Jesus nalat bagawerabu bajakutaabu
7
Huk haahu phârisewwi di bulhikitenaabu baabu bata kûboñaku kata Emitay, kâcaalhumulom Jerusaleŋ di kukay ki kûmeboor ta Jesus ammi. 2 Ña di kujuk kurebooraaku kaaku kata Jesus ma kuriyem bakullhent uŋen non ma kugawem. 3 Mata phârisewwi non poop jûdewwi peh, ya kuga bagawerabu bapiyaabu bata simpayiil. Mata di buko, mumulet bi an ari bakullhent uŋen jak jak. 4 Ma ya kuga, na mbi kêetul husiilaay, mbi kukullhen para uŋenaw, ban di kukulhen miñamu ma kunoomulom, ban nkit di kuri. Di kuga poop bagawer baabu bameeŋe ba kulhikiteniim, non bata kakullhaaku, di bata jakulhenaju jata sîrungasu, di jata siboolasu, di poop jata silalasu.5 Ña phârisewwi buku di bulhikitenaa'ubu bata kûboñaku kata Emitay, di keen Jesus: “Kama mata wa ma kurebooraaku katayi kûgawumoriitum bagawerabu bata simpawolaal? Ma ya kuri bakullhent uŋen?”
6 Jesus nalaañeniil aaniil: “Bûholuwaabe! Malhegen añaaŋenaaw ata elobay yata Emitay aamom Isayiyas, nakooŋe na Emitay ewuloom elobay yata yo, nalob matawuul âanul:
‘Êsuka'uye ya kusalom kasalsal keb
di utumaw watayiil, be sîsigirasu satayiil silet d'înje.
7 Di kûbinken kañaaŋaku kûmbaam ebeebel, mata ya kulhikiten bukanaku bagawerabu bata ejamaatay.’
8 Ya jilat kûboñaku kata Emitay, ma ya jiga mûndeemaanamu mata ejamaatay.”
9 Ban Jesus naaniil joon: “Miwuul jîwosiwosi non ma jigawem ma jilat kûboñaku kata Emitay, ma ya jiga mûndeemaanamu matawuul. 10 Mata Moyses moo naloom âanul: ‘Uga hûkowi jak be bata ampayi di iñaayi.’ Nâanul joon: ‘Anaw âlobikoorum ampawool be mante iñaawool, mbi abuji!’ 11 Be miwuul ya jilhikiten bukanaku ma jeeniil, an abaa'jaa miñ makeel ma mbi awuleen kubajawool, be âanul jaa: ‘Miña'ume korban’ (yaamom miñamu mañuurim be bata Emitay). 12 Ña di jiga anaw umu ma aatuba awuu'mo kubajawool, 13 ma jilat kaga wahaw wa elobay yata Emitay eloom, ma ya jilhikiten bukanaku mûndeemaanamu matawuul, di jiga poop miñ mameeŋe manaamoom di mo.”
Jesus nalob mata miñamu magawem ma êsigiray yata ajamaat esem
14 Ban Jesus nâwool joon buyooŋabu bata bukanaku ma aaniil: “Jitallhen ma jijam miñamu ma mbi ilobuul! 15 Ntuwa miñ mammi tîyaŋ mugayem munebej di ajamaat di muga êsigiray yatawool esem, be maama mâcaalhumewuum d'oo, mugayewoom êsigiray esem. 16 [An abaam ûjaŋay, natallhen.]”
17 Na Jesus âcaam, nawaa'to buyooŋa'ubu ma anebej di eluupay, kurebooraaku katawool di kurinkool mata kaliikuma'uku. 18 Ña naaniil: “Kama miwuul poop jinamulent? Jîmirut kaan miñ ma an ariye meeliit mugawool êsigiray esem. 19 Mata miñ ma an ariye, ânebejeriit di êsigir, be mbi mukay be di eyongay ban di mûcaalh.” Di balobera'ubu, Jesus nâyisiil kaan, miñ peh mata huri, meeliye muriyi.
20 Ban naaniil: “Miñamu mâcalhom di ajamaataw, moo mugayewoom êsigiray esem. 21 Mata di êsigiray yata ajamaat, câalhumewuum kânongikooraku, di hunongahu hata kakumenaku, di hata êkuutay, di hata jaŋaal bukan, 22 di hata kâmooraaku kata di kupañoor bukaaku, di hata jangooŋutenaju, di hata malesamu, di hata macalamu, di hata jâgawikooraju, di hata jâsiibo miñ mata bukan, di hata jasoosen bukan, di hata jagawooruwaaju, di poop hata ehiikubilay. 23 Miña'ume peh majakutum, mâcaalhewuum dâada di êsigiray yata ajamaat, moo mugayewoom êsigiray esem.”
Jesus nabuunen aŋilaw ata añakanaw agawutum jûdew
24 Ban Jesus nâcaa'to, ma akay be di bantaabu bata Tiiru. Na ârimbom, nanebej di eluupay ban âkint ma an âmir kaan oo omu dô, be aaliit âñooruwiil. 25 Anñaakan aahu a añoolool amalaw âjupom, nâjamul mata Jesus. Ña nâkayil âtiigen ñata di ûkandumaw watawool. 26 Añakanaw umu oo agawut jûdew, be ata êsukay yaaneyim Siro-Phenisiya, nalhaw Jesus aanool âcaalhenool amalaw âjupom âjuraw atawool. 27 Be Jesus naanool: “Uwaa'bo para kuŋilaku kata eluupay ma kuri. Mata jakut ma an aŋar miñ mata huri hata kuŋil awul silhokaasu.”
28 Añakanaw umu naanool: “Ata Emit, be silhokaasu poop, ya sijoboor bapoyabu bâlowewuum na mbi balaabu buri.”
29 Ña Jesus naanool: “Ma uloom umu, ña oot. Amalaw nâcaalhe ban di añooli.” 30 Be na añakanaw umu alammi âriiŋ yanŋool, natook âjuraw oo ma akumemmi di elalay, amalaw ma âcaam ban.
Jesus nabuunen âynaaw agam hûlhokahu ban âloboriit jak
31 Ban Jesus nâlaañumul di bantaa'ubu bata Tiiru ma âkayil be di êsukay yaaneyim Sidoŋ, ban nâyabul di bantaabu baaneyim Dekaapoli ma akay be di hulhuwahu hata Gâlileeya. 32 Bukan kaaku di kûŋarul âynaaw agam hûlhokahu ban âloboriit jak, kûriiŋul di kuwaasiyenoor Jesus keenool aga uŋenaw watawool d'oo. 33 Ña Jesus nâcaalhenlool di buyooŋabu, ban naŋar kusinkaaku katawool aga di ûjaŋayaw wata âynaaw umu. Ban naŋar kucuhaku katawool agor di hûlelempahu hata âynaaw umu. 34 Ban nalhag hatiya di emitay, nayiih ham, ban nâanul: “Ephata!” Daamom: “Ûlhookulo!”
35 Ña to kaŋ cab, ûjaŋayaw watawool di ûlhookulo, hûlelempahu hatawool poop di hûlhakulo ma alob kaŋ jak jak. 36 Jesus naaniil poopiil, aatuba kuloburer mo an akeel. Be palimo ma agawem naaniil keetubi kuloo'mo, ña no na kuhaŋem mañaaŋen mo. 37 Êsukay peh ka ya katallhenoom di kujaahali, poopii ya kêenul: “Malhegen âynaaw ume, wah kaŋ peh ya aga wo jak, mata palimo poop bukanaku kagam kûlhokaku ya agayiil kujam, kaaku kâloboriitum jak, nagawiil kulo jak.”