Jesus nabaji Beleŋ
2
Nownu, âyyaw âmakaaw ata Rooma aaneyim Agustu nâboñul di kaan, basukabu poobo bammi di kâyyaku katawool, an poopool mbi akay be buŋiicabu. Ma aali âmir maama bukanaku keemom kammi di kâyyaku katawool. 2 Buŋiica'ubu bûtiyaarabu, na bugayim âynaaw aaneyim Sîreeni oo ma aganom âyyaw ata êsukay yaaneyim Siiriya. 3 Buŋiica'ubu, di bugawi no ma anoowan mbi aŋiici di êsukay ta awoom. 4 Ña Jose, nâcaalhumul di êsukay yata Nasare yammi di bantaabua baaneyim Gâlileeya, ma akay be di baabu baaneyim Jûdeya. Ma agam anaw ata êbajoorumay yata David,b nakay ma nki aŋiici di jîsukaju jaaneyim Beleŋ ta David awoom. 5 Nagam ma akay be buŋiicabu, di kukay koo di apañoorool aaneyim Mariya, nownu oo di harahu.6 Na kugam koku bo, Mariya hukahu hatawool di hûriiŋ. 7 Be ma eluupay yata humaasoorowutaahu elitum, Jose koo di Mariya di kukay ki kuwalen di jiluupaju jata uncaamaw. Tiŋa'utu di jiluupa'uju to ta Mariya aroŋum añoolool âtiyaaraw, naguubool ban natalool di êmabalay.
Bûtekenaabu bata Beleŋ
8 Di bantaa'ubu, hunaka'uhu hukaru, bûtekenaabu bata sîgaraniinaasu koo di ekinkay ma kupooyem di so. 9 Amalaakaw ata Ata Emit nâcalhiil, ña majaaŋaamu matawool di muhikiteniil poopiil di kuwolho. 10 Be amalaakaw naaniil: “Aatuba jîkoli, mata niŋalluul kûboñaku kata kâsuumaayaku ka an poopool mbi ajam nâririgen. 11 Jaat di jîsuka'uje jata David, Ahikulaaw atawuul nabaji, anaw a Emitay yemmi mbi êboñul, aamom Kristu Ata Emit. 12 Be ma iñaaŋenuul êmanjumay yatawool. Mbi jîriiŋ di jijuk aŋilaw aguubim sileesaasu, ban natali di êmabalay.”
13 Ña to kaŋ cab, di kujuu'to poop buyooŋabu bata kumalaakaku koo ma kusalem di Emitay ma ya kuyeeŋ kêenul:
14 “Usalaal Emitay yammi hatiya tiŋatu tahammi tiŋ peh.
Kâsuumaayaku kubaje ban be bata an poopool a Emitay êririgemmi d'oo.”
15 Ña na kumalaakaku kugam kulaañe be hatiya di emitay, bûtekenaabu di kulob ma kêenul: “Ukaylaal be Beleŋ ma nki ujukaal miñamu ma Ata Emit elobolaam di mo.” 16 Ña di kuñaah kaŋ cab be bo. Na kugam kûriiŋe, di kutoo'to Jose koo di Mariya, aŋilaw oo to ma atalim di êmabalay. 17 Na kujukoom ban, ña di kuñaaŋeniil non ma amalaakaw alobuliim mata aŋilaw umu. 18 Na bukanaku kujammi eloba'uyu ya bûtekenaabu kuloom, di kujaahali kaŋ poopiil. 19 Mariya miñamu ma ajuum di maama ajammi mata aŋilaw umu, naga mo di êsigiray yatawool ma ya anongoor mo. 20 Ña bûtekenaabu di kulaañ, na kugam koo kakayem, ya kuyeeŋ ma kusal Emitay hurim miñamu ma kujammi, ban di kujuu'mo, non ma amalaakaw alobiim.
O Nascimento de Jesus
21 Ban, na agam kukaku keemo hutok di kûhaaji, hukahu di hûriiŋ ha mbi kugawool huhaanaahu hata yîinaay non ma kûboñaku kata Emitay kuloom, ña di kugawool kañaaŋaku kata Jesus, kaamom ka amalaakaw agawoom bala Mariya atakaj harahu hatawool.
22 Na kukaku katayiil kata jâbuyooraju di Emitay jigam ña jibawe, non ma kûboñaku kata Moyses kuloom, ña Jose koo di Mariya, di kukay di aŋilaw be Jerusaleŋc ma nki kugawool buyintenabu di kaŋenaku kata Emitay. 23 Mata, kûboñaku kata Emitay mo ma kuloom poop kaan: “Aŋilooŋil îinaaw âtiyaaraw a mbi abaj, mbi ayintenool di kaŋenaku kata Emitay.” 24 Di kukay poop di ûlaabaŋaw ugaba di sîpaakiitasu sigaba, ki kûgawum heenaayahu hata Emitay non ma kûboñaku kata yo kuloom.
