Jesus nabuunen agorooraaw ata asellooraaw
7
Na Jesus agam nabane miñamu ma ya aloom êsukay, ña nanebej di hânkijahu hata Kâpharnawuŋ. 2 Bo Kâpharnawuŋ annahaanaw aahu ata esellooraay yata Rooma, agorooraaw atawool a aboolaatum noon oo ma âjuutum kaŋ meeŋ, ma ahuut kaket. 3 Na ajammi mata Jesus, naboñ yahaan yaayu yata jûdewwi ma kukay ki kulhawool ma âkayil ki abuunenool agorooraaw atawool. 4 Na kûrimmi, di kulhaw Jesus di kañakat ma ya keenool: “Âynaaw ume najoone ma aaneni. 5 Oo sûmoosuum noon êsukay yatoolaal, ma ujuum nâteepoli eluupay yata kalhawaku kata Emitay.”6 Ña Jesus nakay di buko. Na kugam kuhuute eluupay, âynaaw umu naboñ kupaalool ma aaniil: “Jeenom Ata Emit, aatuba agayenooro ma âanul ânebejul di eluupay yûmbaam, mata igawut an ajake. 7 Momakiimom ijoonut îkayil ta aw ommi, be palimo ulob keb hurim hanor, agorooraaw ûmbaam mbi âju. 8 Mata înje poop bukaaku kuhaŋom kagam yahaanay yûmbaam, be înje poop nibaje esellooraay kammi di kaŋenaku kûmbaam, êenul jaa aahu: ‘Ukay!’ Nakay. Êenul jaa poop aahu: ‘Ûkayil!’ Nâkayil. Agorooraaw ûmbaam eenool jaa: ‘Uga maa!’ Naga mo.”
9 Na Jesus ajammi balobera'ubu, ña nâjanaŋen kaŋ noon. Ña nâtiiwo ajooŋoor di buyooŋabu ka ya kareboorum d'oo ma aaniil: “Ma ilobuul di kaan palimo di êsukay yata Israyel, ijukut kâynen kata an akeel kahahum non kata âynaaw ume.”
10 Na kupaalool ka abommi kulammi kûriiŋ di eluupay, di kutook agorooraaw umu oo ma âjum ban.
Aŋilaw ata âkutuwaataaw ata Nâyiŋ
11 Piyowut, Jesus nakay be êsukay yaaneyim Nâyiŋ koo di kurebooraaku katawool, di kayooŋaku kata bukanaku. 12 Na agam nahuute êtingaay yata hanka'uhu, di kupam di bukanaku ma kûcaalhewuum be huhokahu hata aŋilaw anoraw silh ata âkutuwaataaw. 13 Na Jesus ajukoom, nañankiitool kaŋ noon, be naanool: “Aatuba ukaaw.” 14 Jesus nakay âhug ehuluŋaayay, ban nagor êneegaay. Buku kapeenoyom di kujuum, naanool: “Ampa, înje neeni, ulhaalo.” 15 Ña ehuluŋaayay di êlhaalowul, ban naleeho ma ya alob. Ña Jesus nawulool iñaawool.
16 Ña bukanaku peh di kûkoli, ban ya kusal Emitay, ma ya kêenul: “Añaaŋenaaw âmakaaw ata kûboñaku kata Emitay nalhaalowulo ute d'ulaal, Emitay ekaylo bi eyuugen êsukay yata yo.”
17 Kayelendina'uku kata Jesus di kuwaasoor di bantaabu bata Jûdeya kaŋ peh, be di bâsuk baabu bakotum Jûdeya.
18 Na kurebooraaku kata Joŋ Batista kuñaaŋenoom eloba'uyu, 19 nâcaalhen kurebooraaku katawool egaba ma aboñiil ki kûrinkul Jesus, ma keenool: “Aw anaw a êsukay ekobem d'oo, be mante naroŋ bo?”
20 Na buku egabaay kûrimmi ta Jesus ammi, di keenool: “Joŋ Batista âbollolim naane waa, aw anaw a êsukay ekobem d'oo, be mante naroŋ bo?”
21 No Jesus ma abuunenem di bukanaku lhay kata ûjuutaw, di bukaaku ka kumalaku ya kureboorum di buko, naga poop bûpuumaabu lhay kujuk. 22 Ban naaniil: “Jilaañ ki jiñaaŋen Joŋ maama jijuum, di maama jijammi: Bûpuumaabu bobajukem, kata uyakasaw koku ma kureesem jak, kata êtoogoonay koku ma kujuum, kata kûlhokaku koku ma kujamem, ka kakeem di kulhaalelli, kûsukateenaku ko kajamem elobay yâsuumaay. 23 Bukanaku kâynenommi, ban kuraaytom, kubaje hûpiira!”
