Jesus nalob mata jâhoolooraju
12
Buyooŋabu bata bukanaku di kûmeboor to poopii ya kuyokosoor, ña Jesus naan kurebooraaku katawool: “Jijaamo jânongikooraju jata phârisewwi jaamom jâhoolooraju. 2 Bajut wahaw wa mbi ubaaheni waatumbi ûbaahuli. Bajut wah wâñoorim, waatumbi ûmiri. 3 Mata wahaw wa jiloom di emuucenay, mbi ujami tutulaaru. Wahaw wa mbi jîñoor ma jiloo'wo dâada di eluupay, mbi ulobi tiŋatu ta an poopool mbi ajam.”Aatuba jîkoli bukan
4 “Kupaalom, neene: Aatuba jîkoli bukanaku kabujem kumuumaku ban keetukaali kuga joon wah wakeel. 5 Mbi îyisuul anaw a mbi jîkoli. Jîkoli Emitay, yaalim ebuj humuumahu ban ebaje sembe ma eraac di sambun sâbaworiit. Yo ya mbi jîkoli. 6 Kama muntisaamu hutok mûnoomumoriiti simpeesa sigaba? Be Emitay êwkent janoojaanor. 7 Palimo walaw wata di kûkuwaku katawuul, Emitay êmire ma weemom. Mawuumom aatuba jîkoli, mata miwuul jihaŋe basuwaabu.”
Mante nûkine ulat Kristu?
8 “Ma iñaaŋenuul di kaan anaw arejum tutaru tata bukanaku di kaan oo arebooraaw ata Añool Ajamaat, oo mbi aanool poop di tutaru tata kumalaakaku kata Emitay di kaan, oo atawool. 9 Be anaw alatom jaa tutaru tata bukanaku înje poop mbi ilatool tutaru tata kumalaakaku kata Emitay.
10 “Yo ya epas kûbajumiñaku ka anaw agam be bata Añool Ajamaat, be êpaseriit kûbajumiñaku ka anaw agam be bata Buynum Bunapaabu.
11 “Na mbi kuŋaruul be di siluupasu sata kalhawaku, mante di kuŋaruul be baabu yahaanay yata êsukay, di kîyyaku, aatuba jinongoor maama mbi jilaañeniil, di maama mbi jilob. 12 Mata Buynumabu bunapaabu mbi bunamulenuu'no maama mbi jilob.”
Âynaaw ânuutuwaaw
13 Di buyooŋa'ubu bata bukanaku, âynaaw nâwool Jesus, ma aanool: “Alhikitenaawe, oonom atiyom acacom di butondaabu bâtooli.” 14 Jesus naanool: “Âynaawe, kama înje igam anaw agawem batalenabu a mbi acacuul butondaabu?” 15 Naan buyooŋa'ubu: “Jiga jak uynumaw watawuul, ma jijaamo kânongikooraku kata kangoŋaaku,a mata kâsuumaayaku kalhegenumaayaku kûbajoriiti mata ma anaw asaanumom.”
16 Ban, nañaaŋeniil kaliikuma'uke ma aaniil: “Âynaaw ajalum butondaabu batawool, nabaj emaanaay huc poopii, eluupay di elit. 17 Naan di hûkowahu hatawool: ‘Înje bu mbi iga? Ma tiŋatu tileem ta mbi iga emaanaay.’ 18 Nanongoor ii, nâanul: ‘Mowme ninamulene bu mbi iga. Mbi iwap eluupay yapiyaay, ban niteep yaayu yahammi. Iban jaa, niga dô emaanaay di miñamu poomo ma ibaam.’ 19 Ña iga jaa umu, neeliye eenuul: ‘Âynaaye, ña nugayluwe. Maame nubaje miñamu mata huriyahu be niŋanu. Ña ûcaalhul kaŋ, nuri ban nuga kerey.’ 20 Be Emitay di yeenool: An bûnuuto, mowme busonnaare mbi uket, ña husaanumahu hatayi, ay mbi aŋaaho?” 21 Ban naaniil: “Momu ma nokoorem be bata anaw anongoorem keb mata husaanumahu, ban agawut jak hûkowahu hatawool di Emitay.”
