Jesus di kûkayetumool be baabu Pilaatus
15
Na jaley atitijemmi, yahaanay yata bumaaŋenaabu bata Emitay, di yahaanay yata jûdewwi, di bulhikitenaabu bata kûboñaku kata Emitay, di yahaanay yata êsukay, di kûmeboor ma kutabulhenoor maama mbi kuga. Ña di kugenk Jesus ban di kukay d'oo be baabu Pilaatus. 2 Pilaatus narinkool aanool: “Kama aw âyyaw ata jûdewwi?” Jesus nalaañenool aanool: “Aw uloomom.”3 Ña yahaanay yata bumaaŋenaabu bata Emitay ya kusoosen Jesus di wah wameeŋe. 4 Pilaatus nalaañ arinkool joon: “Kama ootukalob? Inja nujame non ma kulobem d'aw!” 5 Be Jesus alaañentool makeel, ña Pilaatus nâjanaŋen noon.
Yahaanay di kêenul Jesus mbi abuji
6 Di mûndeemaanamu matayiil, di kukaku kata kâlundaayaku kata Paaskuwa âyyaw ya awalhen an anor aamom a êsukay kulhawoom ata bukanaku kakulhim. 7 Nownu, âynaaw aaneyim Barabaas oo di ekullhay koo di kupaalool, kakulhim mata ma kubuum bukanaku nata na êsukay egam bûgagaroorabu di yahaanay yammi di kâyyaku. 8 Ña êsukay di kûkayil ma ya kulhaw Pilaatus ma awalhelliil an anor akullhim non ma gaweyim. 9 Ña Pilaatus narinkiil aaniil: “Miwuul jîkine iwalhelluul âyyaw ata jûdewwi?” 10 Be Pilaatus ma âmiim kaan yahaana'uyu, mata ma kûsiibuwikoorum Jesus, momakiimom ma kuŋarumuloom ki kuwulool.
11 Be yahaana'uyu yata bumaaŋenaabu bata Emitay di kusullen êsukay ma kulhaw Pilaatus ma awalhelliil Barabaas ma awaa'bo Jesus. 12 Ña Pilaatus narinkiil joon aaniil: “Kama wa jîkimmi iga âynaaw ume a jeenem oo âyyaw ata jûdewwi?” 13 Ña êsukay di kûŋaaŋulo ma ya kêenul: “Uriiŋool di êkrusay!” 14 Be Pilaatus narinkiil joon aaniil: “Kama wa nagawe wâkojim?” Ña di kuhaŋ ma âŋaaŋulo ma ya kêenul: “Uriiŋool di êkrusay!” 15 Be ma Pilaatus âkimmi ma êsukay êririgen d'oo, ña nawalheliil Barabaas, ban naga esellooraay ma kûnagul Jesus, ban nawuliiwool ma nki kuriiŋool di êkrusay.
Esellooraay di kurinen Jesus
16 Ña esellooraay di kûkayetum Jesus be di ekaakay yata dâada di kâyyaku, ban di kûwoolul esellooraay peh. 17 Ban di kûjupen Jesus baanaabu, ban di kucookoor poop ênkuuhaay yata undiiŋaw kûnkuhenool. 18 Ban ya kusaapool ma ya keenool: “Âyyaw ata jûdewwi nusaapi?” 19 Ban di kuŋar hunjaamahu ma ya kukebool, di kucuhenool poop, ban ya kûhooloor ma kûtiigen ma ya kûbinkenool. 20 Na kurinenoom ban, di kûjupulool bulhiimaa'ubu bâyemaabu ma kûjupenool batawool, ban nkit di kûkayetumool be tîyaŋ ma nki kuriiŋool di êkrusay.
Esellooraay di kûkayetum Jesus ki kuriiŋ di êkrusay
21 Koo ma kureesem, di kupam di âynaaw aaneyim Simoŋ ata êsukay yaaneyim Sîreeni, aamom ampaw Alesandri koo di Ruuphu, oo ma âtumewuum butat, ña di kugawool di sembe ma apeeno êkrusay. 22 Ña di kûkayetum Jesus be tiŋatu taaneyim Golgota, yaamom tiŋatu tata kusendaku. 23 Na kûrintom di kuwulool ajaken bunukabu bâguusoorim di miñamu maaneyim miira be nalat kajaken. 24 Ña di kuriiŋool di êkrusay, ban di kuŋar bûjupaabu batawool ma kuga êtukay ma mbi kûmir anaw a mbi âŋarum bo.
