Aatuba jiwataten bukan
7
Ban Jesus naaniil joon: “Jeetuba jiwataten bukan, ma aatuba mbi Emitay awatatenuul poop; 2 mata maama jiwatatemmi bukanaku, moomu poop kaŋ ma mbi Emitay ewatatenuul poop. Mata eyuupumay ya jîyuupummi bukanaku, yooyu poop ya mbi jiyuupumi. 3 Kama bu nugawe ma ujuk kahosaku kammi di ñîkilañu ñata atiyi, ujukut jiyaajaju jammi di ñatayi? 4 Kama bu nugawe ma oon atiyi, akobi ma uhoolool kahosaku kammi di ñîkilañu ñatawool, ban aw jiyaajaju joju di ñatayi? 5 Âhooloorawe, ûcaalhen para jiyaajaju jammi di ñikilañu ñatayi, ma mbi ooli ujuk jak ma uhool kahosaku kammi di ñata atiyi.
6 “Aatuba jiwul silhokaasu wahaw wanapaaw, ka mbi sîlhaalowul di sirumuul; aatuba jiga poop peerola ta sikumbaasu semmi, ka mbi siyokos yo.”
Emitay ya ejam kalhawaku
7 “Jilhaw jaa, di kuwuluul; jipaam jaa, di jibaj; jikokongen jaa poop êtingaay, di êbabuli be batawuul. 8 Mata anaw alhawum, mbi awuli; anaw apaamum, mbi abaj; nakokongen êtingaay, mbi êbabuli be batawool. 9 Kama aymoom ata di miwuul, a mbi añoolool alhawool hûmburuwaahu, nawulool huwaaliisahu? 10 Be mante alhawool jaa jiwolaju, nawulool elunay? 11 Kama miwuul jajakutum jeelim jiwul kuñooluul wahaw wajakaaw, be inkiteemo Ampawuul ammi hatiya di emitay, awulem wahaw wajakaaw be bata bukanaku kalhawewoom? 12 Moo, jiga bukanaku non ma miwuul jîkimmi kugawuul, mata kûboñaku kata Emitay, di kata buñaaŋenaabu bata kûboñaku kata yo, mo ma kuloom.”
Uruŋaw ugaba
13 “Jinebej di êtingaay yagogaay, mata yaayu yawuŋaay, yoo buruŋabu bata hûjimenahu hata Emitay; be bukan kameeŋe ya kunebej di yo. 14 Mata êtingaay yagogum, ban di eloob, yoo egam buruŋabu bata eroŋay; be bukanaku kinŋet kajukebom.”
Buyaajabu di muriyaayamu mata bo
15 “Mbi jijaamo buñaaŋenaabu bata kûboñaku kata Emitay kagawutum kalhegenumaayaku, ka mbi kûkayil be baabu di miwuul ma kûhooloor ma kuga non sîgaraniina, be di ûyegetaw watayiil buko siŋiiriŋasu sabujem. 16 Be mbi jimanjiil di bagawerabu batayiil. Kama an naaliye ajooben muriyaayamu mata ûuba di busasag? Be mante muriyaayamu mata phigu di bucalh? 17 Mata buyaaj peh bajakum, ya buwolh muriyaayamu majakum; be baabu bajakutum, ya buwolh muriyaayamu majakutum. 18 Momakiimom buyaaj bajakum beeliit buwolh muriyaay majakut; buyaaj poop bajakut, beeliit buwolh muriyaay majake. 19 Moo, buyaaj peh bâwolhoriitum muriyaay majake, mbi butiji ma bubeti di sambunasu. 20 Momakiimom ma mbi ya jîmanjum bukanaku di bagawerabu batayiil.
21 “Mata ntuwa bukanaku peh kaanewommi: ‘Ata Emit, Ata Emit’, mbi kunebej di kâyyaku kata hatiya di emitay, be kaaku kagawem non ma Ampawom âkimmi, koo mbi kûnebee'dô. 22 Mata di huka'uhu, bukan kameeŋe mbi keenom: ‘Ata Emit, Ata Emit, kama ntuwa ûli ya uloom elobay yatayi? Ntuwa ûli ya ucahum di kumalaku, di kañaaŋaku katayi? Nuga poop miñamu mameeŋe mata sembaasu sata Emitay, di kañaaŋaku katayi?’ 23 Be înje mbi isalheniil ma eeniil: ‘Înje îmirutuul; jîrangiyom, mata miwuul bukanaku kagawem wahaw wajakutaaw.’ ”
Yîinaay egaba kateepum siluupasu
24 “Moo, an peh ajammi elobay yûmbaam, ban naga non ma eloom, oo agam poop non anaw ajaalhom ma ateep eluupay yatawool di kuwaaliisaku. 25 Mata na mbi emitay êlubul, ma uyelenooraaw ûteyil, buhentelaabu poop di bumab yo, be eetukalo, mata ma ejuumenim tiŋatu tagam kuwaaliisaku. 26 Anaw poop ajammi elobay yûmbaam, ban agawut non ma eloom, oo agam poop non anaw ânuutom ma ateep eluupay yatawool di hulhuusahu. 27 Na emitay mbi êlubul, ma uyelenooraaw ûteyil, buhentelaabu poop di bumab yo, di elo ma ekaaño pooyo.”
28 Na Jesus aloom umu, ña êsukay di kujaahali mata balhikitenerabu batawool, 29 mata ma bubaam sembe, ban bunaamoorut di bata bulhikitenaabu bata kûboñaku kata Emitay.