Bukanaku kajaalhuwaaku kata ba jaley âcaalhumewuum
2
Na Jesus abajim Beleŋ di bantaabu bata Jûdeya, nownu Erodis oo ma aganom âyyaw ata êsukay yata Israyel. Ña kûynaaku kaaku kalasuwem bootabu, di kûcaalhumul karebaku ka jaley âcaalhumewuum ma kûkayil be Jerusaleŋ. 2 Na kûrindom, di kurinkiil keeniil: “Ûtey ta aŋilaw ammi abajim a mbi aga âyyaw ata jûdewwi? Ûli ujukulom yootay yatawool karebaku kata ba jaley âcaalhumewuum, ña mo ukaylom bi ûbinkenool.”3 Na Erodis ajammom, ña di hâahool, di poop êsukay peh yata Jerusaleŋ. 4 Ña nâmeb yahaanay yata bumaaŋenaabu bata Emitay, di poop bulhikitenaabu bata kûboñaku kata yo, ma arinkiil tiŋatu ta mbi Kristu abajumi. 5 Be di keenool: “Mbi abaji Beleŋ yata Jûdeya, mata mo ma buñaaŋenaabu bata kûboñaku kata Emitay kuŋiicum kêenul:
6 ‘Aw Beleŋ, ootubi uga êsuk
yinŋet di sîsukasu peh sata Judaa,
mata d'aw mbi annahaanaw âcaalhumul,
a mbi âteken êsukay yûmbaam
yaamom Israyel.’ ”
7 Ña Erodis nâwool kûynaa'uku kajaalhuwaaku ma kûñooro, ban narinkiil aaniil: “Kama ûney na jijuum yoota'uyu.” 8 Ban naboñiil ma kukay be Beleŋ, ma aaniil: “Jikay ki jîrinkul jak jak mata aŋilaw umu, ta mbi jijukool, di jîkayil ki jirejom, ma înje poop mbi ikay ki îbinkenlool.”
9 Na kutallhemmi âyyaw umu, ban di kukay; be yoota'uyu ya kujukulom ba jaley âcaalhumewuum di eyabiil kayooŋ ma ejaŋen êriiŋ di ênaagen ta aŋilaw umu ammi. 10 Na kujuum yoota'uyu, ña di sûumiil ma kumaayoor noon. 11 Na kunebeem di eluupay, di kûtoo'do aŋilaw umu koo di iñaawool Mariya; ña di kûtiigen ma kûbinkenool. Ban di kûbaahul mûneegaamu matayiil ma kûcaalhenul wahaw waseerum noon: ûuru, di ebaaliinay, di poop miiraa kuwulool. 12 Ban Emitay di elob di buko di sîyawutasu ma yeeniil keetubi kulaañ be baabu Erodis. Ña di kuyab buruŋ baabu ma keet be di êsukay yatayiil.
Jose koo di Mariya, di kutey be Ejiptu
13 Na kugam kulaañe, Amalaakaw ata Ata Emit, nalob di Jose di sîyawutasu ma aanool: “Jose, ulhaalo ma uŋar aŋilaw koo di iñaawool, ma jitey be Ejiptu, ban di jilako bo be na mbi îlobul d'aw, mata Erodis oma apaamem di aŋilaw ma mbi abujool.”
14 Ña Jose nalhaalo hukaru ma aŋar aŋilaw koo di iñaawool ma kutey be Ejiptu. 15 Ban di kulako bo be na Erodis akeem; ma deeli ga non ma Ata Emit abiim bi alob di añaaŋenaaw ata kûboñaku katawool ma âanul: “Di êsukay yata Ejiptu nîwolumulom añoolom.”
16 Ña na Erodis âmiim kaan kûynaaku kajaalhuwaaku kata ba jaley âcaalhumewuum kubuntenool, nabirik noon. Ña naboñ ma kubuj balaabu peh kata Beleŋ, di kata mûsuk maamu makotutom, kagam ban ujaañaw ugaba ii be di etaam, non ma alasom niŋanu na arinkum kûynaa'uku di kuñaaŋenool. 17 Ña di ga non ma añaaŋenaaw ata kûboñaku kata Emitay aaneyim Jeremiyas aloom âanul:
18 “Hulasasenahu hâamak hata ñikulañu hûcallho Rama;
kama Rakeel akaawem di kuñoolool;
moo, âkint ban an âtikenool,
mata kukete ban.”
Di kûlaañumul Ejiptu
19 Na Erodis agam nakete, amalaakaw ata Ata Emit nâcaalhul Jose di sîyawutasu Ejiptu, 20 ma aanool: “Ulhaalo ma uŋar aŋilaw koo di iñaawool, ma jilaañ be êsukay yata Israyel, mata bukanaku kâkimmi kubujool kukete ban.”
21 Ña Jose nalhaalo cab ma aŋar aŋilaw koo di iñaawool, ma kulaañ be Israyel. 22 Be na ajammi kaan, Arkelaw aŋaam hiŋahu hata ampawool Erodis di kâyyaku kata Jûdeya, ña nâkoli kalaañ be bo. Be na Emitay eloom d'oo joon di sîyawutasu, ña nakay be di bantaabu bata Gâlileeya. 23 Na ârimbom, nalako di jîsukaju jaaneyim Nasare, ma ga non ma añaaŋenaaw ata kûboñaku kata Emitay aloom âanul: “Mbi âwooli anaw ata Nasare.”