ELOBAY YÂSUUMAAY YATA JESUS KRISTU YA
MARKUS
AŊIICUM
Joŋ Batista
1
Elobay yâsuumaay yata Jesus Kristu aamom Aŋilaw ata Emitay, di êcuk ma elobi 2 non ma añaaŋenaaw ata kûboñaku kata Emitay aaneyim Isayiyas aŋiicum âanul: “Emitay yeene:Mbi îboñul añaaŋenaaw ûmbaam ma ayabi kayooŋ ma acookoor buruŋabu batayi.
3 Anaw oo ma âŋaaŋuluwem di katentaku ma âanul:
‘Jicookoor buruŋabu be bata Ata Emit; jigawool uruŋ walhebe.’ ”
4 Ña Joŋ Batista nâcaalhul be di katentaku ma ya âbatis bukanaku, ma ya añaaŋeniil elobay yata Emitay ma ya aaniil: “Jiwatatenooro mata kûbajumiñaku katawuul ma jibatiisi, ma Emitay epas kûbajumiñaku katawuul.” 5 Bukanaku peh kata di bantaabu bata Jûdeya, di poop kaaku kammi Jerusaleŋ ya kukay be baabu Joŋ ma ya kurej kûbajumiñaku katayiil, ma yaabatisiil di kaalaku kaaneyim Jordoŋ.
6 Joŋ ya alhiimo wañaw wariirumim buhalabu bata encaamay yaaneyim kameelu, nakoko hûkokowumahu hata kabaŋaku, ban yatokoñ babonkaabu ya ari poop mûkumamu. 7 Ya añaaŋen bukanaku aaniil: “An aahu oo ma âreesewuum ahaŋommi mâyanki. Igawut poop an ajoone âsisen ma ahelh uneewaw wata sikatabasu satawool. 8 Malhegen înje mbi îbatiisumuul mumelamu, be oo mbi âbatisumuul Buynum Bunapaabu.”
Joŋ nâbatisi Jesus ban Esatanaay di êhopool
9 Noo, Jesus nâcaalhumul di jîsukaju jaaneyim Nasare jammi di bantaabu bata Gâlileeya ma nki Joŋ âbatisool di kaalaku kaaneyim Jordoŋ. 10 Na Jesus agam ma âcaalhul di mumelamu, najuk hatiya di emitay ma bâbulom, Buynum Bunapaabu di bûwalowul banokoorum non êpaakiit ki buwalo d'oo. 11 Hurimahu di hûcaalhumul hatiya di emitay hammi: “Aw añoolom a iboolaatum noon, ya îririgen d'aw.”
12 Ña piyowut, Buynum Bunapaabu di buŋar Jesus be di katentaku, 13 ba alakom kukaku keemo bukanaku egaba, be Esatanaay ya ebuntenool, nalako bo poop di bânunkureŋabu, be kumalaakaku ya kucookoorool.
Kumakaaku kûtiyaaraku kata Jesus
14 Na kusoom Joŋ ki kukulh, Jesus nakay be di bantaabu bata Gâlileeya ma ya añaaŋen elobay yâsuumaay, 15 ma ya aaniil: “Tihuute ma Emitay egawuul jiga bukanaku kata kâyyaku kata yo. Jiwatatenooro mata kûbajumiñaku katawuul ma jîynen elobay yâsuumaay.”
16 Na Jesus ya areesum di hubeereeraahu hata hulhuwahu hata Gâlileeya, najuk bumbaalaabu egaba, kaamom Simoŋ Pedru koo di atiyool Andre, koo ma kumbaalem. 17 Jesus naaniil: “Jîkayil ma ukaayaal, mbi igawuul bumbaalaabu bata bukanaku.” 18 Ña di kuwalen kûmbaalumaku katayiil ma kusoolhenool.
19 Kurees maa, di kujuk kuñool Jebedew, kaamom Tiyaagu koo di atiyool Joŋ, koo di busaanaabu batayiil ma kumahem di kûmbaalumaku. 20 Ña Jesus nawooliil buko egabaay, ña di kuwaa'to ampayiil Jebedew di bugorooraabu kammi di busaanaabu, ma kusoolhenool.
Âynaaw a Jesus abuunemmi
21 Ban Jesus koo di kurebooraaku katawool di kunebej di hânkijahu hata êsukay yaaneyim Kâpharnawuŋ. Di hîyyaayahu hata jûdewwi, Jesus nakay be di eluupay yata kalhawaku kata Emitay ma nki alhikiten êsukay elobay yata Emitay. 22 Êsuka'uyu di kujaahali noon mata balhikitenerabu batawool, mata bubaabaa sembe, ban beenowut non bata bulhikitenaabu bata kûboñaku kata Emitay.