Hunongoorahu hata Eroŋay
22 Ban naan kurebooraaku katawool: “Moo ma êenumem di miwuul: Aatuba jinongoor wahaw wa mbi jîroŋum di etaamay, non miñ mata huri, non poop miñ mata bulhiimo, 23 mata eroŋay ehaŋe miñamu ma jiriyem, eniilay poop ehaŋe wañaw wa jilhiimuwem. 24 Jijuke, sigaanaraasu sîwañoriit, sîjaloriit, sibajut poop bukag bata muriyaay, be Emitay ya ewuu'so siri. Be inkiteemo miwuul jahammi basuwaabu! 25 Be palimo jinongoor mata miña'umu, aymoom ata di miwuul aalim aga eroŋay yatawool ma ehaŋ mapiyo? 26 Na jiyetutum jiga wahaw winŋet non uwe, mata wa ma miwuul jinongoorumem miñ mata huri di bulhiimo? 27 Jilaso ma ûrumpenaw, ûreepenoriit, ban ûriiroriit poop hugaayoor. Be înje neenuul: Palimo Salomoŋ di husaanumahu hatawool peh aaliit alhiimo jak non wo. 28 Kama ma Emitay elhimenem jak ûrumpenaw wata di bujalabu wa mbi jaat di uroŋ, ban kajom di uboli, be inkiteemo miwuul ja kâynenaku kuyejutum!
29 “Ña aatuba nki jigayenooro ma jîpaamenul wahaw wa mbi jiri, di jisiben. 30 Mata bukanaku kata ube di etaamay ya kupaamen wahaw uwe, kaamom kâmirutum Emitay. Be miwuul jibaje ampawuul âmiim di kaan jîkine wahaw uwe peh. 31 Wahaw wa mbi jipaam para, kâyyaku kata Emitay, ma jiga non ma yo êkimmi. Ban wahaw peh, Emitay mbi ebaŋenuu'wo.
32 “Palimo ma jiyejutum, aatuba jîkoli, mata Emitay êririgene ma jiga bukanaku kata kâyyaku kata yo. 33 Jinoom wahaw wa jibaam ban di jîgiter bancaama'ubu kûsukateenaku. Jiga non ma kaytaku kata Emitay kuloom. Jiga mo jaa, di nokoor poo'non jicookoore sîyaasu saatumbi sikaañowurer, di jibaj husaanumahu haatumbi hubawurer hatiya di emitay, da âkuuta aatumbi ahankurer, bateepa poop beeliitum bukajen. 34 Mata ta husaanumahu hatayi hemmi, to ta êsigiray yatayi poop yemmi.
Agorooraaw ammi ma apooyem
35 “Jibandoor ma jisoh lit bugoroorabu bata Emitay, ma jiga non anaw ânannuworiitum ma ehikitenumay yatawool yetu kahoko. 36 Jiga non bugorooraabu bammi ma bukobem di annahaanaw atayiil a mbi âlaañul bata bûneŋabu bata bûyababu. Akokongenn jaa êtingaay, di kukay cab ki kûbabulool. 37 Bugorooraabu ka mbi annahaanaw atayiil âriiŋul natookiil baŋotut ko ma kubandoorum, kubaje hûpiira. Ma iñaaŋenuul malhegen di kaan annahaanaw umu mbi âririgen, naaniil: jaa, ki jileeho ma igabuul. 38 Palimo âkayil jaa hukaru hii be mante ulhitaaw ûtiyaaraw, âriiŋul jaa natookiil ma kupooyem, kubaje hûpiiraahu hâamak. 39 Jiwolho wahaw uwe: Nokoor jaa non ata eluupay âmiremmi hukahu ha mbi âkuutaaw anebejulool, mbi abandooreen ma apooy ka mbi aŋar wahaw wândom. 40 Moomu poop kaŋ ma mbi jîbandorum, mata Añool Ajamaat hukahu ha mbi âkaymul, mbi huga wûb.”
