Jesus di kusohool
18
Na Jesus alhawum Emitay ban, di kûtip jaalaju jata Sedroŋ koo di kurebooraaku katawool ma kukay be kareb kaaku ta etoolay yemmi, kûriiŋ di kûleeŋo'dô. 2 Be Judas a mbi aŋoon Jesus, nâmire etoola'uyu, mata too ta Jesus kukayem kuk kameeŋe ki kûmeboor koo di kurebooraaku katawool. 3 Ña Judas nakay di kayooŋaku kata esellooraay, di poop di bukan kaaku kapooyem eluupay yata Emitay ka yahaanay yata bumaaŋenaabu bata Emitay, di phârisewwi kuwuloom, ma kûkayil di sihikitenumasu, di kusoyaku, di wañaw be to di etoola'uyu. 4 Be ma Jesus âmiim wahaw wa mbi kugawool, ña nakay ki kupam ma arinkiil aaniil: “Kama ay jipaamem d'oo?”5 Di keenool: “Jesus ata Nasare.” Ña Jesus naaniil: “Înje ume.” Be Judas anoomoom, oo too di buko. 6 Be na Jesus aaniim: Înje ume, di kulaañ kujeeŋanda, ban di kulo di etaam. 7 Ña narinkiil joon aaniil: “Jeene ay jipaamem d'oo.” Di keenool: “Jesus ata Nasare.” 8 Jesus naaniil: “Neenuu'ban înje ume. Ga jaa non înje jipaamem d'înje, ña jiwaa'bo buke ma kukay.”
9 Jesus ma aloom umu, ma mbi ga non ma aloom âanul bukanaku ka ampawool awuloom an akeel ata di buko aneput.a 10 Be Simoŋ Pedru oo too di kajaasiyaaku. Ña nâlhiimuluu'ko ma alhib kâjaŋayaku kûriraku kata agorooraaw ata annahaanaw âmakaaw ata bumaaŋenaabu bata Emitay aaneyim Malku, natii'ko.
11 Be Jesus naan Pedru: “Ulhiimen kajaasiyaaku katayi. Kama eetubi isiben di jikoopaajub jata hûlaamahu ja Ampawom awulommi?”
Jesus di kuŋarool be baabu Anaas
12 Ña esellooraay, di annahaanaw atayiil, di poop bupooyaabu bata jûdewwi, di kusoh Jesus, ban di kugenkool. 13 Ban di kusing kuŋarool be baabu Anaas, mata ma agam allhol Kayphaas aganom annahaanaw âmakaaw ata bumaaŋenaabu bata Emitay kajaaña'uku. 14 Oo Kayphaas, oo ma abiim bi alob yahaanay yata jûdewwi aaniil, haŋ majak ma an anor aket mata êsukay.c
15 Ña Simoŋ Pedru, koo di arebooraaw aahud ata Jesus, ya kusoolhenool. Be mata ma arebooraaw umu kûmiroorum di annahaanaw âmakaaw ata bumaaŋenaabu bata Emitay, ña di kunebej koo di Jesus di hukaakahu hata eluupay yata amaaŋenaaw umu. 16 Ña Pedru nalako ube tîyaŋ di êtingaay. Be arebooraaw umu a kûmiroorum di annahaanaw âmakaaw ata bumaaŋenaabu bata Emitay, nâcaalhul ma alhaw añakanaw apooyem êtingaay ma aga Pedru ma aleeŋo. 17 Ban añakanaw umu narink Pedru ma aanool: “Kama aw poop ntuwa ata di kurebooraaku kata âynaaw umu?” Be Pedru naanool: “Iyiy, înje igawut arebooraaw atawool.”
18 Be ma jôobinom, ña bugorooraabu, di bupooyaabu kalakotom di kuyaben ma kûlhumbo. Pedru poop nalako to di buko ma ya kûlhumbo.
Anaas narink Jesus
19 Ña annahaanaw âmakaaw ata bumaaŋenaabu bata Emitay, narink Jesus kurebooraaku katawool, di poop mata wahaw wa alhikitenem êsukay. 20 Be Jesus naanool: “Înje nilooloom way êsukay peh, ma ya ilhikiteniil di siluupasu satayiil sata kâmebooraku, di poop Eluupay yata Emitay da jûdewwi kûmeboorem bâñoorowut. 21 Mata wa ma ûrinkumem d'înje? Urink bukanaku kajammi maama ilhikiteniim. Mata buko kûmire wahaw wa iloom.”
