19
Ña Pilaatus naŋar Jesus, ban nagawiil ma kûnagulool. 2 Ña esellooraay di kucookoor ênkuuhaay yata undiiŋawa ma kugawoo'yo di hûkuwahu, ban di kûjupenool baanaabu. 3 Ban ya keenool: “Âyyaw ata jûdewwi, nusaapi!” Ban ya kumabool umiñaw di uraabaw.4 Ña Pilaatus nâcaalhul joon be tîyaŋ âriiŋul naaniil: “Jitallhen, ma îcaalheluwool be ube tîyaŋ, ma mbi jîmir kaan înje ijukut d'oo kûbajumiñ!” 5 Jesus nâcaalhul oo ma ânkuuhenim ênkuuhaay yata undiiŋaw, ban di kûjupenllool baanaabu. Ña Pilaatus naaniil: “Âynaaw oomuwaal.”
6 Be na yahaanay yata bumaaŋenaabu bata Emitay, di bupooyaabu bata eluupay yata Emitay kujukoom, ña di kûŋaaŋulo ma ya kêenul: “Uriiŋool di êkrusay! Uriiŋool di êkrusay!” Be Pilaatus naaniil: “Miwuul jikay d'oo ki jiriiŋool, mata înje ijukut kûbajumiñ d'oo.” 7 Ña yahaanay yata jûdewwi di keenool: “Non ma kûboñaku kâtooli kuloom, âynaaw ume naaliye abuji, mata naane oo Aŋilaw ata Emitay.”
8 Be na Pilaatus ajammi ma kuloom umu, ña nahaŋ mâkoli. 9 Ña nalaañ anebej joon di kâyyaku âriiŋ narink Jesus aanool: “Kama aw ûbey nuwoom?” Be Jesus alobut. 10 Ña Pilaatus naanool: “Kama ootukalob d'înje? Kama ûmirut kaan, înje nibaje sembe ma eeli iriiŋi di êkrusay, neeli poop iwalheni?” 11 Be Jesus naanool: “Sembaasu sa ubaam ume d'înje, Emitay ewulisom, be anaw aŋarommi awuli, nabaje hûbajumiñ hâamak.”
12 Ña Pilaatus ya apaam maama mbi aga ma awalhen Jesus; be jûdewwi ya kûŋaaŋulo ma kêenul: “Na mbi uwalhenool, ûli nûmir kaan aw ûkint âyyaw âmakaaw ata Rooma. Mata anaw ammi oo agam âyyaw, âkint âyyaw âmakaaw.” 13 Na ajammi ma kuloom umu, ña nâŋarul Jesus be tîyaŋ, âriiŋul naleeho di hûtenkahu hata di kâyyaku kata batalenabu taaneyim tiŋatu tata kuwaaliisaku; di elobay yata êbrewwi ya teeni Gabata. 14 Be huka'uhu di ga no hukahu ha êsukay ebandoorem be kâlundaayaku kata Paaskuwa; jaley ma arem poop kajuum, ña Pilaatus naan jûdewwi: “Âyyaw atawuul oome.” 15 Ña jûdewwi di kûŋaaŋulo ma ya kêenul: “Ûcaalhenool! Ûcaalhenool! Uriiŋool di êkrusay!” Be Pilaatus narinkiil aaniil: “Âyyaw atawuul oo ma mbi iriiŋ di êkrusay?” Be yahaanay yata bumaaŋenaabu bata Emitay di keenool: “Ûli ubajut ây akeel âmakaaw, âbutim di âyyaw âmakaaw.” 16 Ña Pilaatus nawuliiwool ma nki kuriiŋool di êkrusay. Ña di kukay d'oo.
Jesus di kuriiŋool di êkrusay
17 Ña di kuga Jesus ma araaj êkrusay yatawool be tiŋatu ta keenem Kalbariyu, di baloberabu bata êbrewwi ya teeni Golgota.b 18 Na kûrintom, di kuriiŋool di êkrusay, di kuriiŋoor to poop kûynaaku egaba, aahu kaŋen kûrir, aahu kaŋen kumay ma Jesus atutuwiil. 19 Ña Pilaatus naboñ ma kuŋiic di jitaaguwaaju baŋiicera'ube: “JESUS ATA NASARE, ÂYYAW ATA JÛDEWWI,” ban di kuriiŋ jo hatiya di êkrusay da Jesus ariiŋim. 20 Be baŋiicera'ubu di buŋiici di elobay yata êbrewwi, di yata greguwi, di poop yata Lâtiŋ. Be magam tiŋa'utu ta kuriiŋum Jesus di êkrusay, totu ma tireekenoorum di hankahu, ña jûdewwi kameeŋe di kupisen baŋiicera'ubu. 21 Ña yahaanay yata bumaaŋenaabu bata Emitay di keen Pilaatus: “Aatuba uŋiic umu ôonul oo âyyaw ata jûdewwi, be mbi uŋiic dô ôonul, âynaaw ume naane, oo âyyaw ata jûdewwi.” 22 Be Pilaatus naaniil: “Wahaw wa niŋiicum ban, niŋiic wo ban!”
