristu, aamom anaw a Emitay yemmi mbi êboñul, na kujuum Joŋ ña di kunong kaan oo Kristu. 16 Ña Joŋ nañaaŋeniil ma aaniil: “Înje ya îbatiisum mumelamu. Be aahu omu to a mbi âkayil ahaŋommi sembe meeŋ, nâhaŋikoorom mâyanki, palimo poop înje, ijoonut ma ehel uneewaw wata sikatabasu satawool. Oo mbi âbatismuul Buynum Bunapaabu di poop sambunasu. 17 Oo nabaje kâweyumaku ka mbi âweyum bajoolhabu ban naga bo di êyyaay, ban naraac epeesay di sambun sâbaworiit.” 18 Di elob yameeŋe, ya alhikiten bukanaku ma ya añaaŋeniil elobay yâsuumaay. 19 Ña âyyaw aaneyim Erodis, na Joŋ awatatenoom mata ma abotum apañoor atiyool aaneyim Erodiyas, 20 be di wah waawu lhay wa agam wajakutaaw, nalancen waawu joon ma akullh Joŋ.
Jesus nâbatisi
21 Na bukanaku kûbatiisim poopiil, Jesus poop nâbatisayi. Ban nagam oo ma alhawem di ampawool Emitay, hatiya di emitay di bâbulo, 22 Buynum Bunapaabu di bûwalowul banokoorum non êpaakiit ki buwalo hatiya di Jesus. Hurimahu di hûcaalhul hatiya, hêenul: “Aw aŋilaw ûmbaam, a înje igam di êsigiray yûmbaam, ya ugawom îririgen meeŋ.”
O Batismo de Jesus por João
Êbajoorumay yata Jesus
23 Na Jesus agam nâcuke bugoroorabu, sogo oo ma abaam ujaañaw anabawo di kunŋen. Noo nâmiri no noon añool Jose; Jose oo añool Eli, 24 Eli oo añool Matati, Matati oo añool Levi, Levi oo añool Melki, Melki oo añool Janay, Janay oo añool Jose, 25 Jose oo añool Matatiyas, Matatiyas oo añool Amos, Amos oo añool Nawuŋ, Nawuŋ oo añool Esli, Esli oo añool Nagay, 26 Nagay oo añool Maat, Maat oo añool Matatiyas, Mataiyas oo añool Semey, Semey oo añool Josek, Josek oo añool Jodaa, 27 Jodaa oo añool Jowanaŋ, Jowanaŋ oo añool Resa, Resa oo añool Zorobabel, Zorobabel oo añool Salatiyel, Salatiyel oo añool Neri, 28 Neri oo añool Melki, Melki oo añool Adi, Adi oo añool Kosaŋ, Kosaŋ oo añool Elmodaŋ, Elmodaŋ oo añool Er, 29 Er oo añool Josuwe, Josuwe oo añool Eliyeser, Eliyeser oo añool Joriŋ, Joriŋ oo añool Matat, Matat oo añool Lebi, 30 Lebi oo añool Simiyoŋ, Simiyoŋ oo añool Judaa, Judaa oo añool Jose, Jose oo añool Jonaŋ, Jonaŋ oo añool Eliyakiŋ, 31 Eliyakiŋ oo añool Meleya, Meleya oo añool Mena, Mena oo añool Matata, Matata oo añool Nataŋ, Nataŋ oo añool David, 32 David oo añool Jese, Jese oo añool Obedi, Obedi oo añool Bowas, Bowas oo añool Salmoŋ, Salmoŋ oo añool Naasoŋ, 33 Naasoŋ oo añool Aminadabi, Aminadabi oo añool Admiŋ, Admiŋ oo añool Arni, Arni oo añool Esroŋ, Esroŋ oo añool Peres, Peres oo añool Judaa, 34 Judaa oo añool Jako, Jako oo añool Isaki, Isaki oo añool Abrawoŋ, Abrawoŋ oo añool Tera, Tera oo añool Nawor 35 Nawor oo añool Serugi, Serugi oo añool Ragaw, Ragaw oo añool Phalek, Phalek oo añool Eber, Eber oo añool Salaa, 36 Salaa oo añool Kaynaŋ, Kaynaŋ oo añool Arphasad, Arphasad oo añool Seŋ, Seŋ oo añool Nowe, Nowe oo añool Lameeki, 37 Lameeki oo añool Metusaleŋ, Metusaleŋ oo añool Enoki, Enoki oo añool Jaredi, Jaredi oo añool Malaleel, Malaleel oo añool Kaynaŋ, 38 Kaynaŋ oo añool Enos, Enos oo añool Seeti, Seeti oo añool Adoŋ, Adoŋ oo añool Emitay.