16
Ban Jesus naaniil joon: “Înje ilobuul wahaw uwe, ma aatuba mbi kâynenaku katawuul kuweg. 2 Mata mbi kucah di miwuul di siluupasu sata kâmebooraku katawuul; ban hukahu hôhareesewuum ha mbi anaw abujuul ban, mbi âanul omagawem di bugoroorabu bata Emitay. 3 Mbi kugawuu'mo mata ma kûmirutolim ûli di Ampawom. 4 Moo, iñaaŋenuul mata wo ma mbi huka'uhu hûriiŋ, mbi jiwolho kaan nilobeenuu'mo ban. Be iñaaŋentuu'wo kata kaŋ niŋanu, mata noo ulaal baroŋaal tanor.Bugoroorabu bata Buynum Bunapaabu
5 “Be mowme ma ikay be baabu di anaw abollommi; be an akeel ata di miwuul, aatubi arinkom ba ikayem be. 6 Be mata ma iñaaŋenuum wahaw uwe, sîsigirasu satawuul silee'ma sîsummi. 7 Be ma ilobuul malhegen eenuul, haŋ majak ma înje ikay, mata ikayit jaa, Aanenaaw aatubi âkayil; be ikay jaa, nibolluwool. 8 Mata na mbi oo âkayil, mbi ahaat âmbasuk peh ma kunamulen mata kûbajumiñaku, di mata wahaw wacolum, di poop mata batalenabu ba Emitay mbi ega êsukay. 9 Malhegen oo mbi anamuleniil mata kûbajumiñaku, mata kûynentom; 10 nanamuleniil poop mata wahaw wacolum, mata înje mbi ikay be baabu di Ampawom, ban jeetubi jijukom joon. 11 Ban poop oo mbi anamuleniil mata batalenabu bata Emitay, mata annahaanaw ata etaama'uye, natahi ban. 12 Be nibaje para wahaw lhay wa mbi ilobuul, be jeetubi jeeli jiyetoor di wo maame. 13 Be na mbi Buynumabu balhegenumaayabu bûkayil, mbi bucolenuul wahaw walhegenumaayaw, mata beetubi bulob mata bo, be mbi bulob mata wahaw wa bujammi, ban mbi buñaaŋenuul mata wahaw wâreesewuum. 14 Boo mbi buga ma isali, mata mbi bûŋarul elobay yûmbaam, ban di buñaaŋenuu'yo. 15 Mata wahaw peh wa Ampawom abaam, wûmbaam; momakiimom ma eenumuum, mbi Buynumabu balhegenumaayabu bûŋarul elobay yûmbaam, ban di buñaaŋenuu'yo.”
Hûlaamahu di kâsuumaayaku
16 Ban Jesus naaniil joon: “Leetubi piyo jeetukajukom, leetubi piyo poop di jijukom joon.” 17 Ña kurebooraaku kaaku katawool di kurinkoor ma kêenul: “Wa nâkimmi alobolaal, ma aanem di mo: Leetubi piyo, ootukajukaalool; ban leetubi piyo poop, nujukaalool joon? Wa naloom umu mammi mbi akay be baabu di Ampawool? 18 Wa naloom umu poop mammi: ‘Leetubi piyo’? Unamulentaal wahaw wa alobem di wo.”
19 Be ma Jesus âmiim kaan kûkine kurinkool, ña naaniil: “Miwuul marinkoorem mata elobay ya ilobuum eenuul: Leetubi piyo jeetukajukom, leetubi piyo poop di jijukom joon? 20 Ma isalhenuul eenuul, mbi jikaaw ma jilhooŋooro, be bukanaku kata di etaama'uye, mbi kûririgen. Malhegen mbi jilhooŋooro, be balhooŋooruwerabu batawuul, mbi bulaañ buga êsuumaay. 21 Anñaakanaw na mbi hukahu hatawool hûriiŋ, naga ñânkiiteni, be na mbi âcaalhul di aŋilaw, nâwuken hûlaamahu ha âlaamum, mata ma ajuum aŋilaw a âcallhom d'oo. 22 Moomu poop kaŋ ma miwuul jemmi ma jigam, mata mowme miwumu ma jilhooŋooruwem, be mbi ilaañ joon ijukuul; mbi jîririgen noon, ban hûririgena'uhu an aatubi aali âcaalhen ho di miwuul. 23 Na mbi huka'uhu hûriiŋ, jeetubi jirinkom makeel. Be ma isalhenuul eenuul, wahaw peh wa jilhawum Ampawom di kañaaŋaku kûmbaam, mbi awuluu'wo. 24 Be, be maame jilhaworut wah wakeel di kañaaŋaku kûmbaam. Mata jilhaw jaa, mbi jibaj, ma mbi jeeli jîririgen jak.”
Etaamay yoyu di uŋenaw wata Jesus
25 Ban Jesus naaniil joon: “Wahaw uwe wa ilobuum, ilobumuu'wo kaliikumaku, be hukahu mbi hûriiŋ ha eetubi ilobuul joon wah di kaliikum, be mbi ilobuul salh mata Ampawom. 26 Di kuka'uku di kañaaŋaku kûmbaam mbi jilhaw. Be ntuwa mbi ilhaw Ampawom matawuul. 27 Malhegen Ampawom nâkinuul, mata ma miwuul poop jîkinommi, momakiimom ma jîynenummi kaan d'oo nîcaalhumulom. 28 Malhegen baabu di Ampawom nîcaalhumulom ma îkayil be ube di etaamay, ban mbi iwaa'yo bo ma ilaañ be baabu d'oo.”
29 Ña kurebooraaku katawool di keenool: “Mowme aw malobem salh, mata ulee'ban nûlobum kaliikum. 30 Mata mowme ûli nunamulene kaan aw nûmire wah peh, moo nki joonut ma an arinki makeel. Momakiimom ma ûli ûynenummi kaan aw di Emitay nûcaalhumulom.”
31 Ña Jesus narinkiil aaniil: “Ña nkit jîynene? 32 Hukahu huhuute, be hûriiŋe, na mbi jiwaasoor poopuul ma anoowan aat be yanŋool, ma jiwalhom bo diyoonom. Be eetubi ilako diyoonom, mata Ampawom omu d'înje. 33 Wahaw uwe ilobuu'wo, ma mbi jeeli jibaj kâsuumaayaku mata înje. Mata di etaama'uye mbi jîlaam, be jîwaayen mata înje nihaate ban etaamay.”