Jesus nabuunen âynaaw agam hubapuwooraahu
9
Ña Jesus nâjupo di busaanaabu ma âtip be kareb kaaku, ma akay be di êsukay yatawool. 2 Na ârimbom, kûynaaku kaaku di kûgawul âynaaw agam hubapuwooraahu humboliñaahu ma kuŋallowool. Ña Jesus najuk ma kûynemmi, naan hubapuwooraa'uhu: “Âñum sâkoli, kûbajumiñaku katayi kupasi ban.”3 Be bulhikitenaabu baabu bata kûboñaku kata Emitay kalakotom, di kulob di ûyegetaw watayiil ma kêenul: “Âynaaw ume, omarembeelem di Emitay.” 4 Be Jesus nâmir maama ya kunongum, ña naaniil: “Kama mata wa ma jînongikoorumem di umu di ûyegetaw watawuul? 5 Kama wa uhammi majak, ma eenoom: ‘Kûbajumiñaku katayi kupasi ban’ di maama mbi eeneenool: ‘Ulhaalo ma urees?’ 6 Moo, mbi jîmir kaan Añool ajamaat, nabaje sembe ube di etaamay ma apas kûbajumiñaku kata bukanaku.” Ban naan hubapuwooraa'uhu: “Ulhaalo ma uŋar eleesaay yatayi ma oot be yanŋi.” 7 Ña âynaaw umu nalhaalo ma aat be yanŋool. 8 Be na buyooŋabu bata bukanaku kalakotom kujuum wahaw uwu, ña di kûkoli, ban ya kusal Emitay mata ma ewuum ejamaatay semba'usu.
Jesus nâwool Matews
9 Ban na Jesus agam nâcaa'to, najuk âynaaw aaneyim Matews oo ma aleehom ta kuyuupem, ña naanool: “Usoolhellom.” Ña Matews nalhaalo ma asoolhenool.
10 Na Jesus alakom di eluupay yata Matews ma kuri koo di kurebooraaku katawool, ña buyabaabu bata buyuupabu lhay, di bukan kaaku kâlhapitaaku, di kûkayil ki kutookoo'to ma kuri. 11 Be na phârisewwi kujuum ma Jesus ya kurim di bukana'uku, di kurink kurebooraaku katawool ma keenool: “Kama mata wa ma annahaanaw atawuul ariymem di bukanaku kagawem kûbajumiñaku, di bukaaku kayabem buyuupabu?” 12 Be Jesus najam ma ya kuloom umu, ña naaniil: “Bukanaku kâjum, kujoonut di abuunena, be kaaku kâjuutum, kujoonum d'oo. 13 Moo, jikay ma nki jipaam ma jîmir hârirahu hata wahaw wa Emitay eloom di Baŋiicerabu Bâñoyyaabu yêenul: ‘Wahaw wa îkimmi, ma jiñankiitoor, be ntuwa heenaayahu hata uncaamaw ha jigawem mata înje.’ Mata înje akayloot be bata bukanaku kabajutum kûbajumiñ, be âkayil be bata kata kûbajumiñaku.”
Kurebooraaku kata Joŋ di kurink Jesus mata bawoorabu
14 Ña kurebooraaku kata Joŋ Batista di kûkayil ma kurink Jesus ma keenool: “Kama mata wa ma ûli di phârisewwi ugawem bawoorabu, be burebooraabu batayi bûgaworiit bo?” 15 Be Jesus naaniil: “Kama anaw naali âwoolul bukanaku be bûyababu, bukana'uku di kuga ñânkiiteni, ban âbutuwaaw omu to di buko? Be hukahu hôhareesewuum na mbi kuŋar âbutuwaaw atayiil, ña no na mbi kuga bawoorabu. 16 An âŋaroriit jibey junkul ma abah di wañaw wanooyaaw. Mata uga mo jaa, jibeya'uju mbi jiruusul wañaw uwu, ña tiŋa'utu tabahim di tihaŋ maruusulo. 17 An âgaworiit poop bunuk balele di humboota hata kabaŋ kahallene, mata bunuka'ubu mbi bucacul humbootaa'uhu, ña di bûhipo. Moo, bunuk balele ya agawi di humboota hata kabaŋ hunkul, ña heetukacaculo ma bunukabu bûhipo.”