22 Na Jesus aloom umu, apooyaaw aahu alakotom namabool kamiñaku di karaabaku, ban naanool: “Mo ma mbi ulob annahaanaw ata bumaaŋenaabu bata Emitay?” 23 Be Jesus naanool: “Ga jaa non nîlobikoorool, nûyisom maama îlobikoorum; be ga jaa non malhegenumaayamu niloom, moo mata wa numabom?” 24 Ña ban, Anaas naboñ Jesus di bagenkerabu, be baabu Kayphaas aganom annahaanaw âmakaaw ata bumaaŋenaabu bata Emitay.
Pedru nalat Jesus joon
25 Be Simoŋ Pedru oo too ma âlhumbuwem, di keenool: “Aw poop arebooraaw ata Jesus?” Be Pedru naaniil: “Iyiy, înje igawut arebooraaw atawool.” 26 Agorooraaw ata annahaanaw âmakaaw ata bumaaŋenaabu bata Emitay, a kukiloorum di âynaaw a Pedru atiim kâjaŋayaku, naanool: “Kama înje ijukuti di etoolay miwuul d'oo?” 27 Be Simoŋ Pedru, nalat joon. Ña nownu kalhitaaku di kulhit.
Jesus di kuŋarool be baabu Pilaatus
28 Ban di kûcaalh di Jesus di eluupay yata Kayphaas bûjomaru bîb ma kukay d'oo be di kâyyaku. Be na kûrimmi, kuleeŋowut di kâyyaku ka mbi kusikooro,e ma mbi keeli kuri kâlundaayaku kata Paaskuwa. 29 Ña Pilaatus nâcaalhul be tîyaŋ, âriiŋul naaniil: “Kama âynaaw ume wa nagawe wakiim di jiŋarumulool be ute?” 30 Be di keenool: “Ga jaa non âynaaw ume agawent an âlhapite, ootubi uŋarelliwool.”
31 Ña Pilaatus naaniil: “Jilaañ d'oo ma ki jigawool batalenabu non ma kûboñaku katawuul kuloom.” Be jûdewwi di keenool: “Ûli ñôñoyi kabuj an.” 32 Wahaw uwe uga, ma mbi ga non ma Jesus abiim bi alob mata eketay ya mbi aket.f
33 Ban Pilaatus naleeŋo joon di kâyyaku, ban nâwool Jesus ma arinkool aanool: “Kama aw âyyaw ata jûdewwi?” 34 Be Jesus naanool: “Ma urinkommi ume, aw unongumom kaŋ? Be mante bukanaku kulobim mata înje?” 35 Be Pilaatus naanool: “Kama înje jûdew nigam? Êsukay yatayi, di yahaanay yata bumaaŋenaabu bata Emitay, kuŋallim ki kuwulom. Kama wa nugam?”
36 Be Jesus naanool: “Înje kâyyaku kûmbaam, ntuwa kata ube di etaamay. Gaween jaa non kata ube di etaamay, burebooraabu bûmbaam, mbi kutiikeen mata înje, ma jûdewwi keetubi kusohellom. Be magam kâyyaku kûmbaam ntuwa kata ube, momakiimom.”
37 Ña Pilaatus narinkool aanool: “Kama aw âyyaw?” Be Jesus naanool: “Aw uloomom ôonul înje âyyaw. Mata momakiimom ma îwwummi, ban poop mo ma ikaymulom be ube di etaamay, ma mbi eeli ilob êsukay malhegenumaayamu. Moo, an peh agam anaw alhegenumaayaw, mbi ajam hurimahu hûmbaam.”
38 Pilaatus naanool: “Waywoom wagam malhegenumaayamu?” Ña na aloom umu ban, nalaañ ki aan êsukay: “Înje ijukut kûbajumiñ di âynaaw ume. 39 Magam di mûndeemaanamu matawuul, di kâlundaayaku kata Paaskuwa, ya iwalhelluul an anor akullhim. Moo, jîkine iwalhelluul âyyaw ata jûdewwi?”
40 Ña êsukay di kûŋaaŋulo ma ya kêenul: “Ûli ûkint Jesus! Barabaas nûkimmi.” Ban Barabaas oo anaw âlhapitaaw.