Jesus âbuntenoriiti
4
Na Jesus alallom di kaalaku kata Jordoŋ, naan huc Buynum Bunapaabu, ña di bukay d'oo be di ekinkay. 2 Ba alakom kukaku bukanaku egaba, Diyaabu ya ebuntenool ma mbi abaj kûbajumiñ. Di kuka'uku pooko oo bariit, ña bacaarabu di busohool.
3 Ña diyaabu di êkayil ki yeenool: “Non ma ugam añool Emit, ôonul ewaaliisa'uyu elaañ ega hûmburuwaahu.” 4 Be Jesus na'yo: “Momu ma muŋiicim di Kaytaku kata Emitay kaan: Ntuwa muriyaay keb muroŋenem ajamaat.”
5 Ban, di eŋarool be tiŋatu hatiya, ma êyisool no kaŋ di hanor ûyyaw wata âmbasuk poopool. 6 Ban di yeenool: “Mbi iwuli kâyyaku kata etaamay pooyo, di majakaamu mata ko, di husaanumahu hata ko, mata koku d'înje, moo neeliye iwu'ko anaw a îkimmi. 7 Moo makiimom, ûtiigen jaa ma ulhawom, mbi iwuli ko pooko.” 8 Be Jesus na'yo: “Momu ma muŋiicim di Kaytaku kata Emitay kaan: Ûtiigen ma ulhaw Ata Emit kaŋ keb, oo kaŋ keb mbi usal.”
9 Ban, di eŋarool be Jerusaleŋ ki egawool hatiya di Eluupay yata Emitay, ban di yeenool: “Non ma ugam Añool Emit, ûbellho be di etaam, ootubi ucoko. 10 Mata momu ma muŋiicim di Kaytaku kata Emitay kaan: Mbi êboñul kumalaakaku kata yo ma kupooyi, 11 ma kusohi di uŋenaw watayiil, ma aatuba ûpungulho.” 12 Be Jesus na'yo: “Momu ma muŋiicim di Kaytaku kata Emitay kaan: ‘Aatuba ûhop Ata Emit.’ ”
13 Na diyaabu ejukutum maama mbi êhop Jesus, di ekay be niŋ naanu.
O Diabo Tenta a Jesus
Jesus nâcuk bugoroorabu batawool Gâlileeya
14 Ña Jesus nalaañ be Gâlileeya di sembaasu sata Buynum Bunapaabu. Kajamaaku katawool di kuwaasoor di sîsukasu peh. 15 Ya alhikiteniil di siluupasu sata kâmebooraku katayiil, be buko poopiil ya kusalool.
16 Na alakom di bantaa'ubu, nakay be di êsukay yatawool Nasare, ta âkoobenummi. Di hîyyaayahu hata jûdewwi, nakay be di eluupay yata kâmebooraku katayiil non ma agawem. Âriiŋ najuum ma apisen elobay yata Emitay. 17 Ña di kuwulool kaytaku ka añaaŋenaaw ata kûboñaku kata Emitay aaneyim Isayiyas. Nâbabuu'ko, najuk tiŋatu taŋiicim ma têenul:
18 “Buynumabu bata Ata Emit bobu d'înje.
Boo bujotommi ma ilob elobay yâsuumaay be bata kûsukateenaku,
19 boo buboñulommi ma iŋar kâsuumaayaku be bata bukanaku kammi di hûlaamahu.
Ma iñaaŋen di kaan bukanaku kammi ma kukulhim, mbi kuhikuli, kaaku kâjukoriitum, mbi kujuk.
Ma imelhen bukaaku kammi ma kuleseyim di buko.
Ma iñaaŋen di kaan, tîriiŋe ma Ata Emit ahikul êsukay yatawool.”
20 Na Jesus apisemmi ban, nababen'ko ban nawuu'ko anaw ata eluupa'uyu ma aleeho. Bukanaku peh kâlakodom di kujikerool kew. 21 Ña Jesus naaniil: “Elobay yata Emitay ya jijammi mowme, jîmire malhegenumaayamu mata yo jaat.”
22 Bukanaku peh kajammi eloba'uyu di kujaahali, ban ya kusalool mata ma baloberabu batawool bûsummi noon. Ña di kêenul: “Kama ume, ntuwa añool Jose?”
