Jesus nabuunen âynaaw a êtoogoonay esoom
8
Na Jesus awalowulom di hurimbiliŋahu, buyooŋabu bata bukanaku boo ma bûsoolhenewuum d'oo. 2 Ña âynaaw a êtoogoonaya esoom, nâkayil bi âtiigen ñata ta ammi ma aanool: “Ata Emit, ûkin jaa nubuunenom.” 3 Ña Jesus nañuur kaŋenaku ma agorool, ban naanool: “Nîkine, ña ûju!” Ña too kaŋ cab, nâju. 4 Ban Jesus naanool: “Jijaa, aatuba mbi uloo'mo an akeel, be ukay ki ûyis amaaŋenaaw ata Emitay, ban nuwul Emitay opherta non ma kûboñaku kata Moyses kuloom, ma mbi yîs kaan nûjuwe ban.”Jesus nabuunen agorooraaw ata annahaanaw ata esellooraay
5 Na Jesus anebeem di êsukay yata Kâpharnawuŋ, annahaanaw aahu ata esellooraay ata Rooma, nâkayil bi kupam, âriiŋul nakaawoorool 6 ma aanool: “Ata Emit, agorooraaw ûmbaam omu bo di eluupay ma akumemmi âjuut, poopii aaliit agoroor; be omu ma âsonjim noon.” 7 Ña Jesus naanool: “Mbi ikay ki ibuunenool.” 8 Be annahaanaw umu ata esellooraay naanool: “Ata Emit, înje ijoonut ma unebej di eluupay yûmbaam, be uloo'jaa hurim hanor keb, agorooraaw ûmbaam mbi âju. 9 Mata înje nibaje bukaaku kagam yahaanay yûmbaam, be înje poop nibaje esellooraay ka igam annahaanaw atayiil; moo êenuu'jaa aahu: ‘Ukay! Nakay.’ Êenuu'jaa poop aahu: ‘Ûkayil! Nâkayil.’ Agorooraaw ûmbaam poop eenoo'jaa: Uga maa! Naga mo.”
10 Na Jesus ajammi ma aloom umu, nâjanaŋen noon. Ña naan bukanaku ka ya kareboorulom d'oo: “Ma iñaaŋenuul malhegen eenuul, ûde di êsukay yata Israyel, ijukorut an a kâynenaku katawool kurem di kata âynaaw ume. 11 Ma ilobuul eenuul, bukan kameeŋe mbi kûcaalhumul ba jaley âcaalhumewuum, di poop ba alowem, be kâlundaayaku tanor di Abrawoŋ, di Isaki, di Jako, di kâyyaku kata hatiya di emitay; 12 be bukanaku ka mbi kunebejeen di kâyya'uku, mbi kubeti tîyaŋ di emuucenay, ba mbi kulako ma ya kukaaw ma kurum bo kubil.”
13 Ban Jesus naan annahaanaw umu ata esellooraay: “Non ma ûynemmi, ukay nki ujuk non ma uloom.” Ña noo kaŋ, agorooraaw atawool nâju.
Jesus nabuunen bukanaku lhay
14 Ban Jesus nakay be di eluupay yata Pedru, na ârindom, nâtoo'dô iñaaw apañoor Pedru oo ma akumemmi ma âjuutum. 15 Ña Jesus nagorool di kaŋenaku, nâju. Ña nalhaalo ma acookoorool.
16 Na tigam tihepe, ña di kûŋarul bukanaku lhay ka kumalaku kûjupom be baabu Jesus. Be Jesus nalob hurimahu hanor keb, ña kumala'uku peh di kûcaalh, ban nabuunen poop bukan kaaku peh kâjuutum; 17 ma meeli muga non ma añaaŋenaaw ata kûboñaku kata Emitay, aaneyim Isayiyas aloom âanul: “Oo aŋaam hûlaamahu hatoolaal, di poop ûjuutaw watoolaal.”
Bukan kaaku di kûkin kureboor di Jesus
18 Na Jesus ajuum buyooŋabu bata bukanaku ma kuŋoomenoom, ña naan kurebooraaku katawool kûtip be kareb kaaku kata hulhuwahu. 19 Ña âynaaw aahu agam alhikitenaaw ata kûboñaku kata Emitay, nâkayil bi âhugool ma aanool: “Alhikitenaawe, tiŋ kaŋ peh ta ureesem be, mbi isoolheni.” 20 Be Jesus naanool: “Sîtimbaanasu, sibaje usunaw wata so, basuwaabu poop bubaje wûlumaw wata bo, be Añool Ajamaat, abajut palimo tiŋ ta mbi akagoor ma ahepulen.”
21 Ña aahu ata di kurebooraaku katawool naanool: “Ata Emit, uwalhom bo para ma ikay ki îhokul ampawom.” 22 Be Jesus naanool: “Usoolhenom, ma uwaa'bo bukanaku kakeem ma kuhok bukaniil kakeem.”
Jesus naga buhentelaabu ma bulo
23 Na Jesus âjupom di busaanaabu, kurebooraaku katawool poop di kûjupo d'oo. 24 Ña buhentelaabu bâamak di bûtekul, poopii waajeelaaw di ween uhoojen bo; be Jesus oo ma aŋotum. 25 Ña kurebooraaku katawool di kutonkool ma keenool: “Ata Emit, ûmelhenoli! Ûli omu jamuket!” 26 Be Jesus naaniil: “Mata wa ma jîkoliyummi? Miwuul bukanaku ka kâynenaku kuyejutum.” Ban nalhaalo ma âlhus waajeelaaw di buhentelaabu, ña dôo peh di yin jub. 27 Ña buko peh di kûjanaŋen, ña di kêenul: “Kama an bu ume, a mbi alob di buhentelaabu, di poop hulhuwahu, di hujam d'oo?”
Jesus nabuunen kûynaaku egaba ka kumalaku kûjupom
28 Na Jesus ârimmi di kareb kaaku kata hulhuwahu, di bantaabu bata gadarenuwi, kûynaaku egaba ka kumalaku kûjupom di kûcaalhumul di husaahahu, ma kûkayil ki kupam d'oo. Be kûynaa'uku, koo ma kûkoliyenim noon, poopii an asokent ayab buruŋa'ubu. 29 Na kûrillom, di kûŋaaŋulo ma kêenul: “Añool Emit, wa nugawi? Aw ukaylom bi ûlesoli, hukahu hoo bâriiŋorut?”
30 Be too reeken, sikumbaasu soo too ma sihenem. 31 Ña kumala'uku di kulhaw Jesus di kañakat ma keenool: “Ga jaa non ma ucah d'ûli, kama nûgawoli ma unebej di sikumbaa'usu.” 32 Ña Jesus naan ko: “Jikay.” Ña kumala'uku di kûcaalh ma kukay ki kunebej di sikumbaasu. Ña sikumbaa'usu di sitey ma siriiŋen ki silo di hulhuwahu ma sikee'dô. 33 Ña bûtekenaabu bata so, di kutey be di hankahu kûriiŋ di kuñaaŋen mata kûynaa'uku egabaay ka kumalaku kûjupuwemmi. 34 Ña bukanaku peh kâkindom, di kûcaalhul bi kupam di Jesus. Na kujukoom, di kulhawool ma keenool âcaalh di etaamay yatayiil.