Joŋ Batista
3
Ban nownu, Joŋ Batista nâcaalhul di ekinkay yata Jûdeya ma ya añaaŋen elobay yata Emitay, 2 ma ya âanul: “Jiwatatenooro mata kûbajumiñaku katawuul, mata kâyyaku kata hatiya di emitay kure kâriiŋul!” 3 Mata añaaŋenaaw ata kûboñaku kata Emitay aaneyim Isayiyas, mo ma aloom mata Joŋ Batista âanul:“Anaw oma âŋaaŋuluwem di ekinkay ma âanul:
‘Jibandoor uruŋaw be bata Ata Emit;
jilheben uruŋaw be batawool.’ ”
4 Be Joŋ Batista ya akoko wañaw wariirumim buhalabu bata kameelusii, ban ya âkokowum hûkokowumahu hata kabaŋaku; ban ya atokoñ babonkaabu, nari poop mûkumamu. 5 Ña êsukay yata Jerusaleŋ, di kata Jûdeya peh, di poop bukanaku peh kata sîsukasu sakotukom, ya kukay be baabu d'oo di kaalaku kata Jordoŋ. 6 Ña ya kurej mata kûbajumiñaku katayiil, ma ya âbatisiil di kaala'uku kata Jordoŋ. 7 Na ajuum phârisewwi lhay, di poop sadusewwi lhay, ma ukaylom ma nki âbatisiil, ña naaniil: “Silunase! Ay añaaŋelluum ma jîteyil hûlaamahu hâreesewuum? 8 Jake ma jiga wahaw wa mbi ûyis kaan, malhegen jiwatatenooruwe mata kûbajumiñaku katawuul. 9 Jeetuba jinong di jêenul mbi jipak mata ma Abrawoŋ agam ampawuul. Mata ma iñaaŋenuul eenuul, palimo di kuwaalisa'uke, Emitay yeeli êcaalhenumuu'dô kuŋilaku ewulool. 10 Mata hûniirahu hata Emitay hohu to ban di kuhaaraku kata uyaajaw. Moo buyaaj peh bâwolhoriitum muriyaay majake, mbi butiji ma bubeti di sambunasu.
11 “Malhegen înje mbi îbatiisumuul mumelamu mata ma jiwatatenoorom, be aahu oma âreesewuum ahanŋommi mâyanki, a înje ijoonutum iralh sikatabasu satawool, oo mbi âbatisuul di Buynum Bunapaabu, di poop sambunasu. 12 Mata kâyiimaku koku ban di uŋenaw watawool, ma mbi awey ma aŋar bajoolhabu aga di êyyaay, ban nabol epeesay di sambun sâbaworiit.”
Jesus nâbatisi
13 Ña nownu, Jesus nâcaalhumul di bantaabu bata Gâlileeya ma âkayil be to di kaalaku kata Jordoŋ ma nki Joŋ Batista âbatisool. 14 Be Joŋ Batista nâkin ma alateen, ma aanool: “Inja aw mbi ûbatiisom, nôonul înje îbatiisi?” 15 Be Jesus naanool: “Uwaa'bo ma ûbatiisom, mata ugawaa'mo jaa, nugawaal non ma Emitay êkimmi.” Ña Joŋ Batista naga non ma aloboom. 16 Na Jesus âbatisim aga nâcallho di mumelamu, ña hatiya di emitay di bâbulo, Jesus najuk Buynumabu bata Emitay banaamoorum non êpaakiit, ma bûwaluwewuum ki bulen d'oo. 17 Ña karimaku kata anaw di kûcaalhumul dô hatiya di emitay kammi: “Ume Añoolom a iboolaatum, agawewommi îririgen.”