Elobay yata Simiyoŋ koo di Ana
25 Nownu Jerusaleŋ, âynaaw nalako dô aaneyim Simiyoŋ, oo anaw alhegenumaayaw, ban ya aga jak buynumabu batawool di Emitay, ban omu ma akobeenem hukahu ha mbi Emitay ehikul bukanaku kata yo, kaamom Israyel; Buynum Bunapaabu bo d'oo jak, 26 di bûysool kaan aatuba aketurer oo bajukut Kristu, anaw a Emitay yemmi mbi êboñul. 27 Ña Buynum Bunapaabu di bûkiiben Simiyoŋ be di eluupay yata Emitay. Na kubajaaku kata Jesus kukayum d'oo be dô, ma nki kugawool non ma kûboñaku kata Emitay kuloom, 28 Simiyoŋ nayab aŋilaw ma aleemool, ban nasal Ata Emit yahammi wah peh, ma âanul:
29 “Ata Emit, mowme nooliye uwaa'bo înje agorooraaw atayi ma iket di kâsuumaayaku,
nugaye non ma uloom;
30 mata, nijuke di kûkilaku kûmbaam ahikulaaw
31 a ubandoorum be bata âmbasuk poopool.
32 Aŋila'ume oo aamom ehikitenumay ya mbi ehikiten bukanaku kata bâsuk baabu bâmirutum Emitay.
Ban, oo mbi aga êsukay yata Israyel ebaj êriibiinaay.”
33 Kubajaaku kata Jesus, di kujaahali kaŋ noon, mata eloba'uyu ya Simiyoŋ aloom mata añooliil. 34 Simiyoŋ naaniil: “Emitay ewuluul hûpiira,” ban naan Mariya, aamom iñaaw Jesus: “Aŋila'ume Emitay ebolloom di êsukay yata Israyel; hurim oo, buyooŋabu bata bukanaku mbi kupak, kaaku mbi kunep. Oo êmanjumay yata Emitay ya mbi bukan kameeŋe kûlobikoor, 35 moo, mbi aga hunongoorahu hata bukan kameeŋe hutaaw. Mariya, aw mbi hâahi noon di êsigiray yatayi, non kajaasiya kuyawi.”
36 Añakanaw aahu aaneyim Ana, agam añaaŋenaaw ata kûboñaku kata Emitay, ampawool naaneyim Phanuwel ata di êbajoorumay yata Aseer. Na asoñom, aga ujaañaw hutok di ugaba, apañoorool naket; 37 ña nalako to kaŋ di hûkutaahu poopii nâriiŋen ujaañaw bukanaku ebakiir di ubakiir. Be ârajuluworiit Eluupay yata Emitay, hukoohuk bûjom, busonna, ya asal Emitay naga bawoorabu,d di kalhawaku dilo. 38 Na Ana ârintom, ña nasal Emitay kaŋ noon, ya alob mata aŋilaw umu be bata bukanaku poopiil kammi ma kukobem di ahikulaaw ata bukanaku kata Jerusaleŋ.
Bûlaañabu batayiil be Nasare
39 Na Jesus kubajawool kugam miñamu poomo ma kûboñaku kata Emitay kuloom, ña di kulaañ be yanŋiil Nasare, di bantaabu bata Gâlileeya. 40 Be Jesus, nabaj kañankiitaku di Emitay, nahil bûkooben noon, di sembaasu, di poop mâmiilankenamu dilo.
Jesus oo di eluupay yata Emitay
41 Ujaañaw peh, na mbi kâlundaayaku kaaneyim Paaskuwae kûriiŋ, kubajaaku kata Jesus ya kukay be Jerusaleŋ. 42 Na Jesus agam ujaañaw kunŋen di ugaba, nakay koo di kubajawool be kâlundaaya'uku Jerusaleŋ non ma kugawem. 43 Na kugam kâlundaayaku kubawe, ña di keet. Di bêeta'ubu, kama Jesus aatut ma alako bo Jerusaleŋ, kubajawool bâmirut. 44 Koo ma kureesem, di kêenul mante omu kayooŋ ma kureboorem di kupaalool, poopii na kugam kubaje hunak, inkiti di kurinkoorool di bukaniil, di kupaaliil. 45 Na kugam kujukutool, ña di kulaañ be Jerusaleŋ ki kupaamulool. 46 Di kupaamool poopii, be hukahu hûhaajutahu, di kutookool ma aleehom di eluupay yata Emitay, oo ma atutom bulhikitenaabu bata kûboñaku kata Emitay, ma ya atallheniil, ban ya arinkiil. 47 Bukanaku kajammi baloberabu batawool, non ma ya kurinkoom nalaañeniil, koo kaŋ poopiil di kujaahali mata mâmiilankenamu mata aŋilaw umu. 48 Ña Mariya koo di Jose na kujukoom, koo poop di kujaahali. Iñaawool naanool: “Jesus, mata wa nûgawoli ume? Ûli di ampayi, nupaami ban kaŋ poopii, nûgawoli uwollo ma ujukutim.”
49 Ña narinkiil aaniil: “Mata wa ma jipaamumem d'înje? Jîmirut kaan manooman mbi êemi ute bugoroorabu di eluupay yata ampawom, aamom Emitay?” 50 Be buko kunamulent eloba'uyu ya alobiim.
51 Ña Jesus nalaañ di kubajawool be Nasare, ban ya ajam di buko. Be Mariya, ya aga miña'umu peh di êsigiray yatawool. 52 Jesus, nârus di bûkoobenabu, di mâmiilankenamu dilo, nâsuum kulob di Emitay, di poop an poopool.
A Infância de Jesus