Jesus kayooŋ Pilaatus
23
Ña yahaanay hîm di kulhaalo ma kukay di Jesus be baabu Pilaatus. 2 Kûriiŋ di kusoosenool ma kêenul: “Âynaaw ume ûli utookoom oo ma agawem di êsukay yatoolaal gûlhagulh, ma ya âanul keetubi kuyuup âyyaw âmakaaw ata Rooma, naane oo poop Kristu, a mbi aga âyyaw.” 3 Pilaatus narinkool: “Kama aw âyyaw ata jûdewwi?” Jesus naanool: “Aw uloomom.”4 Pilaatus naan yahaanay yata bumaaŋenaabu bata Emitay, di buyooŋa'ubu: “Ijukut kûbajumiñ di âynaaw ume.” 5 Be di kenken ma ya kêenul: “Âynaaw ume ya âguulh êsukay di maama alhikitenem bukanaku di bantaabu bata Jûdeya hîm, ma âcukumulom kaŋ di bantaabu bata Gâlileeya be kaŋ ute.”
6 Na Pilaatus ajammi na kûwoom Gâlileeya, narinkiil: “Kama âynaaw ume ata Gâlileeya?” 7 Be na âmiim di kaan Jesus oo anaw ata bantaabu bata âyyaw aaneyim Erodis, ban kuka'uku oo boo Jerusaleŋ, naaniil kuŋarool be baabu d'oo.
Jesus é Levado a Pilatos
Jesus di kuŋarool be baabu di Erodis
8 Na Erodis ajukoom, nâririgen mâamak mata piyuwe na âkimmi ajukool, mata najame matawool. Oo ma akobeenem ma mbi Jesus aga êmanjum yakeel. 9 Narink Jesus wah wameeŋe, be Jesus alaañentool kaŋ kuur. 10 Yahaanay yata bumaaŋenaabu bata Emitay, koo di bulhikitenaabu bata kûboñaku kata Emitay di kujaŋen ma ya kusoosenool. 11 Erodis di esellooraay yatawool di kurembeelool ma ya kurinenool, di kûjupenool baanaabu, ban di kulaañenool be baabu Pilaatus. 12 Di huka'uhu Pilaatus koo di Erodis di kujamoor, mata nownu kûsuumoorent.
Jesus é Levado a Herodes
Jesus di kugawool batalenabu
13 Pilaatus nâmeb êsukay peh, di yahaanay yata bumaaŋenaabu bata Emitay, be di yahaanay yata êsukay, 14 ma aaniil: “Miwuul jiŋallom âynaaw ume ma jeenom oo agam êsukay gûlhagulh, be nînihuloorool miwuul too, ijukut wah wâkojiye wa jiloom wa agam. 15 Ban Palimo poop Erodis, ajukut makeel d'oo, mo ma alaañenumolaawoom. Agawut wah wâriiŋe be eket. 16 Moo, mbi ilesool, ban niwalhenool.”
17 Di kajaañoojaañ di kâlundaayaku kata Paaskuwa, Pilaatus ya awalhelliil an aahu akullhim. 18 Ña buyooŋa'ubu kaŋ peh di kûŋaaŋulo ma kêenul: “Ubujool! Ûwalhelloli Barabaas!” 19 Barabaas akullhim mata ma âguulhum êsukay, ban nabuj anaw.
20 Pilaatus nalaañ alob di buko, mata ma âkimmi awalhen Jesus. 21 Be di kulaañenool ma ya kûŋaaŋulo ma keenool: “Uriiŋool di êkrusay! Uriiŋool di êkrusay!” 22 Pilaatus narinkiil joon di hûhaajutahu: “Miñ bu ma kôjiye nagawe? Ijukut makeel d'oo mâriiŋe be eket. Be mbi ilesool, ban niwalhenool.”
23 Be ya kenken ma ya kûŋaaŋulo di sembe ma kêenul, mbi ariiŋi di êkrusay, be kaŋ na kuhaatom. 24 Pilaatus najikee'to nâanul mbi aga non ma kulhawoom. 25 Ña nawalhelliil umu akullhim aamom âguulhum êsukay, ban nabuj anaw. Ña nawuliil Jesus non ma kûkimmi.
Jesus é Condenado
Jesus oo di buruŋabu be eketay
26 Koo ma kukayem d'oo, di kupam di âynaaw aaneyim Simoŋ, ata êsukay yaaneyim Sîreeni, oo ma âcaalhumulom butat. Di kusohool, ban di kugawool araaj êkrusay ma asoolhen Jesus. 27 Buyooŋabu bata bukanaku ko ma kusoolhenem d'oo, be di yaaraay yaayu ka ya kakaawum ma ya kulhooŋooro mata Jesus. 28 Jesus nâtiiwo ma ajooŋoor di yaaraa'uyu ma aaniil: “Yaaraaye, miwuul jata Jerusaleŋ, aatuba jikaawom. Jikaaworo, di jikaaw poop kuñooluul, 29 mata kukaku mbi kûriiŋ na mbi êsukay kêenul: Yaaraay kaakutum kuŋil, di kajamutum huhaane, di poop karaahentum kuŋil kubaje hûpiira. 30 Di kuka'uku mbi ya kêenul: Kurimbiliŋake, jîlowumuloli. Mbi kêenul poop: Barimbiliŋabe, jîlhinkoli. 31 Mata kules jaa înje jabajutum kûbajumiñ, jagam non buyaaj bajoobe, benkiteemo miwuul jagam poo'non uyaajaw walhaalhaaw?”