Jesus nalob mata Joŋ Batista
24 Na kurebooraaku kata Joŋ kulammi, ña Jesus nalob di buyooŋabu balakotom mata Joŋ, ma aaniil: “Waywoom wa jikayum ki jîjukul di ekinkay? Hunjaamahu ha ehentelaay ya eweenemmi? 25 Waywoom jikayum ki jîjukul? Anaw alhiimom wañaw wajakaaw? Bukanaku kalhiimuwem jak, ban di kulako sûum, ko kemmi di siluupasu sata kîyyaku. 26 Ña jiñaaŋen, wa jikayum ki jîjukul? Malhegen añaaŋenaaw ata kûboñaku kata Emitay jikayum ki jîjukul. Oo kaŋ, be nahaŋe añaaŋena ata kûboñaku kata Emitay. 27 Mata ume oo ma muŋiicim matawool di kaan: ‘Mbi îboñul anaw a mbi ayabi kayooŋ ma acookoor buruŋabu batayi.’ 28 Ma ilobuul malhegen kaan, di bâsukabu peh an akeel alet ahammi Joŋ Batista. Be anaw agam inŋet di kâyyaku kata Emitay, oo ahaŋoom.”
29 Ña bukanaku peh be di buyabaabu bata buyuupabu, kajammi elobay yata Joŋ, di kûynen malhegenumaayamu mata Emitay, di kuyab kâbatismaku di kaŋenaku katawool. 30 Be phârisewwi di bulhikitenaabu bata kûboñaku kata Emitay, di kuhuusul miñamu ma Emitay êkimmi be batayiil, ma kulat kayab kâbatismaku di kaŋenaku kata Joŋ.
31 Ban Jesus narinkiil joon aaniil: “Bukanaku kata jaat bu keenom? Bukan bu kunokoorum di buko? 32 Kuga non balaabu kaleehom di hukulahu, ban ya kûŋaaŋuluwoor ma kêenul: ‘Ûli ûyimpuum ma ulhiituul silhiitasu, be jimagut! Nuyeeŋuul uñaaŋaw wata ñikulañu, jikaawut poop!’ 33 Joŋ Batista nâkayil, di jêenul nabaje amalaw mata ajakenoriit bunuk, âtokoñoriit hûmburuwa. 34 Be Añool Ajamaat nâkayil, nari, nasiben, di jêenul: ‘Ume naŋaame, naraan, ban poop ya areboor di buyabaabu bata buyuupabu di poop kaaku kagawem kûbajumiñaku.’ 35 Be bukanaku kâynemmi di majaalhaamu mata Emitay, kûmire di kaan ûdu malhegenumaayamu.”
Jesus nakay be di eluupay yata Simoŋ
36 Aahu ata di kaasaaku kaaneyim phârisew nâwool Jesus ma nki kuri yanŋool, nanebej ma aleeho ma kuri. 37 Di êsuka'uyu baje añakanaw agam êkusumay,a na âmiim kaan Jesus omu di eluupay yata phârisew umu ma ariyem, nâŋarul jîrungaju jateepumim miñamu maaneyim alabastru jata muheeñamu maseerum noon. 38 Na ârimmi, nâtiigen hûg di ûkandumaw wata Jesus, ma ya akaaw, mukulamu matawool ya musoten ulehetaw wata Jesus, nâbeesum wo walaw watawool, ya âpoonool poop di ûkandumaw, ban ya asaasool muheeña'umu. 39 Ña phârisew umu âwooloom ki kuri yanŋool na ajuum bagawera'ubu, nalob di êsigiray yatawool, ma âanul: “Âynaaw ume agawemmi jaa añaaŋenaaw ata kûboñaku kata Emitay, mbi âmireen maama añakanaw ume agorem d'oo aanom, mata oo êkusumay.”
40 Jesus naanool: “Simoŋ, nibaje hurim ha mbi ilobi.” Naanool: “Alhikitenaawe, uñaaŋenom.”
41 Jesus naanool: “Baje kûynaaku egaba kayaarerum âynaaw acaseniim bancaamabu. Aahu sînjunnaasu êteemeer, aahu sînjunnaasu kunŋen. 42 Ban kubajut maama mbi kuga ma kuncaamool, ña nabonketiil ma awalhii'yo bo. Ña di buko, aymoom a mbi ahaŋ mâkinumool?”
43 Simoŋ naanool: “Di hunongoorahu hûmbaam umu ahammi mayaarerool.” Jesus naanool: “Nulobe jak.” 44 Ban najooŋoor di añakanaw, naan Simoŋ: “Nujuke añakanaw ume? Na inebejulom di eluupay yatayi, uwultom mumel ma ikulhen ûkandumaw wûmbaam, be oo mukulamu matawool nâkulhenummi ûkandumaw wûmbaam, ban nâbeesum wo walaw watawool. 45 Na inebejulom, ûpoonutom, be oo nâpoon ûkandumaw wûmbaam kañakat. 46 Usaasut hûkowahu hûmbaam jîkir, be oo nasaas ûkandumaw wûmbaam muheeñamu maputem sûum. 47 Ma iñaaŋeni di kaan, kûbajumiñaku katawool kamemmi non kupasi ban. Momakiimom ma âkinumommi mâamak. Be anaw añankiitutim meeŋ, bâkinerabu batawool bûyejoriit.”