25 Nownu na kuriiŋum Jesus di êkrusay, jaley ma âhaahulom ban. 26 Ban hatiya di êkrusa'uyu, di kuŋiic di jitaaguwaaju kurimaku ka kusoosenoom kawuumom di kubujumool, kurima'uku kaamom uke: “ÂYYAW ATA JÛDEWWI” 27 Di kuriiŋ to poop di sîkrusasu bûkuutaabu egaba, aahu kaŋen kûrir, aahu kaŋen kumay. 28 [Ma coohen non ma elobay yata Emitay eloom kaan: “Napinoori di bûlhapitaabu.”]
29 Êsukay ka ya kâhuluntom, ya kuga ŋâk ŋâk ma ya kûgelikoorool ban ya kêenul: “Iyoo! Inja aw ommi nooliye uwap Eluupay yata Emitay ban di kukaku kûhaaji nuteep yo no di ebawo! 30 Ña umelhenooro ma ûwalowul di êkrusay!”
31 Yahaanay poop yata bumaaŋenaabu bata Emitay, di buŋiicaabu bata kûboñaku kata Moyses ya kurinenool ma ya kêenul: “Ooliit umelhenooro, înje kaaku numelhemmi! 32 Aw jagam Mesiyas aamom âyyaw ata Israyel, ûwalowul di êkrusay ma ûli mbi ûynen.” Bukana'uku poop ka kuriiŋoorum di êkrusay tanor di Jesus ya kugelool.
Eketay yata Jesus
33 Na jaley agam nâjuume, ña di muucen kaŋ mib be kaŋ na ewooraay êhaajutay yata baheperabu êrimmi. 34 Na ewooraa'uyu êrimmi, Jesus nâŋaaŋulo lhînŋa ma âanul: “Êloyi Êloyi lama sabaktani?” Daamom: “Emitay yûmbaam, Emitay yûmbaam, mata wa nulatom?” 35 Ña bukan kaaku kalakotom, na kajammi ma aloom umu di kêenul: “Jitallhen! Oma âwoolem di Êliyas.” 36 Âynaaw aahu natey ki âbojenul jiponsaju di bunukabu bahiraabu, ban naga jo di hunjaamahu ma nañuur jo di butumabu bata Jesus ma agawool ajaken, ban nâanul: “Jikob ma mbi ujukaal mante Êliyas mbi âkayil awalellool di êkrusay!” 37 Ña Jesus nâruuren lhînŋa ban naket.
38 Na akeem hûridaahu hata di Eluupay yata Emitay, di hûruusulowumul hatiya be di etaam. 39 Ña annahaanaw ata kaasaaku kaaku kata esellooraay yata Rooma alakotom ta Jesus ammi ma ariiŋim di êkrusay, najuk maama akeem deeno nâanul: “Malhegen âynaaw ume Aŋilaw ata Emitay!”
40 Kuñaakan kaaku poop kalakotom ma kujuum râagi ma ya kûŋandenul Jesus, koo keemom buke: Mariya Madalena, di Salome, di Mariya aamom iñaaw Jose di Tiyaagu âtitaw. 41 Yaaraa'uyu koo ya kurebooremmi di Jesus nalakom Gâlileeya ma ya kucookoorool, di poop yaaraay yaayu kalakotom kareboorlom d'oo be Jerusaleŋ.
Huhokahu hata Jesus
42 Na jaley agam narendene, naamom na êsukay ebandoorem be hîyyaayahu hata jûdewwi. 43 Ña Jose ata êsukay yaaneyim Arimateeya, ban naga anaw âamak ata di Kaasaaku kata hulhanahu hata êsukay, aamom poop anaw a ya akoom hukahu ha mbi Emitay ega bukanaku di kâyyaku kata yo, nasoh bûyegetabu batawool ma akay ki kûcuuk di Pilaatus ma aanool añankiitool ma awulool ehuluŋaayay yata Jesus ahok. 44 Na Pilaatus âmiim kaan Jesus nakete, nâjanaŋen, ña nâwoolul annahaanaw ata kaasaaku kaaku kata esellooraay yata Rooma, ma arinkool mante nâketaaliye. 45 Na annahaanaw umu añaaŋenoom ban, ña Pilaatus nawul Jose buruŋ ma aali âkayetum ehuluŋaayay. 46 Ña Jose nâwalenul ehuluŋaayay, ban nalhiimen yo kâmiisaaku ka anoomulom, ban nakay di yo ki ahok di êluŋay yawokim di hurimbiliŋahu hata bawaalisabu, ban nâkikilen huwaaliisahu hâamak ma abab êtingaay yata yo. 47 Be Mariya Madalena, di Mariya iñaaw Jose koo too ma kujikerem ta Jesus ahokim.