Jesus nalob mata jawatatenooruwaaju
13
Noo, bukan kaaku kalakotom di kûkayil, ma ya kuñaaŋen Jesus mata bukan kaaku kata Gâlileeya ka Pilaatus abuum ko ma kuwaasenem ma hûsimahu hatayiil hûguusoor di hata uncaamaw wa ya kûwaasenummi. 2 Jesus narinkiil aaniil: “Soŋo jeene kûbajumiñaku katayiil kuhaŋe kata bukanaku kata Gâlileeya peh, mawuumom ma kugawumiim umu? 3 Be ma iñaaŋenuul eenuul: Jiwatatenoorowut jaa mata bagawerabu batawuul, mbi jiket non buko. 4 Be pîya bukaaku kaamom kunŋen di hutok di êhaaji ka eliŋay yata Silowe êlowummi ma kuket, soŋo kubaje kûbajumiñ kahammi kata bukanaku kata Jerusaleŋ? 5 Be ma iñaaŋenuul eenuul: Jiwatatenoorowut jaa mata bagawerabu batawuul, mbi jiket non buko.”
Kaliikumaku kata buyaajabu bâwolhoriitum
6 Ña Jesus nagawiil kaliikumaku, ma aaniil: “Baje âynaaw abaam buyaajabu baaneyim phigeera di kâkulaku katawool. Nakay âjikeru'dô muriyaayamu be abajuloot makeel. 7 Ña nâanul awañaaw atawool: ‘Jijaa, gawe ban ujaañaw ûhaaji na âkayewuum kahalaku kata muriyaayamu di buyaaja'ube be îbajoriit makeel, utii'bo! Mata wa mbi bûjuumum ute ebeebel?’ 8 Be awañaaw atawool naanool: Jijaa, uwaa'bo bo para kajaaña'uke, ma mbi îgub bo ban niga dô buseesabu. 9 Ga jaa non mbi buwolh di jak, be buwolhut jaa nutii'bo.”
Jesus namellhen añakanaw di kâsumutaku
10 Jesus oo di eluupay yata kalhawaku, ma alhikitenem di êsukay di hîyyaayahu hata jûdewwi. 11 Añakanaw to a Esatanaay egam kâsumutaku, simitasu kunŋen di hutok di sîhaaji, âaliyoriit arees jak, ya aguurub ma arees. 12 Na Jesus ajukoom, nâwoolool, ma âkayil be kayooŋ. Naanool: “Âliin, mowme mbi imelheni di kâsumutaku kaakim.” 13 Ban naŋar kaŋenaku aga hatiya d'oo, to kaŋ cab nâlhaarulo kaŋ, ma ajuum kaŋ lhûr. Ña añakanaw umu ya asal Emitay.
14 Be, annahaanaw ata eluupa'uyu nabirik, mata mo Jesus abuunemmi di hîyyaayahu hata jûdewwi. Naan êsukay: “Kukaku keemo hutok di hanor ko jeelim jigoroor, di jeeli poop jibuunen, be ntuwa di hîyyaayahu hata jûdewwi.”
15 Jesus nalaañeniil, ma aaniil: “Bûhoolooruwaabe, kama no kaŋ no an di miwuul ahelhut ebe, embaam, di hîyyaayahu hata jûdewwi, ma akay ki awuu'yo ma esiben? 16 Moo, anñaakanaw ume ata di êbajoorumay yata Abrawoŋ oo Esatanaay esoom, simitasu kunŋen, di hutok di sîhaaji, aaliit amellheni di kâsumutaku di hîyyaayahu hata jûdewwi?”
17 Na aloom umu, bukana'uku kammi aatuba abuunen añakanaw huka'uhu, di kuraay. Be êsukay yalakotom di kûririgen, di miñamu majakaamu ma Jesus agam.