Jesus nabuunen anñaakanaw, nâlhaalenul poop aŋilaw akeem
18 Na Jesus ya aloom di êsukay, ña annahaanaw ata di eluupay yata kâmebooraku nâriiŋuu'to, ña nakay ki âhug Jesus âriiŋ nâtiigen, ban naanool: “Annahaanaw, înje añoolom nakete mowme, be bila ma ukaya ma nki uga kaŋenaku katayi d'oo ma mbi aroŋ.” 19 Ña Jesus nakay ma kureboor, be kurebooraaku katawool di kukay d'oo. 20 Ña anñaakan aahu agam ujaañaw kunŋen di ugaba di kâjuutaku, ma hûsimahu ya hûcaalhul d'oo, ña nâcaalhul kujeeŋanda Jesus âriiŋ nagor kabeyaku kata bûjupaabu batawool, 21 mata ma ya anongum âanul: “Palimo înje igore keb wañaw watawool, mbi îju.” 22 Be na Jesus âtiiwowulom, najuk anñaakana'umu, ña naanool: “Sâkoli, añoolom kâynenaku katayi kumelheni.” Ña to kaŋ cab, añakanaw umu nâju.
23 Na Jesus ârimmi di eluupay yata annahaanaw umu, ña natook ma bulhiitaabu bata silhiitasu, di êsukay ma kuloom ban palabab, ña Jesus naaniil: 24 “Jîcaalh, âacuu aketut, oo aŋotum!” Ña êsukay ya kûlhuwool. 25 Be na êsukay hûcaalhenim be tîyaŋ, Jesus nasoh kaŋenaku kata âacuu umu, ña nâlhaalowul. 26 Ña wahaw uwu wa Jesus agam, di ewaasoor di etaama'uyu peh.
Jesus nabuunen âynaaw âloboriitum
27 Na Jesus agam nakaye, ña bûpuumaabu egaba di kusoolhenool ma ya kûŋaaŋulo ma keenool: “Añool David, uñankiitoli.” 28 Be na Jesus anebeem di eluupay, ña bûpuumaa'ubu di kukay ki kûhugool, ña Jesus naaniil: “Miwuul jîynene kaan înje neeliye igawuul ma jijuk?” Di keenool: “Aa, Ata Emit.” 29 Ña Jesus nagor kûkilaku katayiil ban naaniil: “Jîju non ma jîynemmi deeno.” 30 Ña kûkilaku katayiil di kûju. Be Jesus naga ban, nâlhusiil ma aaniil: “Jijaa, aatuba jiñaaŋen mo an.” 31 Be na kûcalhom keb, ña di kuyeeŋen mata wahaw wa agam di bantaabu peh bata bo. 32 Na kûynaa'uku kâpuumum kugam kukaye, ña kûynaaku kaaku di kûŋarul âynaaw a kumalaku kûjupom ma kugawool âloboriit. 33 Be na Jesus acahum di kumala'uku, ña âynaaw umu nalob. Ña êsukay di kujaahali, poopii ya kêenul: “No kaŋ noo, jukooruti wah non uwe ûde Israyel!”
34 Be phârisewwi ya kêenul: “Âynaaw umu ya âcaalhen kumalaku di sembaasu sata annahaanaw ata kumalaku.”
Butondaabu buyeje be bujalaabu biŋet
35 Ban Jesus ya areesoor di sîsukasu, di kankaku ma ya alhikiten bukanaku di siluupasu sata kâmebooraku katayiil, ma ya añaaŋen elobay yâsuumaay yata kâyyaku kata Emitay, ban ya abuunen bukanaku kâjuutum ûjuut peh, di poop kaaku kâyijum. 36 Na Jesus ajuum êsukay, ña nañankiitiil lhînŋa, mata koku ma kureesem gûlhagulh non sîgaraniina saakutum âtekena. 37 Ña naan kurebooraaku katawool: “Malhegen butondaabu bûyeme, be bujalaabu buyejut. 38 Moo, jilhaw Ata Emit ata butondaabu ma abolluul bujalaabu be ejalay.”