Jesus oo agam buruŋabu
14
Ban naaniil joon: “Jîwaayen ma jîynen Emitay, di jîynenom poop. 2 Mata eluupay yata Ampoom, ebaje sîwaanaatasu lhay; kaleteen mo, mbi eeneenuul ma ikay ki îbandoorul tiŋatu tatawuul. 3 Moo, na mbi ikay ki îbandoorul tiŋatu tatawuul, ban mbi îlaañul bi iŋaruul be baabu d'înje, ma nki ulakuwaal tanor. 4 Mata miwuul jîmire buruŋabu bata be ba ikayem be.”5 Ña Tome narinkool aanool: “Ata Emit, ma ûli ûmirutum ba aw ukaayem be, bu ûli mbi uga ma ûmir buruŋabu?” 6 Be Jesus naanool: “Înje igam buruŋabu, niga malhegenumaayamu, di poop eroŋay. Mumulet bi an akay be baabu di Ampawom oo bayabumut d'înje. 7 Mata jîmireenommi, mbi jîmireen poop Ampawom. Be ma jijukommi, jîmiroo'ban.”
8 Ña Philiipi naanool: “Ata Emit, ûyisoli jaa ampayi, di bawo.” 9 Be Jesus naanool: “Philiipi, noo kaŋ niŋanu na oomaam tanor, ûmirorutom be jaat? Mata anaw ajukommi, najuke Ampawom. Moo mata wa ma oonumem di mo, îyisuul Ampawom? 10 Kama ûynet kaan, înje omu di Ampawom, oo poop omu d'înje? Mata elobay ya ilobem di miwuul, ntuwa yûmbaam înje humuumom, be Ampawom ammi d'înje akiiyom, mata oo ammi ma agawem di bugoroorabu ba igawem di bo. 11 Jîynen non ma ilobuum kaan, înje omu di Ampawom, oo poop omu d'înje. Be palimo miwuul jîynent, be di jîyneneenom mata wahaw wa igawem. 12 Ma isalhenuul eenuul, anaw âynenommi, mbi aga poop wahaw o înje igawem. Ban naaliye aga poop waawu wahammi wa înje igam, mata ma ikay be baabu di Ampawom. 13 Mata wahaw peh wa jilhawum di kañaaŋaku kûmbaam, mbi iga wo, ma Ampawom mbi asali mata Añoolool. 14 Malhegen jilhaw jaa wah wakeel di kañaaŋaku kûmbaam, înje mbi iga wo.
15 “Moo, nokoor jaa non miwuul ma jîkinommi, di jisoh elobay yûmbaam. 16 Înje mbi ilhaw Ampawom, oo mbi awuluul Aanenaaw aahu, a mbi alako di miwuul be nanoonan, 17 aamom Buynumabu balhegenumaayabu, ba bukanaku kata di etaamay keeliitum kuyab; mata keeliit kujuu'bo, keeliit poop kûmii'bo be miwuul jeeliye jîmii'bo mata bobu di miwuul.
18 “Înje eetubi iwalhuu'bo diyoonuul, be mbi îlaañul bi ilako di miwuul. 19 Mata leetubi piyo, bukanaku kata di etaamay keetubi kujukom joon, be miwuul mbi jijukom. Mata ma înje emmi ma irommi, moomu poop kaŋ ma miwuul mbi jiroŋ. 20 Di huka'uhu mbi jîmir kaan înje omu di Ampawom, miwuul miwumu d'înje, înje poop înje omu di miwuul. 21 Anaw asoom kûboñaku kûmbaam, ban naga ko di êsigiray yatawool, oo âkinommi; moo anaw âkinommi, Ampawom poop mbi âkinool, înje poop nîkinool, ban nîyisool anaw a înje igam.”
22 Ña Judas âbutim di Judas Iskariyotis, narinkool aanool: “Ata Emit, mata wa nuga ma ûli ujuki, be ugawut ma bukanaku kata etaamay kujuki?” 23 Be Jesus naanool: “Anaw âkinommi, ban nasoh elobay yûmbaam, Ampawom poop mbi âkinool, ûli mbi ûkayil be baabu d'oo ma ukin d'oo. 24 Anaw âkintommi, âsohoriit elobay yûmbaam; mata elobay ya jijamem di yo, ntuwa yûmbaam, be yata Ampawom abollommi.
25 “Ma iñaaŋenuul wahaw uwe, mata înje umu ute di miwuul para. 26 Aanenaaw aamom Buynum Bunapaabu, a Ampawom mbi abolluul di kañaaŋaku kûmbaam, oo mbi alhikitenuul wah peh; mbi agawuul poop ma jiwolho wahaw peh wa iñaaŋenuum. 27 Jilako ute di kâsuumaayaku; mata kâsuumaayaku kûmbaam ka mbi iwuluul, eetukawuluu'ko non ka ejamaatay ewulem. Moo, jîwaayen ma aatuba jîkoli. 28 Jijame non ma ilobuum, înje mbi ikay, be ban mbi îlaañul be ute di miwuul. Moo, jîkinom jaa, di jîririgen mata ma eenuum ma ikay be baabu di Ampawom, mata oo nahaŋom sembe. 29 Ilobuu'mo mowme bala wahaw uwu ûriiŋ, ma mbi ûriiŋ di jîynen. 30 Moo, eetunki ilob di miwuul meeŋ, mata annahaanaw ata etaama'uye,a nahuutulo ban, be abajut sembe d'înje. 31 Be jake ma bukanaku kata di etaama'uye, kûmir kaan înje nîkine Ampawom, momakiimom ma igawmem wahaw wa alobewommi.” Na aloom umu ban naaniil: “Jilhaalo ma ûcaalhaal ute.”