23 Na esellooraay kuriiŋum Jesus, ban di kuŋar wañaw watawool kûgiiter ñeemo ñabakiir, ban di kuga anoowan naŋar jibeyaju jatawool. Be êsabadooraay yatawool, ekikuti ma eriirumuli hatiya be di etaam. 24 Ña esellooraa'uyu di kêenul: “Aatuba uruusulaa'yo, mbi ugawaal êtukay ma mbi ûmiraal anaw a mbi aŋaa'yo.” Ña di coohen non ma Baŋiicerabu buloom kaan:
“Kûgiitoore wañaw wûmbaam,
ban di kuga êtukay mata êsabadooraay yûmbaam.”
Mo ma esellooraay uyu kugam.
25 Be iñaaw Jesus oo too ñata di êkrusay, di atiyool, di Mariya aamom apañoor Klewopas, di poop Mariya Madalena. 26 Be na Jesus ajuum iñaawool, koo di arebooraaw aahu atawool a aboolaatum, ña naan iñaawool: “Âwo, jaa añooli oomu!” 27 Ban naan poop arebooraaw umu atawool: “Jijaa, iñaawi oomu.” Ña noo huka'uhu, arebooraaw umu naŋar iñaaw Jesus be yanŋool.
Eketay yata Jesus
28 Ña na Jesus âmiim kaan wahaw peh ugawi ban, ma coohen non ma Baŋiicerabu buloom, ña nâanul: “Basibenabu bobu d'înje.” 29 Nownu êrungay too ma ememmi bunukabu bahiraabu, ña di kuŋar jiponsaju ma kuboojen jo di bunuka'ubu, ban di kukok jo di hunjaamahu, ma kuga jo di butumabu bata Jesus. 30 Be na acombubom, ña nâanul: “Wahaw peh ûriire!” Ban nâsik, ña naket.
31 Be mata ma huka'uhu hugam ha mbi tititijen di ga hîyyaayahu hatayiil na mbi kâlundaayaku kata Paaskuwa kuga, ña jûdewwi di kukay ki kulhaw Pilaatus ma aga bukanaku ma kukay ki kutij ûkandumaw wata bukanaku kariiŋim di sîkrusasu ma kuwalelliil, ma keetubi mbi kulako dô huka'uhu. 32 Ña esellooraay di kukay kûriiŋ di kutij ûkandumaw wata kûynaa'uku egabaay kariiŋooritom di Jesus. 33 Be na kûrimmi di Jesus, di kutookool oo ma akeem ban, ña kutijut ûkandumaw watawool. 34 Ña asellooraaw aahu nayawool kabaayaku di kaheehaku, ña hûsimahu di kûcaalhul, di poop kamelaku. 35 Anaw ajukoom, oo ma añaaŋemmi ume wahaw uwe; moo nâmire kaan wahaw wa aloom ume malhegen, ma mbi miwuul poop jîynen. 36 Mata wahaw uwe uga mo ma mbi coohen non ma Baŋiicerabu buloom kaan: “Yool yakeel yatawool yeetubi etiji.” 37 Baŋiicer baabu di bêenul: “Mbi kujiker anaw a kuyam kabaayaku.”
Huhokahu hata Jesus
38 Ban Jose ata Arimateeya agam arebooraaw ata Jesus, ban ya âñooroor mata ma âkolim jûdewwi, nakay ki alhaw Pilaatus ma awulool buruŋ ma âwalenul ehuluŋaayay yata Jesus. Ña Pilaatus naanool aawo. Ña Jose nakay âriiŋ nâwalenul ehuluŋaayay. 39 Nikodeemus poop aamom abiim bi akay busonnaaru ki kujukoor di Jesus, naŋar sîkilaasu saalim sîriiŋ anabawo di kunŋen di hutok (35) sata miira, yâguusoorim di alowes. 40 Ban di kuŋar ehuluŋaayay yata Jesus ma kulhiimen yo sileesaasu, ban di kûliisen yo muheeña'umu non ma buko jûdewwi kugawem bata huhokahu. 41 Be tiŋa'utu ta Jesus ariiŋim di êkrusay etoolay too; di etoola'uyu poop êluŋay dôo yunkulay da an ahokorutim. 42 Ña Jose koo di Nikodeemus, di kuŋar ehuluŋaayay yata Jesus, ki kuhok di êluŋa'uyu mata ma ereekentom, ban poop mata ma hîyyaayahu hatayiil hurem kâriiŋ.