Jesus nakullhen ûkandumaw wata kurebooraaku katawool
13
Ban na kâlundaayaku kata Paaskuwa kuhuutum, Jesus ma âmiim ban kaan, tîriiŋe ma awaa'bo etaama'uye ma akay ki atoo'bo Ampawool. Be bâkinerabu ba âkimmi bukanaku kâynenoom kammi di etaamay, bo ba âkiniim be kaŋ di hûbanumahu. 2 Be na Jesus koo di kurebooraaku katawool kugam kokariyem sisonna, diyaabu yoo ma egam ban di êsigiray yata Judas aamom añool Simoŋ Iskariyotis, hunongahu hata ma mbi aŋoon Jesus. 3 Be Jesus nâmire kaan Ampawool omu ma awalemmi wahaw peh di uŋenaw watawool, nâmire poop kaan di Emitay nâcaalhumulom, ban mbi alaañ be di yo. 4 Ña nalhaalo ta ya kurim, ma âcaalhen bûjupaabu, ban naŋar hûbeesoorumahu akok di hukengahu. 5 Ban naŋar mumelamu aga di hûbasiyaahu ma akullhen ûkandumaw wata kurebooraaku katawool, ban nâbeesum wo hûbeesoorumahu ha akokom. 6 Ña na ârimmi di Simoŋ Pedru, Simoŋ Pedru narinkool aanool: “Ata Emit, aw mbi ukulhenom ûkandumaw?” 7 Be Jesus naanool: “Wahaw wa igawem di wo ootubi unamulen wo mowme, be mbi uga ban nunamulen wo.” 8 Be Pedru naanool: “Aw ootubi ukulhenurerom ûkandum.” Jesus naanool: “Înje ikulhenti jaa ûkandumaw, ootubi uga arebooraaw ûmbaam.” 9 Ña Simoŋ Pedru naanool: “Ata Emit, kama ña ootubi ukulhenom ûkandumaw keb, be mbi ukulhenom poop uŋenaw di hûkuwahu.” 10 Be Jesus naanool: “Anaw akullhom ban, ajoonut ma akullho joon, be ûkandumaw keb mbi akullhen. Moo, miwuul poopuul jisete ban, be anor ata di miwuul asetut.” 11 Mata Jesus nâmire jak anaw a mbi aŋoonool; mo ma âanummi ntuwa buko peh kusetum.12 Na akullhemmi ûkandumaw wata kurebooraaku katawool ban, nâjupo bûjupaabu ma alaañ ki aleeho ta ya kurim, ban narinkiil aaniil: “Jinamulene wahaw uwe wa igawuum? 13 Miwuul ya jîwoolom alhikitenaaw, di jîwoolom poop Ata Emit; jikooŋe mata înje oo. 14 Moo, înje jagam alhikitenaaw, niga poop Ata Emit, ikulhemmi ûkandumaw watawuul, miwuul poop mbi ya jikulhenoor ûkandumaw watawuul. 15 Mata igawuu'mo, ma mbi ya jiga poop non ma igawuum. 16 Ma isalhenuul eenuul, agoroora alet ahammi anaw akiloom, bajut poop anaw aboñim, ahammi anaw aboñoom. 17 Moo, ma miwuul jîmiim ban wahaw uwe, jiga wo jaa, mbi jibaj hûpiira.
18 “Înje ilee'ma ilob matawuul poopuul, mata nîmire bukanaku ka ijotum, be mbi ga non ma demmi ma ŋiicim di Kaytaku Kâñoyyaaku kaan: ‘Anaw a uriyem dânor, oma alhaalowulom ma atiikom.’ 19 Be ilobuul wahaw we mowme woo bâriiŋorut, ma mbi uga, di jîynen kaan Înje Igam Înje. 20 Ma isalhenuul eenuul, anaw ayaañom anaw a înje ibommi, înje nayaañom; anaw poop ayaañuwommi, anaw abollommi nayaañom.”
Jesus nañaaŋen di kaan Judas Iskariyotis mbi aŋoonool
21 Na Jesus aloom umu ban, ña naga ñânkiiteni; ña naaniil: “Ma isalhenuul eenuul anaw aahu ata di miwuul mbi aŋoonom.” 22 Ña kurebooraaku katawool di kujikeroor, bâmirut anaw a Jesus alobem d'oo. 23 Be aahu a Jesus âkimmi noon, oo too ma âsikum ñata d'oo. 24 Ña Simoŋ Pedru, nâlobum uŋen arebooraaw umu, ma aanool arik Jesus anaw umu a alobem d'oo. 25 Ña arebooraaw umu, nâhug Jesus ma akagoor di êsigiray yatawool ma arinkool aanool: “Kama ay nulobem d'oo?”
26 Ña Jesus naanool: “Anaw a mbi iwul jîmburuwaaju jaboojenim.” Ña naboojen jîmburuwaaju, ban nawuu'jo Judas Iskariyotis añool Simoŋ. 27 Na Judas atokonjom, ban Esatanaay di enebejool. Ña Jesus naanool: “Wahaw wa ûkimmi uga, uga wo cab ma aatuba upiyen.” 28 Be bukaaku kalakotom huriyahu, an akeel anamulent wahaw wakiim Jesus nâlobumoo'mo. 29 Be mata ma Judas añakem bancaamabu batayiil, ña buko di kunong kaan Jesus aanoom ki ânoomul miñ makeel be kâlundaayaku, be mante bi kuwul kûsukateenaku. 30 Na Judas ayaam jîmburuwaa'uju, ban nâcaalh. Be jaley ma ajommi ban.
Kûboñaku kunkulaku
31 Be na Judas agam nâcaalhe, ña Jesus naaniil: “Mowme Añool Ajamaat mbi âyyeni, ma mbi bâyyenerabu bata Emitay poop bujuki d'oo. 32 Mata bâyyenerabu bata Emitay bujuki jaa d'oo, mbi ega poop ma bâyyenerabu batawool bujuki di yo; ban mbi ega mo mowme. 33 Kuñoolom, înje eetubi ilako ute di miwuul kuk kayeje; be mbi jipaamom. Be non ma iloom yahaanay yata jûdewwi, moomu poop ma mbi ilobuul eenuul, binabu ba ikayem be, jeetubi jeeli jikay be bo. 34 Be mowme mbi iwuluul kûboñaku kunkulaku: mbi jîkinoor; non ma înje îkinuum, moomu poop kaŋ ma mbi jîkinoor. 35 Jîkinoor jaa, mbi bukanaku peh kûmir kaan miwuul kurebooraaku kûmbaam.”
36 Ña Pedru narink Jesus aanool: “Ata Emit, ûbey nureesem be?” Jesus naanool: “Ba înje ireesem be, ooliit bi usoolhellom mowme; be mbi uga ban nusoolhellom.” 37 Be Pedru naanool: “Mata wa ma êeliitummi isoolheni mowme? Înje neeliye iket matayi.” 38 Be Jesus naanool: “Aw mbi uket mata înje? Ma isalhene eeni, bala kalhitaaku kulhit jaat, aw balateromban ñeemo ñâhaaji.”