Eketay yata Joŋ Batista
14
Nownu Erodis oo ma aganom âyyaw ata Gâlileeya, najam mata êriibiinaay yata Jesus. 2 Ña naan bugorooraabu batawool: “Ume, Joŋ Batista alhaalowulom di kuketaaku, momakiimom nâbajum semba'usu sa âgawmem di miñamu mata sembaasu sata Emitay.” 3 Mata Erodis, oo abiim bi asoh Joŋ ma agenkool ban nakullhool, hurim Erodiyas aamom apañoor Philiipi agam atiyool. 4 Mata Joŋ ya aanoom: “Di kûboñaku katoolaal ñônñoy bi uyab apañoor atiyi.” 5 Ña Erodis nâkin ma abujool. Be nâkoli êsukay, mata ma kûynemmi kaan Joŋ añaaŋenaaw ata kûboñaku kata Emitay. 6 Be na hukahu hûrimmi ha Erodis agawem kajaañ hata na abajim, ña âjuraw aamom añool Erodiyas, namag kayooŋ di êsukay, ña Erodis di sûumool kaŋ noon. 7 Ña nanuur ma aan âjuraw umu, mbi awulool wahoowah wa mbi alhawool. 8 Be âjuraw umu, mata ma iñaawool aloboom mata wahaw wa mbi alhawool, ña naanool: “Uwulom hûkuwahu hata Joŋ Batista di jiraataaju.” 9 Ña âyyaw di hâahool noon, be mata ma anuurum ban, ban poop mata ma bukanaku ka âwollom kentom, ña nâanul kuwulloo'ho. 10 Ña naboñ be di ekullhay ki kûtijul hûkuwahu hata Joŋ Batista, 11 ban di kûgawuu'ho di jiraataaju ki kuwul âjuraw, ña naŋaa'ho awul iñaawool. 12 Ña kurebooraaku kata Joŋ Batista, di kuŋar ehuluŋaayay ki kuhok, ban di kukay ki kuñaaŋen mo Jesus.Jesus nawul buyooŋabu bata bukanaku kuri
13 Be na Jesus ajammi mata eketay yata Joŋ Batista, ña nâcaa'to ma akay di busaanaabu ki alako tiŋ taatu tawaynoorum. Be na êsukay êmiimom, di kûcaalhumul di sîsukasu ma kuyab butiyaabu ma kurees ma kusoolhenool. 14 Na awalowlom di busaanaabu, najuk buyooŋabu bata bukanaku, nañankiit, ña nabuunen bukaaku kalakotom kâjuutum. 15 Na tigam tihepe, kurebooraaku katawool di kukay ki keenool: “Ute tiwaynoore, ban too ta tijon. Moo, oon êsukay keet be di kankaku ki kunoom miñ kuri.” 16 Be Jesus naaniil: “Joonut ma keet; miwuul jiwuliil kuri.” 17 Be di keenool: “Ûli ubajut ute wah, be kûmburuwaaku hutok keb nubaam, di muwolamu mugaba.” 18 Ña Jesus naaniil: “Jiwulom mo ute.” 19 Ban naan êsukay kuleeho di mahosamu; ban nasoh kûmburuwaa'uku, di muwolamu, ban nalhag hatiya ma asal Emitay. Ban natijer ko awul kurebooraaku katawool ma kûgiiter êsukay. 20 Ña bukanaku peh kalakotom di kuri poopii di kupooñ. Ña kurebooraaku katawool, di kûmeb bâmonkabu baŋañunom, di kumeeŋen sîkutasu kunŋen di sigaba (12). 21 Bukanaku katokonkom, keeli kûriiŋ yîinaay sînjunnaasu hutok (5.000), bapinut yaaraay, di balaabu.
Jesus narees di mumelamu
22 Ban naan kurebooraaku katawool, kûjupo di busaanaabu ma kuyabool kayooŋ ma kûtip be kareb kaaku; ban oo nalako to ma ya aan êsukay keet. 23 Na agam nagawe êsukay ma keet, ban naŋool di hurimbiliŋahu ma awaynoor diyoonool ma alhaw Emitay be kaŋ busonnaaru. 24 Be nownu, busaanaabu boo ma bûrimmi ban tutaru tata hulhuwahu, waajeelaaw woo ma ûnagulem di bo mata ma ehentelaay ya etekulom êjooŋoorul di bo. 25 Ña urabaw, Jesus narees di mumelamu ma nki atoo'bo kurebooraaku katawool. 26 Be na kurebooraaku katawool kujukoom ma âreesewuum di mumelamu, ña di kûkoli ma kêenul: “Âpurapuraw!” Ña di kûŋaaŋulo lhînŋa mata ma kûkolim. 27 Ña nownu kaŋ, Jesus naaniil: “Sâkoli! Înje kaŋ. Aatuba jîkoli.” 28 Ña Pedru naanool: “Ata Emit, ga jaa non aw kaŋ, nugawom ma îreesul di mumelamu ma nki upama.” 29 Ña Jesus naanool: “Bila.” Ña Pedru nâwalowul di busaanaabu ma arees di mumelamu ma nki kupam d'oo. 30 Be na ajuum ehentelaay ma etekulom di sembe, ña nâkoli, ña nâcuk ma amer. Ña nâruuren ma ânuul: “Ata Emit, umelhenom!” 31 Ña too kaŋ cab, Jesus nañuurool kaŋenaku ma asohool, ban naanool: “Âynaaye, aw kâynenaku katayi kuyejut! Mata wa numantir?” 32 Ña na kugam kûjupuwe di busaanaabu, ña ehentelaay di ewalh. 33 Ña bukanaku kalakom di busaanaabu di kûbinkenool ma keenool: “Malhegen aw Añool Emitay.”
Jesus nabuunen bukanaku Jenesare
34 Ban na kugam kûtipe be kareb kaaku, ña di kûriiŋ di bantaabu bata Jenesare. 35 Be na bukanaku kata bo kumanjoom, ña di kuboñ be di bâsukabu peh bata bo. Ña di kuŋallool bukanaku peh kâjuutum. 36 Ban ya kulhawool ma keenool awalhiil ma kugor palimo kabeyaku kata bulhiimaabu batawool. Ña bukanaku peh kagoroom di kûju.