Jesus najot kumakaaku katawool
10
Ban na Jesus ajotum kumakaaku katawool kunŋen di egabaay, ban nawuliil sembaasu sata jâcaalhenaju jata kumalaku kâjupom bukanaku, di sata jabuunenaju jata kâjuut peh, di poop ûjuutikoor waawu. 2 Kumakaa'uku kunŋen di egabaay koo keemom buke: âtiyaaraw, Simoŋ, aaneyim poop Pedru, di atiyool Andre, di Tiyaagu, di atiyool Joŋ, kaamom kuñool Jebedew; 3 di Philiipi, di Bartolomew, di Tome, di Matews, aamom ayabaaw ata buyuupabu; di Tiyaagu, aamom añool Alphew; di Tadew, 4 di Simoŋ, ata di kaasaaku kâkimmi kuyab etaamay, di poop Judas Iskariyotis, aamom agam ban nanoom Jesus. 5 Ban Jesus naboñ kumakaa'uku kaamom kunŋen di egabaay, ma aaniil: “Aatuba jikay be di bukanaku kagawutum jûdewwi, aatuba jinebej poop di sîsukasu sata samaritaanuyi. 6 Be mbi jikay ki jîpaamul bukanaku kata êsukay yata Israyel kanepum non sîgaraniina. 7 Na mbi jikay, di jiñaaŋeniil jeeniil, kâyyaku kata hatiya di emitay kuhuutulo. 8 Di jibuunen bukanaku kâjuutum, di kaaku ka êtoogoonay esoom, di jilhaalen bukanaku kakeem, di jibuunen poop bukaaku ka kumalaku kûjupom. Be non ma jiyaam bancaamut, moomu poop kaŋ ma mbi jiwul barinkut bancaam. 9 Na mbi jikay, aatuba jiŋarnen bancaam bata ûuru, palimo praata, palimo poop bata kûgebaayaku, jiga di kûkokowumaku katawuul. 10 Aatuba jikay di kumboota, palimo ûjupa ugaba, palimo sikatab, palimo poop huginkum, mata anaw ammi ma agoroorem, najoone ayab wahaw wa mbi ari. 11 Be êsukoosuk, be mante jîsukoosuk da mbi jinebej, di jipaam anaw alhegenumaayaw dâ mbi jiwalen; jibajoo'jaa, di jilako yanŋool be na mbi jîcaalh di êsuka'uyu. 12 Di eluupay da mbi jeen jinebej, di jisaapiil di kâsuumaayaku; 13 moo, bukanaku kata dô, kuga jaa bukanaku kata kâsuumaayaku, kâsuumaaya'uku katawuul, di kulako dô. Be ga jaa non kugawut bukanaku kata kâsuumaayaku, di jikay di kâsuumaayaku katawuul. 14 Be jîriiŋ jaa di eluup yakeel, be mante di êsuk yakeel, ma bukanaku kata dô kuyabutuul, be mente di kulat kutallhenuul, na mbi jeen jîcaa'dô di jihank kaporaku kakotum di ûkandumaw watawuul. 15 Ma ilobuul malhegen eenuul, di hukahu hata batalenabu, Emitay mbi ehaŋ malesiil, haŋ bukanaku kata sîsukasu sata Sodooma di Gomoora.”Hûlaamahu
16 “Moo, jitallhen! Înje ma iboñuul non an aboñe sîgaraniina di tutaru tata siŋiiriŋasu. Moo, mbi jijaalho non silun, di jihep uyinum non ûlaabaŋ. 17 Moo, mbi jijaamo! Mata mbi kusohuul ma kuŋaruul be di kâyyaku kata batalenabu, mbi kûnaguluul poop di siluupasu sata kâmebooraku. 18 Mata mbi kuŋaruul be di yahaanay yata sîsukasu, di poop kîyyaku, ma nki kugawuul batalenabu mata ma jigam kurebooraaku kûmbaam, ma mbi jeeli jilobiil elobay yûmbaam, di jiloo'yo poop bukanaku kagawutum jûdewwi. 19 Be na mbi kukay di miwuul ma nki kugawuul batalenabu, aatuba jinongoor wahaw wa nki jilob, mata na mbi jîriiŋ, Emitay mbi ewuluul hurimahu ha mbi jilob. 20 Mata wahaw wa mbi jilob, weetubi ûcaalhumul di miwuul, be Buynum Bunapaabu bata Ampawuul, mbi buwuluu'wo.