23 Be Jesus oo baroŋ ma alhikitenem di buko, âynaaw a amalaw âjupom, nâŋaŋulowul lhînŋa, 24 ma âanul: “Jesus ata Nasare, wa nugayi? Aw ukaylom bi ûbujoli? Nîmire kaan aw anaw anapaaw ata Emitay!” 25 Ña Jesus nâlhusool di sembe, ma aanool: “Upato! Ûcaalh di âynaaw umu!” 26 Ña amalaw natahool di etaam ma agawool apawoor, nâruuren lhînŋa, ban nâcaalh. 27 Êsukay kaŋ peh kalakotom di kûkoli ma ya kurinkoor kêenul: “Kama an bu ume? A balhikitenerabu batawool bubaam ume sembe, be di kumalaku poop ya alob di ko, di kûcaalh.” 28 Ña kajamaaku katawool di kuwaasoor di bantaabu poobo bata Gâlileeya.
Jesus nabuunen joon bukan kaaku
29 Na Jesus koo di kurebooraaku katawool kugam kûcaalhe di eluupay yata kâmebooraku kata jûdewwi, di kureboor di Tiyaagu, be di Joŋ ma kukay be baabu Simoŋ Pedru koo di atiyool Andre. 30 Iñaaw apañoor Simoŋ Pedru oo dô ma akumemmi ma âjuutum. Di kuloo'mo Jesus. 31 Ña nakay be ta ammi, âriiŋ nasoh kaŋenaku katawool ma aanenool alhaalo. Ña kâjuutaku di kûcaalh d'oo. Nalhaalo ma agorooriil.
32 Na jaley agam nareenene, di kûkayetum bukanaku kâjuutum di bukaaku ka kumalaku kûjupom be baabu Jesus. 33 Ña bukanaku peh kata êsuka'uyu, di kûkayil bi kujoojenoor ñata di êtingaay yata eluupa'uyu. 34 Jesus nabuunen bukan kameeŋe kâjuutum ûjuutaw wâbutiyoorum, nâcaalhem poop kumal kameeŋe di bukanaku. Be Jesus âwalhoriit kumala'uku kulob mata koo kûmire oo ay.
Jesus nañaaŋen elobay yata Emitay di bâsuk baabu
35 Bûjomaru bîb, too baroŋ di muucen, Jesus nâcaalh tîyaŋ di hânkijahu hata êsukay ma akay be tiŋatu tawaynoorum, âriiŋ ya alhaw Emitay. 36 Simoŋ koo di kupaalool ya kukay tiŋootiŋ ma ya kupaam Jesus. 37 Na kujukoom, di keenool: “Êsukay peh koku ma kupaamem d'aw.” 38 Be Jesus naaniil: “Ukaayaal be bâsukabu bammi ute reeken, ma nki iñaaŋen dô poop elobay yata Emitay, mata moo ma ikaymulom.” 39 Ña ya añaaŋoor di bantaabu poobo bata Gâlileeya ma ya añaaŋen elobay yata Emitay di siluupasu sata kâmebooraku kata jûdewwi, ban poop ya âcaalhen kumalaku di bukanaku.
Jesus nabuunen âynaaw a êtoogoonay esoom
40 Nownu, âynaaw a kâjuutaku kata êtoogoonay kusoom, nakay be ta Jesus ammi, âriiŋ nâtiigen ban naanool: “Ata Emit, nîmire kaan ûkin jaa nooliye ubuunenom.” 41 Ña Jesus nañankiit âynaaw umu noon, nagorool ma aanool: “Nîkine. Ûju!” 42 Ña to kaŋ cab, êtoogoonay di êcaalh, nâju. 43 Na âynaaw umu agam ma akay, Jesus nawaŋool aanool: 44 “Jijaa! Aatuba uloburee'mo an akeel, be ukay be baabu amaaŋenaaw ata Emitay ma nki âyili, ban nuwul ophertaa non ma kûboñaku kata Emitay kuloom, mata ma ûbuyorum ban di yo, ma yîs kaan nûjuwe ban.” 45 Be âynaaw umu nagam nakaye, ña naloloboor kaŋ ma ya añaaŋen mo, poopii Jesus âkint joon anebej di hânkij hakeel hata êsuk, ma bukan kujukool. Ña ya alako tîyaŋ tiŋatu tawaynoorum. Be êsukay ya êcaalhumul binoobin be baabu d'oo.