Jesus nalhaw Emitay mata kurebooraaku katawool
17
Na Jesus alobiim umu, ban nalhag ma alhaw Emitay ma aan yo: “Ampoom, tîriiŋe; ûyyen Añooli, ma mbi oo poop âyyeni. 2 Mata aw uwuloom sembaasu ma ahaŋ an peh, ma mbi aali awul eroŋ yâbaworiit bukanaku peh ka uwuloom. 3 Eroŋa'uyu yâbaworiitaay yoo yeemom uye: Ma bukanaku mbi kûmiri aw janoraw keb, jagam Emitay elhegenumaayay; di poop Jesus Kristu aamom a ubollom. 4 Mata înje nigawi ban êriibiinaay di etaama'uye; mata nîwuñene bugoroorabu ba awulommi iga. 5 Moo, Ampoom ugawom êriibiinaay too d'aw, yaamom ya ibajemmi noo d'aw bala etaamay êwweni.6 “Bukanaku kata di etaama'uye ka uwulommi, nîyisii'ban matayi; mata katayi, ban nuwulomiil, di kuyab hurimahu hatayi. 7 Moo, mowme buko kûmire ban kaan, wahaw peh wa uwulommi d'aw ûcaalhumulom, 8 mata na ilobiim elobay ya uwulommi, di kuyaa'yo; ban kûmire jak kaan d'aw nîcaalhumulom, ban poop kûynene kaan aw ubollommi. 9 Moo, înje nilhawi be bata bukana'uke ka uwulommi, mata aw ukiliim, be ilhawut be bata bukanaku kata di etaama'uye. 10 Mata wahaw peh wa ikiim watayi; watayi poop wûmbaam, mata matayiil nîyyenumim. 11 Mata înje eetubi ilako ute di etaamay, mata ma îkayil bi itooki dô. Be buko koku ube di etaamay. Moo, Ampoom anapaaw, bukana'uke ka uwulommi upooyomiil di sembaasu sata kañaaŋaku katayi, ma mbi kuga anaw anoraw non ma ula ugawam anaw anoraw. 12 Mata na ilakom ube di etaamay di buko, nipooyipooyiim di sembaasu sata kañaaŋaku katayi. Malhegen buko ka uwulommi, nipooyipooyiim, an akeel di buko aneput, be anor keb anepum a mbi anepeen, ma ga non ma Baŋiicerabu buloom matawool. 13 Be înje ma îkayil bi îtooki dô, be iñaaŋen wahaw uwe di etaamay, ma mbi êsuumaay yûmbaam egawiil kûririgen noon. 14 Be ma iwuliim elobay yatayi, momakiimom ma bukanaku kata di etaamay sûumutiim buko, mata ma buko kuwolhutum di etaamay non ma înje poop îwolhutudom. 15 Moo, înje ilhawuti ma ûcaalheniil di etaama'uye, be ma upooyiil mata sembaasu sata majakutaamu. 16 Mata buko ntuwa di etaamay kuwoom, non ma înje poop îwolhutudom. 17 Ugawiil ma kuga bukanaku kanapaaku di malhegen, mata elobay yatayi, elobay yalhegenumaayay. 18 Mata non ma ubollommi be ube di etaamay, moomu poop kaŋ ma înje iboñiim be âmbasuk peh. 19 Momakiimom ma iwulumim eroŋay yûmbaam pooyo matayiil, ma buko poop mbi kuga bukanaku katayi di malhegen.
20 “Moo, ilhawut be batayiil keb, be be bata poop bukan kaaku ka mbi kûynenom mata elobay ya mbi kuñaaŋeniil, 21 ma mbi kuga anaw anoraw, non ma aw jagam Ampawom ommi d'înje, înje poop nêemi d'aw; ma buko poop mbi kuga anaw anoraw d'ula, ma mbi bukanaku kammi di etaamay kûynen kaan malhegen aw ubollommi. 22 Mata niwulii'ban êriibiinaay ya uwulommi, ma mbi kuga anaw anoraw non ma ula ugawam an anor. 23 Ma înje mbi êemi di buko, aw poop nôomi d'înje, ma mbi keeli kusohoor jak di malhegen, ma bukanaku kammi di etaamay mbi kûmir kaan aw ubollommi, ban nûkiniil non ma ûkinommi. 24 Ampoom, nîkine ma bukanaku ka uwulommi kulako tanor d'înje, ma tiŋootiŋ ta ikayum di kujuk êriibiinaay yûmbaam ya uwulommi, mata ma ûkinommi bala etaamay êwweni. 25 Ampoom, aw jagam anaw alhegenumaayaw, malhegen bukanaku kammi di etaamay kûmiruti, be înje nîmiri; buke poop kûmire kaan aw ubollommi. 26 Mata înje igawiim ma kûmiri; be mbi igawiil ma kuhaŋ mâmiri, ma bâkinerabu ba ûkinommi, bulako di buko, înje poop nilako di buko.”