21 “Bukan kaaku, mbi kuga kutiyiil ma kubuji, bukaaku di kuga ma kuñooliil kubuji; kuŋil kaaku di kuga ma simpayiil sibuji. 22 Bukanaku peh mbi kubirik di miwuul mata ma jigam burebooraabu bûmbaam; be anaw ajummi tir, be di hûbanumahu, mbi apak. 23 Be na mbi kuŋomooruul di êsuk yaayu, di jitey be di yaayu; mata ma ilobuul malhegen eenuul, jeetubi jiteyoor sîsukasu peh sata Israyel, Añool Ajamaat oo bârilloot. 24 Mata alekoora, âhaŋoriit alhikitenaaw atawool; palimo poop agoroora, âhaŋoriit annahaanaw atawool. 25 Be jake ma alekooraaw kure di alhikitenaaw atawool, jake poop ma agorooraaw kure di annahaanaw atawool. Moo, kûwoo'jaa ata eluupay kañaaŋaku kata Bêlsebu,a bu mbi kûwool bukan kaaku kândom?”
Anaw a mbi ûkoliyaal
26 “Moo, aatuba jîkoli, mata bajut wah wâñoorim, waatumbi ûmiri. 27 Wahaw wa îñooroorum ma ilobuu'wo, di jiloo'wo way; waawu poop wahirikenim, di jiloo'wo ma an peh ajam. 28 Aatuba jîkoli ajamaat aalim abuj humuumahu keb hata an, ban aaliit abuj yâarooray yatawool. Be jîkoli Emitay yaalim êjimen an, di poop yâarooray yatawool di sambun sâbaworiit. 29 Kama antiisii egaba kûnoomoriiti êdaram yanor? Be anor ata di buko, âketoriit Ampawuul oo bâkint. 30 Benkiteemo miwuul; mata palimo walaw peh wammi di kûkuwaku katawuul, wowu ma upinim. 31 Moo, aatuba jîkoli, mata miwuul jihaŋe antiisii lhay.”
Anaw alatum Jesus
32 “Mata an peh aloom salh kayooŋ di êsukay kaan oo anaw ûmbaam, înje poop mbi ilob ta Ampawom ammi hatiya di emitay kaan oo anaw ûmbaam. 33 Be poop anaw alatom jaa kayooŋ di êsukay, înje poop mbi ilatool kayooŋ di Ampawom ammi hatiya.”
Ntuwa kâsuumaayaku kûreesewuum
34 “Aatuba jêenul înje kâsuumaayaku niŋallom be ube di etaamay; malhegen iŋalloot kâsuumaay, be ejanay niŋallom. 35 Mata înje ikaylom bi iga aŋil îinaaw ma kuwaasoor di ampawool; aahu aaraaw ma kuwaasoor di iñaawool; anñaakanaw poop di kuwaasoor di âsampulool aaraaw. 36 Moo, anoowan bukanaku kata yanŋiil, mbi kuga bûsuumutaabu batawool. 37 Momakiimom anaw âkimmi ampawool, be mante iñaawool haŋ înje, ajoonut aga arebooraaw ûmbaam; anaw âkimmi poop añoolool îinaaw, be mante aaraaw haŋ înje, ajoonut aga arebooraaw ûmbaam. 38 Mata anaw apeenowutum êkrusay yatawool ma asoolhellom, mumulet bi aga arebooraaw ûmbaam. 39 Malhegen anaw âkimmi apakenooro, mbi anep; be anaw âkintum apakenooro mata înje, mbi apak.”
Bugalabu ba mbi uyabaal
40 “Anaw ayaañuwuu'jaa, înje nayaañom; anaw ayaañuwom jaa poop, Ampawom abollommi nayaañom. 41 Mata anaw ayaaño jaa an akeel mata ma anaw umu agam añaaŋenaaw ata kûboñaku kata Emitay, mbi ayab poop bugalabu non añaaŋena ata kûboñaku kata Emitay. Anaw poop ayaañom an mata ma anaw umu agam anaw acolum di Emitay, mbi ayab bugalabu poop non bata anaw acolum di Emitay. 42 Anaw awuum an akeel ata di buke kinŋeta'uke, jimel jâjoobiye jata basiben di jikoopa, mata ma oo agam arebooraaw ûmbaam, malhegen aatubi âbuur kayab bugal.”