41 Pedru narinkool, ma aanool: “Ata Emit, kama kaliikuma'uke be bâtooli keb, mante be bata an peh?” 42 Jesus naanool: “Aymoom agam agorooraaw âynenaayaw ban najaalho? Oo aamom anaw a ata bugoroorabu awuum hiŋahu hata eluupay yatawool ma ya awul bugoroora baabu kuri na mbi tîriiŋ tata huriyahu. 43 Agorooraaw umu a mbi ata bugoroorabu âriiŋul natookool ma agoroorem non ma aloboom, nabaje hûpiira. 44 Ma iñaaŋenuul malhegenumaayamu mbi awulool bugoroorabu bata eluupay peh acookoor. 45 Be annahaanaw umu ata bugorooraabu, âanul jaa di hûkowahu hatawool ata bugoroorabu mbi âpiyowul, ña nâcuk ma ya ânagul bugorooraabu ban ya ari, ya ajaken be na mbi âkali, 46 na mbi ata bugoroora'ubu âkayil hukahu ha mbi hugawool wûb ha âmirutum, mbi alesool kaŋ lhînŋa, ban nabomool tanor di kâynentum.
47 “Annahaanaw ata bugorooraabu âmiim miñamu ma ata bugoroorabu âkimmi aga, ban âkinoriit abandoor non ma ata bugoroorabu aloboom, mbi uyab kûnagulaku karem kaŋ noon. 48 Be aahu âmirutum wahaw wa mbi agaween, be nakajen, mbi ayab kûnagulaku kinŋet. Agorooraaw a annahaanaw atawool awuum bugoroor bameeŋe aga, moomu poop kaŋ ma mbi annahaanaw atawool arinkool wah wameeŋe mata bugoroora'ubu.”
Jesus nalob mata kajamoorutaku
49 Jesus nâanul: “Înje ikaylom bi iyaben sambunasu di etaamay, be nîkinenaaliye ma sîluween. 50 Mata baje hûyoojaahu hâkayewuum be baabu d'înje, momawuumom injumu di hûlaamahu be na mbi waha'uwu wa ikaymulom uga. 51 Miwuul jeene pîya înje ikaylom be baabe di etaamay ma iŋalluul kâsuumaayaku? Ma iñaaŋenuul malhegen kaan akayloot ma iŋalluul kâsuumaay, be kajamoorutaku nikaylom di ko. 52 Mata ute be kayooŋ, mbi baj bukanaku hutok di eluupay, be keetubi kujamoor, êhaaji mbi kêemi, egaba poop di kêemi. 53 Mbi baj ampawaayaw di añoolool kaatumbi kujamoor, iñaawaayaw poop di añoolool keetukajamoor, iñaawaayaw keetukajamoor di âsampulool.”
54 Naan poop buyooŋabu: “Na mbi jijuk Emitay ma elaawlom karebaku ka jaley alowem di jêenul: Mbi êlubul. Malhegen di êlubul. 55 Na mbi buhentelaabu bûtekul ba jaley âcaalhumewuum di jêenul: Êhaahay mbi ebaj. Malhegen di ebaj. 56 Bûholuwaabe! Ya jinamulen mata sîmanjumasu sata hatiya di poop sata di etaamay. Mata wa ma jinamulentummi sîmanjumasu sa Emitay egayem di so maame?
57 “Mata wa ma jeeliitum jinongoor ma jiga ma mahammi majak? 58 Na mbi anaw asohi ma akay d'aw be di kâyyaku, nuga ma jitabulhenoor d'oo di buruŋabu, ka mbi aŋari be di âyyaw, âyyaw naŋari be baabu di êpolisiyaay, êpolisiyaay di kugawi di ekullhay. 59 Ma iñaaŋeni di kaan, ootubi ûcaalhurer aw bancaamut peh.”