Curando no Sábado
Kaliikumaku kata musepeyamu
18 Jesus narinkiil: “Kâyyaku kata Emitay ko kugam poo'non waywoom? Waywoom wa ooliyaam uliikumaal di ko? 19 Nooliyaale uliikumaa'ko non poo'non ekoolay yinŋet yata bûjowayabu, ya âynaaw agiitemmi di kâkulaku, di êcaalhul, di ega jinunukenaju di jikooben, di jiga bununukenabu bâamak poopii, basuwaabu di bûwul dô.”
O Reino de Deus como um Grão de Mostarda
Kaliikumaku kata musisamu
20 Jesus narinkiil joon: “Kâyyaku kata Emitay ko kugam poo'non waywoom? 21 Koo kugam poo'non añakanaw âlewum huruumahu hata siŋaaŋasu. Naga dô jisisaju, di sijamoor peh.” 22 No Jesus oo ma akayem be Jerusaleŋ, ya anajen di sîsukasu, ma alhikiteniil.
Êtingaay yata kâyyaku kata Emitay eloob
23 Anaw narink Jesus: “Ata Emit, bukanaku ka mbi kumellh ketuba kuyej?”
24 Naaniil: “Jiga di sembe ma jinebej di êtingaay yaloobaay, mata ma ilobuul di kaan bukan kameeŋe mbi kûkin ma kunebej be keetubi keeli. 25 Na mbi ata eluupay alhaalo ma abab êtingaay, mbi jilako tîyaŋ ma ya jîkokongen, ma ya jêenul: Ata Emit, ûbabuloli. Oo mbi âanul: Îmirut ba jiwoom. 26 Mbi jêenul: Ulaal ya uriyaam tanor, ban ya ulhikiten bukanaku di sîluulasu sâtooli. 27 Oo mbi âanul: Jîrangiyom, îmirut ba jiwoom, mata miwuul peh bukanaku kagawem kôji. 28 Na mbi jijuk Abrawoŋ, di Isaki, di Jako be di buñaaŋenaabu peh bata elobay yata Emitay, ko dô di kâyyaku kata yo, miwuul ma jibetim tîyaŋ, mbi jikaaw ma ya jirum kubil. 29 Bukanaku mbi kûcaalhumul ba jaleyaw âcaalhumewuum di ba alowem, kaaku di kûcaalhumul baabu be bûneŋabu ba mbi bugawi di kâyyaku kata Emitay. 30 Baje bukanaku kammi ma kunongem kaan ko mbi kuga kûtiyaaraku ma kunebej ta mbi bûneŋa'ubu bugawi, be buko mbi kûyooli. Kaaku ka jemmi koo mbi kûyooli, be koo mbi kuga kûtiyaaraku.”
Jesus nalhooŋooro mata Jerusaleŋ
31 No, kaaku kata di phârisewwi di kûkayil ki keen Jesus: “Ûcaalh ute ma ukay mata Erodis nâkine ma abuji.”
32 Nalaañeniil, aaniil: “Jikay ki jêenul eluna'uyu înje ma âcaalhenem kumalaku kammi di bukanaku, nibuunen bukaaku, jaat be kajom, di hukahu hûhaajutahu niban bugoroorabu. 33 Jake ma irees, ma igoroor jaat, di kajom be tibarekajom, mata añaaŋenaaw ata kûboñaku kata Emitay mumulet bi aketut Jerusaleŋ.
34 “Awo! Awo! Jerusaleŋ! Miwuul jabujem buñaaŋenaabu bata kûboñaku kata Emitay, bukanaku ka Emitay ebollom, di jimabiil poop kuwaaliisaku ma jibujiil! Ñeemo bu ña îkimmi ibolluul tanor, non êkereŋ ebaahene bakiiwabu bata yo, be jîkint. 35 Jijaa, hânkijahu hatawuul mbi hulako to hâa baakut an. Ma ilobuul malhegen kaan, jeetubi jijukurerom be na mbi ya jêenul: Usalaal Añool Ajamaat.”