Buyaajabu bata ûuba di saanasu sata bo
15
“Ban naan êsukay, înje, înje igam buyaajabu balhegenumaayabu baaneyim ûuba, Ampawom naga awañaaw. 2 Moo, saanasu peh sammi d'înje sâwolhoriitum mbi Ampawom atii'so, saasu sawolhen na âkump so ma mbi sihaŋ mawolh. 3 Be miwuul jisete ban mata elobay ya iñaaŋenuum, 4 mata miwumu d'înje, înje poop, înje umu di miwuul. Non ma yaan âwolhoriitum yoo balet di buyaaj, moomu poop kaŋ ma jeeliitum jiwolh miwuul balet d'înje.5 “Înje buyaajabu bata ûuba, miwuul saanasu. Moo, anaw ammi d'înje, înje poop mbi êemi d'oo ban mbi awolh muriyaayamu huc, mata an aaliit aga makeel înje baanentool. 6 Anaw aleem d'înje mbi abeti non yaan ma alhaal ban di kuŋaa'yo kuga di sambunasu ma ereem. 7 Be jêemi jaa d'înje ma jîynen elobay yûmbaam, wahaw peh wa jîkimmi ma jilhaw wo, mbi jiyaa'wo. 8 Ban jiwolh jaa muriyaayamu huc, Ampawom mbi asali, mata yîse kaan malhegen miwuul kurebooraaku kûmbaam. 9 Mata non ma Ampawom âkinommi moomu poop kaŋ ma îkinuum. Moo, mbi jîkinoor non ma îkinuum. 10 Moo, jisoo'jaa kûboñaku kûmbaam, ban di jenken di jâkinooraju jûmbaamaju, non ma înje poop isoom kûboñaku kata Ampawom, ma enken di jâkinaju jatawool.
11 “Înje iñaaŋenuul wahaw uwe, ma êsuumaay yûmbaam mbi elako di miwuul, ma mbi êsuumaay yatawuul yeeli êrir. 12 Moo, kûboñaku kûmbaam kooke: mbi jîkinoor, non ma înje îkinuum. 13 Mata an alet a bâkinerabu batawool buhammi bata anaw awuum humuumahu hatawool ma aket mata kupaalool. 14 Moo, jiga jaa non ma iñaaŋenuum, di jiga kupaalom. 15 Ña eetunki îwooluul joon non kugoroora, mata agoroora âmiroriit wahaw wa annahaanaw atawool agawem. Be înje mbi îwooluul non kupaalom, mata niñaaŋenuu'ban wahaw peh wa ijammi di Ampawom. 16 Ntuwa miwuul jijotommi, be înje ijotuum ma îwooluul ma jikay ki jiwolh muriyaayamu, ma muriyaaya'umu mbi mulako to; ma Ampawom mbi awuluul wahaw peh wa jilhawum di kañaaŋaku kûmbaam. 17 Be wahaw wa mbi ilobuul: jîkinoor.
Burebooraabu bata Jesus, êsukay eetubi êkiniil
18 “Moo, bukanaku kata di etaama'uye kuraayuu'jaa, di jîmir kaan înje kusingum kuraay. 19 Mata gawemmi non miwuul di etaama'uye jiwoom, mbi kûkineenuul mata ma jîwoodom. Be magam înje ijotuum ma îcaalhelluu'dô, momakiimom ma kuraayumuum, mata jigawut ban bukanaku kata dô. 20 Be jiwolho hurimahu ha ilobuum eenuul, agoroora ahaŋut annahaanaw atawool. Moo, kuŋaakoorom jaa mbi kuŋaakooruul poop, kuyaa'jaa hurimahu hûmbaam, mbi kuyab poop hatawuul. 21 Malhegen mbi kugawuul wahaw uwe peh mata înje, mata kûmirut anaw abollommi. 22 Mata ikayelootum, ban poop ilobent di buko, keetubi kubajeen kûbajumiñ, be mowme keetubi kubaj kumelhoor mata kûbajumiñaku katayiil. 23 Anaw araayommi, Ampawom poop naraayum. 24 Mata igawentum wahaw uwe wa igam di tutaru tatayiil wa an akeel agawoorutum, keetubi kubajeen kûbajumiñ. Be mowme kujuke wahaw wa igam, di kûraayoli poop ûli di Ampawom. 25 Be ga mo, ma mbi ga non ma ŋiicim di kûboñaku katayiil kaan: ‘Kuraayom bakooŋut.’ 26 Be na mbi Aanenaaw a mbi îboñul âkayil, aamom Buynumabu bata malhegen a mbi âcaalhumul di Ampawom, oo mbi alob mata înje. 27 Be miwuul poop mbi jiñaaŋen mata înje, mata miwumu d'înje kata kaŋ di hûcukumahu.”