Balhikitenerabu bapiyaabu
15
Ña phârisewwi, di bulhikitenaabu bata kûboñaku kata Emitay, di kûcaalhumul Jerusaleŋ ma kûkayil be baabu Jesus kûriiŋul di kurinkool Keenool: 2 “Kama mata wa ma burebooraabu batayi kuhuusulumem mûndeemaanamu mapiyaamu matoolaal, ma ya kuri bakullhent uŋen?” 3 Be Jesus naaniil: “Kama mata wa ma miwuul jihuusulumem poop kûboñaku kata Emitay ma ya jiga mûndeemaanamu matawuul? 4 Mata Emitay yeene: ‘Mbi ujam di ampayi, koo di iñaayi’ di yêenul poop: ‘Anaw a mbi âñaanikoor ampawool, be mante iñaawool, mbi abuji.’ 5 Be miwuul ya jêenul, anaw âanul jaa ampawool, be mante iñaawool: Wahaw wa mbi iwuleeni, mbi iwuu'wo opherta be bata Ata Emit. 6 Ña anaw umu joonut ban ma awuu'wo kubajawool. Ña di jirembeel kûboñaku kata Emitay, ma jisoh mûndeemaanamu matawuul. 7 Bûhoolooraabe! Isayiyas nakooŋe na aloom matawuul ma âanul:8 Êsuka'uye ya kusalom
di utum utum, be ûyegetaw watayiil ulee d'înje.
9 Ya kûbinkenom ebeebel,
mata ya kulhikiten bukanaku kûboñaku kata ejamaatay non kûboñaku kûmbaam.”
10 Ban Jesus nâwoolul buyooŋa'ubu bata bukanaku kûriiŋul naaniil: “Jitallhen ma mbi jinamulen; 11 ntuwa wahaw wanebejem di butumabu, ugawem an abaj kûbajumiñ, be waawu wâcaalhumewuudom ugawewoom abaj kûbajumiñ.”
12 Ña kurebooraaku katawool di kûhugool ma keenool: “Annahaanaw, nûmire kaan phârisewwi ma kujammi eloba'uye, koku ma kubirikum?” 13 Be Jesus naaniil: “Buyaaj kaŋ peh, ba Ampawom ammi hatiya agiitentum, mbi burooci. 14 Moo, jiwalhii'bo mata buko buniiwaabu bâpuumaabu. Kama anaw âpuumum areesunen jaa apaalool âpuumum, keetukalo di husunahu?”
15 Ña Pedru naanool: “Ûnamulenoli kaliikumaku ka ulobulom jaat mata ko.” 16 Ña naaniil: “Kama miwuul poop jinamulenorut? 17 Kama jîmirut kaan wahaw wanebejem di butumabu, ya ukay be di eyongay, ban di ûcaalhul be tîyaŋ? 18 Be wahaw wâcaalhewuum di butumabu, ya ûkayumul di êsigiray, wowagawem an abaj kûbajumiñ. 19 Mata di êsigiray yata anaw, dô da câalhumewuum kânongikooraku, di jabuj bukan, di kâmooraaku, di jaga êkusum, di êkuutay, di macalamu, di poop jâlobikoor bukan. 20 Moo, wahaw uwu ugawem an abaj kûbajumiñ. Be huriyahu bakullhent uŋen, hûgaworiit an abaj kûbajumiñ.”
Añakanaw agam amaasooraaw
21 Ban Jesus nâcaalh tiŋa'utu, ma akay be di bantaabu bata êsukay yata Tiiru, di Sidoŋ. 22 Ña anñaakanaw agam kananew ata di bantaa'ubu nâkayil ki atoo'to Jesus âriiŋul nâŋaaŋulo ma aanool: “Ata Emit, añool David, uñankiitom; añoolom amalaw omu ma âjupuwoom, ma agawool âjuut lhînŋa.” 23 Be Jesus alobut d'oo. Ña kurebooraaku katawool di kukay ki kûhugool ma keenool: “Oon añakanaw umu akay, mata oo ma asoolhenem d'ulaal ma ya alilimenolaal.” 24 Be Jesus oo naan anñaakanaw umu: “Înje ibolli keb be bata sîgaraniinaasu sanepum sata Israyel.” 25 Be añakanaw umu nakay ki âtiigen ta ammi ma aanool: “Ata Emit, uñankiit oonenom!” 26 Be Jesus naanool: “Jakut ma uŋar wahaw wa kuñooli mbi kuri uwul balhokaabu.” 27 Ña anñaakanaw umu naanool: “Ata Emit, malhegen. Be balhokaabu poop ya bujoboor bapoyabu bâlowewuum di bukanaku kakiisom.” 28 Ña Jesus naanool: “Añakanaye, aw nûynene meeŋ, moo mbi ga non ma ûkimmi.” Ña di ewooraa'uyu, añoolool nâju.
Jesus nawul bukanaku kârimmi sînjunnaasu sibakiir kuri
29 Ban Jesus nâcaalh tiŋa'utu ma akay be ñata di hulhuwahu hata Gâlileeya, âriiŋ naŋool di hurimbiliŋahu ma aleeho dô. 30 Ña buyooŋabu bata bukanaku di kûŋarul bukanaku kâyijum di kata uyakasaw, di kaaku kâloboriitum, di poop bukan kaaku lhay, kûriiŋ di kugawiil ta Jesus ammi. Be Jesus nabuuneniil. 31 Ña êsukay di kujaahali mata ma kujuum ma bukanaku kâyijum kûjum, kaaku kâloboriitum ma ya kuloom, kaaku kagam uyakasaw ma ya kureesum, kaaku kâpuumum ma ya kujuum. Ña di kusal Emitay yata Israyel.
Jesus nawul joon buyooŋabu bata bukanaku kuri
32 Be Jesus nâwool kurebooraaku katawool ma aaniil: “Înje niñankiite buyooŋa'ube bata bukanaku, mata gawe ban jaat kukaku kûhaaji na kemmi ute d'înje, babajut wah wata huri. Moo, îkint igawiil ma keet bariit, mata keeli ki kulaapo di buruŋabu.” 33 Be kurebooraaku katawool di kurinkool keenool: “Ûtey ta mbi ûcalhumulaal di kûmburuwaaku ute tawaynoorum ume, bi uwulaal buyooŋa'ube kuri ma kupooñ?” 34 Ña Jesus narinkiil aaniil: “Kama kûmburuwaaku keemo bu ka jibaam?” Di keenool: “Nubaje kûmburuwaaku hutok di kugaba, di poop muwolamu minŋet.” 35 Ña Jesus naan buyooŋa'ubu bata bukanaku kuleeho di etaam. 36 Ban naŋar kûmburuwaa'uku, di muwola'umu ma asal Emitay, ban natij awul kurebooraaku katawool ma kuwul êsukay. 37 Ña êsukay peh di kutokoñ kûmburuwaa'uku, di muwola'umu be kaŋ na kupommi. Ban kurebooraaku katawool di kujoojen bâmonkabu bata kûmburuwaaku bakatunom, di kumeeŋen sîkutasu seemo hutok di sigaba. 38 Be yîinaay katokommi kûmburuwaa'uku, keemo sînjunnaasu sibakiir (4.000), bapinut yaaraay di balaabu. 39 Ña na Jesus agam buyooŋa'ubu bata bukanaku ma keet, ban nâjupo di busaanaabu ma akay be di bantaabu bata Magdala.a