23 Be Jesus naaniil: “Manooman mbi jilobom non ma lobeyim, ma jeenom: ‘Abuunenaawe, ubuunenooro.’ Di jeenom poop iga poop ute di êsukay yûmbaam, non ma jijammi ma igalom di êsukay yata Kâpharnawuŋ.” 24 Ban naaniil: “Malhegen ma iñaaŋenuul kaan, añaaŋena ata kûboñaku kata Emitay, âynenoriiti di êsukay yatawool. 25 Malhegenumaayamu, nownu na Emitay elubutum ujaañaw ûhaaji di kulheeŋaku hutok di hanor, bacaarabu di bûlowum êsukay pooyo, noo bûkutuwaataabu boo ûde lhay Israyel nata añaaŋenaaw ata kûboñaku kata Emitay aaneyim Êliyas; 26 be Emitay eboñutool aanen âkutuwaata akeel ata Israyel, be di eboñool be baabu di âkutuwaata aahu ata êsukay yaaneyim Sarepta yata di bantaabu bata Sidoŋ. 27 Non poop nata añaaŋenaaw ata kûboñaku kata Emitay aaneyim Elisew, noo bukan kameeŋe kâjuutum kâjuutaku kata êtoogoonay di êsukay yatoolaal Israyel, be an akeel ata di buko abuunenti, ma Naamaŋ keb ata êsukay yata Siiriya oo ma abuunenim.”
28 Ña bukanaku peh kammi di eluupa'uyu yata kâmebooraku katayiil, na kujammi hurima'uhu, ña di kubirik kaŋ noon. 29 Ña di kulhaalo ma kuharool ma kûcaalh dô tîyaŋ di êsukay, ban di kuŋarool be hatiya di hurimbiliŋahu hata ta êsuka'uyu yemmi, ma nki kuharool be di etaam. 30 Be Jesus nayab tutaru tatayiil ma akay.
Jesus Proclama o Cumprimento das Escrituras
31 Ban nakay be di êsukay yata Kâpharnawuŋ, yammi di bantaabu bata Gâlileeya, ban di hîyaayoohiyaay, ya alhikiten êsukay elobay yata Emitay. 32 Êsukay di kujaahali mata balhikitenerabu batawool, mata ma baloberabu batawool bubaam sembe. 33 Be âynaaw dô di eluupay yata kâmebooraku katayiil a amalaw âlhapitaaw âjupom, nâŋaaŋulo lhînŋa ma âanul: 34 “Aw! Jesus ata Nasare, wa nugayi? Aw ukaylom ma ûbuyoli? Nîmire aw an bu: Aw anaw Anapaaw ata Emitay.”
35 Be Jesus nâlhusool ma aanool: “Upato, ma ûcaalh di âynaaw umu.” Ña amalaw umu natah âynaaw umu di tutaru tata bukanaku, ban nâcaalh bagawutool wah wâkojiye.
36 Ña êsukay peh yalakotom di kûkoli, ña ya kurinkoor ma kêenul: “Kama hurim bu uhe habaam ume sembe? Poopii ya alob di kumalaku di kûcaalh?” 37 Ña êriibiinaay yatawool di ewaasoor di sîsukasu sata bo peh.
38 Ña Jesus nâcaalhul di eluupa'uyu yata kâmebooraku ma akay be di eluupay yata Simoŋ, âriiŋ natook allhol Simoŋ ma âjuutum meeŋ. Ña di kulhawool ma abuunenool. 39 Ña Jesus nâñup ta ammi, ban nâlhus bûjuusaabu ña di bûcaalh, ña añakanaw umu nalhaalo ma acookooriil.
40 Na jaley agam ma ajon, bukanaku peh ka bukaniil kûjuutum ûjuutaw wâbutiyoorum, di kuŋalliil ma nki Jesus alaken uŋenaw watawool di buko ma abuuneniil. Be anoowan a agoom kaŋenaku katawool, nâju. 41 Kumalaku ka ya kâcaam di bukan kaaku ya keenool: “Aw Kristu aamom Aŋilaw ata Emitay!” Be oo ya âlhus ko ma aatuba kuloo'mo, mata kûmire kaan oo Anaw a Emitay yemmi mbi Êboñul.
42 Na titijemmi nakay be tiŋatu tawaynoorum, be êsukay di kupaamool be na kujukoom, ña kûkint kuwalhool ma akay joon. 43 Ña naaniil: “Haŋ majak ma ikay be di kank kaaku, ma nki iñaaŋen bukan kaaku elobay yâsuumaay yata kâyyaku kata Emitay, mata mo ma Emitay eboñumulommi.” 44 Ña ya alhikiteniil elobay yata Emitay di siluupasu sata kâmebooraku sata di bantaabu bata Jûdeya.