Jesus Carrega Sua Cruz
Jesus oo di êkrusay
32 Di kuŋar poop kûynaaku egaba kaamom kâlhapitaaku ma nki kubujiil tanor di Jesus. 33 Na kugam kûriiŋe tiŋatu taaneyim Esenday yata hûkuwahu, ña di kuriiŋ to Jesus koo di kûlhapitaa'uku, aahu di kuriiŋool karebaku kûriraku, aahu di kumayaku. 34 Ña Jesus nâanul: “Ampoom, ubonketiil mata kûmirut maama kugawem di mo.” Di kuga anaw di buko a mbi âŋarum wañaw watawool.
Jesus é Crucificado
Aposta dos Soldados pelas Roupas de Jesus
35 Êsukay too ma kujikerem. Yahaanay yata êsukay ya kurinenool ma kêenul: “Inja bukaaku namellhemmi, amellhenooro poop ga jaa non oo Kristu, a Emitay ejotum.”
36 Esellooraay poop ya kurinenool, ban di kukay be ta ammi ma kuwulool bunukabu bahiraabu, 37 ma ya keenool: “Ga jaa non aw âyyaw ata jûdewwi, numellhenooro.” 38 Ban hatiya di êkrusay, di kuŋiic dô: “UME ÂYYAW ATA JÛDEWWI.”
A Placa na Cruz
39 Aahu poop ata di bûlhapitaa'ubu ya agel Jesus ban ya arinkool aanool: “Kama aw ntuwa Kristu? Umelhenooro, ban nûmelhenoli poop!” 40 Be aahu nacecenool ma aanool: “Aw ûkoliit Emitay? Kokalesem d'aw non oo. 41 Mata ula jake ma kulesem d'ula mata ma ugawam wahaw wajakutaaw, be âynaaw ume agawut miñ makojuwe.” 42 Ban naan Jesus: “Na mbi ûkayil ma uga âyyaw, nuwolhuwom.” 43 Jesus naanool: “Ma iñaaŋeni malhegen di kaan, jaat mbi ulakuwa tanor hatiya di emitay.”
Condenados Crucificados
Jesus naket di êkrusay
44 Na jaley agam ma ajuumen, ña di muucen kaŋ mib di etaamay kaŋ peh be kaŋ na ewooraay êhaajutay yata baheperabu êrimmi. 45 Hûridaahu hata di Eluupay yata Emitay, di hûruusulowumul hatiya be di etaam. 46 Jesus nâŋaaŋulo lhînŋa ma âanul: “Ampoom, niwalene yâarooray yûmbaam di uŋenaw watayi.” Ña na aloom umu, ban ña naket.
47 Ña annahaanaw ata kayooŋaku kata esellooraay alakotom ma apooy, na ajuum wahaw wagam, nasal Emitay ma âanul: “Malhegen âynaaw ume anaw alhegenumaayaw.” 48 Buyooŋabu poop bata bukanaku bâmeboortom ma kujuk ma mbi kûriiŋ Jesus na kujuum wahaw wagam, di kubaatulenoor ma kulaañ be sanŋiil. 49 Be bukanaku poopiil kâmiim Jesus di kujuum râagi, di yaaraay kareboorulom d'oo Gâlileeya ma ya kujiker wahaw wa ya kugawoom.
Morte de Jesus
Jesus nahoki
50 Nownu âynaaw aaneyim Jose, ata di kaasaaku kata hulhanahu hata jûdewwi, oo anaw alhegenumaayaw, agawem wahaw wajakaaw. 51 Mo oo ata Arimateeya di êsukay yata Jûdewwi, be âamiyoorut di kupaalool mata wahaw wa kuloom be bata Jesus, di wahaw wa kugawoom, mata oo anaw ammi ma akobem di kâyyaku kata Emitay. 52 Na Jesus agam nakete di êkrusay, Jose nakay atoo'to Pilaatus ma alhawool ehuluŋaayay yatawool. 53 Ña nawalellool di êkrusay ma alhimenool kâmiisaaku, ban nagawool di êluŋay yawokim di huwaaliisahu hâamak ta an ahokorutim. 54 Ña di ga hukahu hata kabandooraku ma mbi titijen kajom, di ga hîyyaayahu hata jûdewwi.
55 Yaaraay kareboorulom di Jesus Gâlileeya, di kusoolhen Jose be di êluŋay ma kujuk maama ehuluŋaayay yatawool ehokim. 56 Ña di kulaañ be saŋiil ki kubandoor mûkiramu, di muheeñamu. Hata kajom di hîyyaayahu hata jûdewwi, di kuhepulen non ma kûboñaku kata yo kuloom.
Jesus é Sepultado