Jesus nabuunen âynaaw agam hubapuwooraahu
2
Piyowut, Jesus nâlaañul be Kâpharnawuŋ. Ña di mujamoor kaan Jesus omu bo di eluupay. 2 Ña êsukay di ekay êmeboor dô poopii eluupay di elit be kaŋ di buhandabu bata ta êtingaay yemmi. Jesus oo dô ma añaaŋenem di êsukay elobay yata Emitay, 3 kûynaaku ebakiir di kûgawul humboliñaahu âynaaw agam hubapuwooraahu be to. 4 Kûriiŋul kubajut kunebej d'oo be ta Jesus ammi, mata ma êsukay ememmi. Ña di kukay ki kûkabul tiŋatu di bûniigenabu bata eluupa'uyu ban di kûwalenul âynaaw umu di humboliñaahu ta Jesus ammi. 5 Jesus najuk nom ma kûynenoom, naan hubapuwooraa'uhu: “Añoolom, kûbajumiñaku katayi kupasi ban.”6 Yahaan yaayu yata di buŋiicaabu bata kûboñaku kata Emitay kaleehotom, ya kunong di sîsigirasu satayiil ma ya kêenul: 7 “Mata wa âynaaw ume nalob umu? Âgelikoor Emitay! Kama an naaliye apas kûbajumiñ? Ntuwa Emitay keb yeelim ega mo!” 8 Be Jesus nâmir maama ya kunongoorum ña naaniil: “Mata wa ma jinongoorumem di umu? 9 Kama bala een hubapuwooraa'uhe ulhaalo ma uŋar sileesaasu satayi ma oot, haŋut majak ma eenool kûbajumiñaku katayi kupasi ban? 10 Be nîkine îyisuul kaan Añool Ajamaat nibaje sembe ute di etaamay sata japasaju jata kûbajumiñaku.” Ban naan hubapuwooraa'uhu: 11 “Înje eenim ulhaalo ma uŋar sileesaasu satayi ma oot be yanŋi.” 12 Ña nalhaalo to kaŋ cab di êsukay, ma aralh humboliñaahu hatawool ma akay. Bukanaku peh di kujaahali ban ya kusal Emitay ma ya kêenul: “Noo kaŋ noo, ujukorutaal wah noon uwe!”
Jesus nâwool Levi (Matews)
13 Ban Jesus nalaañ joon be di hubeereeraahu hata hulhuwahu hata Gâlileeya, buyooŋabu bata bukanaku ya kukay ki kutookoo'to, ña ya alhikiteniil. 14 Na kugam kokareesem, Jesus najuk Levi aamom añool Alphew oo ma aleehom tiŋatu tata buyuupabu, ña naanool: “Usoolhellom.” Ña Levi nalhaalo ma asoolhenool. 15 Ban Jesus di kurebooraaku katawool, di kuleeho di eluupay yata Levi ma kuri, mata ma bukanaku kumemmi ka ya kareboorum d'oo, ña kayooŋaku kata bûyababu bata buyuupabu di sîkusumasu, di kukay ki kuleeho tanor di buko ma kuri. 16 Bukan kaaku kata di bulhikitenaabu bata kûboñaku kata Emitay, kaamom kata di kaasaaku kata phârisewwi, na kujuum Jesus ma kuriyem dânor di buyabaabu bata buyuupabu di sîkusumasu, di kurink kurebooraaku katawool ma keeniil: “Kama mata wa ma Jesus ariymem dânor di buyabaabu bata buyuupabu di sîkusumasu?” 17 Na Jesus ajammi maama ya kuloom, naaniil: “Bukanaku kâjum kusoholowut abuunena, be kaaku kâjuutum keb kusoholuwoom. Înje ikaymuloot be bata bukanaku kaanem kubajut kûbajumiñ, be kaaku kabaam kûbajumiñ nikaymulom.”
Bukanaku di kurink Jesus mata bawoorabu
18 Haahu na phârisewwi di kurebooraaku kata Joŋ Batista ya kugam bawoorabu, bukan kaaku di kukay ki kurink Jesus ma keenool: “Kama mata wa ma kurebooraaku kata Joŋ, di phârisewwi kugawem bawoorabu; be kurebooraaku katayi kûgaworiit bo?” 19 Be Jesus narinkiil aaniil: “Kama âbutuwaaw âwoolul jaa kupaalool be bûyababu batawool, kupaalool buku jake pîya ma kuleeho to di âbutuwaaw, di kuga no bawoorabu? Malhegen, mumulet bi kuga no bawoorabu! 20 Be mbi kukaku kûriiŋ na mbi kuga kulee'ban tanor di âbutuwaaw, ña mbi kuga no bawoorabu.
21 “Mumulet poop bi an aŋar jibey jata eleesa yunkul âbahum bûjupa buhaan. Mata jibeya'uju junkulaju mbi jiga tiŋatu taruusulom tihaŋ, ña bûjupaa'ubu di bukaaño. 22 Ban poop mumulet bi an aga bunuk balele di humboota huhaan hata kabaŋ. Mata aga mo jaa, mbi bunuka'ubu bulab, humbootaa'uhu di hukaaño. Momakiimom, bunuk balele ya agayi di humboota hunkul hata kabaŋ.”
Jesus oo agam annahaanaw ata hîyyaayahu hata jûdewwi
23 Huk haahu di hîyyaayahu hata jûdewwi, Jesus oo di kurebooraaku katawool di kukacak kalhaakaku kata trîigu.a Na kugam kokareesem, kurebooraaku katawool, ya kupuulh yo kupoopoy kutokoñ. 24 Ña bukan kaaku kata di phârisewwi, di kurink Jesus keenool: “Kama mata wa ma kurebooraaku katayi kugawumem di miñamu malobim di kaan mûñoyñoyi kaga di hîyyaayahu hatoolaal?” 25 Be Jesus nalaañeniil aaniil: “Kama jipisenorut ma jîmir maama David agam koo di kupaalool na bacaarabu busohiim? 26 Nownu na Abiyatar aganom annahaanaw âmakaaw ata bumaaŋenaabu bata Emitay, David nanebej di Eluupay yata Emitay koo di kupaalool ki kutokoñ kûmburuwaaku ka bumaaŋenaabu bata Emitay keb keelim kutokoñ.” 27 Ban naaniil joon: “Hîyyaayahu hatoolaal hûgawumi be bata ejamaatay, be ntuwa ejamaatay yoo êwwenummi mata hîyyaaya'uhe. 28 Moo, Añool Ajamaat oo agam annahaanaw ata hîyyaayahu hatoolaal.”