Jesus nâlhaalowul di kuketaaku
20
Ban di hukahu hata kâcaalhaaku katayiil bûjomaru bîb, too bagaworut haa, Mariya Madalena, nakay be di êluŋay, âriiŋ najuk hûwaaliisahu ha kûbabummi êluŋay, hoo ma hûcaalhenim. 2 Ña natey ki atoo'bo Simoŋ Pedru, koo di arebooraaw aahu a Jesus aboolaatum, âriiŋ naaniil: “Kûcaalhene ban Ata Emit di êluŋay, ûmirutaal ta kugawoom.”3 Ña Pedru di kûcaalh koo di arebooraaw aahu, ma kukay be di êluŋay. 4 Ña di kutey di manor, be arebooraaw aahu nahaŋ Pedru matey cab, ña nasingool âriiŋ di êluŋay; 5 be na âhiinendom, najuk sileesaasu ma siwalenim, be anebejut. 6 Be Simoŋ Pedru a ya asoolhelloom, nâriiŋul nanebej dô, oo poop najuk sileesa'usu. 7 Be eleesaay ya kugam di hûkuwahu hata Jesus, yoo balet tanor di sileesaasu saasu, ma ebooñim bûto. 8 Ña arebooraaw umu poop asingum âriiŋ nanebej, na ujuum, nâynen. 9 Be buko banamulenorut non ma Baŋiicerabu buloom kaan joone ma Jesus mbi âlhaalowul di kuketaaku. 10 Ña kurebooraa'uku katawool, di kulaañ be di siluup.
Jesus nâcaalhul Mariya Madalena
11 Be Mariya nalako to di êtingaay yata êluŋay, ma ya akaaw. Be oo ma akaawem, nayiik ma ajiker dâada di êluŋay, 12 ña najuk kumalaakaku egaba kâjupom tûmpaay koo ma kuleehom ta kutalum ehuluŋaayay yata Jesus, ma kuga aahu karebaku kata hûkuwahu, aahu kata ûkandumaw. 13 Ña di kurinkool keenool: “Añakanaye, kama mata wa ma ukaawumem?” Naaniil: “Kukaye ban di Ata Emit ûmbaam, ban îmirut ta kugawoom.”
14 Na aloom umu ban, nâtiiwo kujeeŋanda, najuk Jesus ma ajummi, be anamulent kaan oo. 15 Ña Jesus narinkool aanool: “Añakanaye, kama wa nukaawem di wo? Ay nupaamem d'oo?” Be oo di gawool non anaw umu, agorooraaw ata di etoolay, ña naanool: “Annahaanaw, ga jaa non aw uŋaroom, nuñaaŋenom ta ugawoom ma ikay ki iŋarool.” 16 Ña Jesus naanool: “Mariya!” Ña Mariya nâtiiwowul ma aanool: “Raboni!” (daamom “Alhikitenaaw”).
17 Be Jesus naanool: “Aatuba usohom, mata iŋoolorut be baabu Ampawom, be ukay be baabu di kutiyom ki ooniil, ma iŋool be baabu di Ampawom, agam poop Ampawuul, aamom Emitay yûmbaam, yagam poop Emitay yatawuul.” 18 Ña Mariya Madalena, nakay ki añaaŋen kurebooraaku katawool aaniil najuke Ata Emit! Ban nañaaŋeniil poop non ma aloboom.
Jesus nâcaalhul kurebooraaku katawool
19 Ña nownu di kâcaalha'uku baheperabu, kurebooraaku katawool di kûmeboor dânor ma kubab sîtingaasu sata eluupay, mata ma kûkolim yahaanay yata jûdewwi. Ña Jesus nâcalhiil ma aaniil: “Kâsuumaayaku kulako di miwuul.” 20 Na aloom umu ban, nâyisiil uŋenaw watawool, di poop kaheehaku. Ña kurebooraaku katawool, di kûririgen mata ma kujuum Ata Emit. 21 Ña Jesus nalaañ aaniil joon: “Kâsuumaayaku kulako di miwuul! Mata non ma Ampawom abollommi, moomu poop kaŋ ma mbi iboñuul.” 22 Na aloom umu ban, nâhuuteniil ma aaniil: “Jiyab Buynum Bunapaabu. 23 Moo, bukanaku ka mbi jibonket kûbajumiñaku katayiil, di kubonketi; be kaaku ka jibonketutum kûbajumiñaku katayiil, keetukabonketi poop.”
Bâynenterabu bata Tome
24 Be Tome agam poop arebooraaw ata Jesus, ata di buku kunŋen di egabaay aaneyim poop Magabaamu, alakowut to di buko na Jesus akaylom. 25 Ña kurebooraaku kaaku di keenool: “Ûli nujuke Ata Emit.” Be naaniil: “Ijukut jaa bayawerabu bata bariiŋabu di uŋenaw watawool, îrurut poop jaa husinkahu hûmbaam di bayawera'ubu, ban îrurut jaa poop kaŋenaku kûmbaam di kaheehaku katawool, eetubi îynen.”
26 Nagam kukaku hutok di kûhaaji, kurebooraaku katawool di kulaañ kûmeboor joon, be Tome oo too di buko. Be nownu poop sîtingaasu soo ma sibabim, ña Jesus nâcaalhul tutaru tatayiil ma naaniil: “Kâsuumaayaku kulako di miwuul!” 27 Ban naan Tome: “Tome, ujiker uŋenaw wûmbaam, uga husinkahu ute; uñuuruu'poop kaŋenaku katayi, ma uga ko di kaheehaku kûmbaam; aatuba uga anaw âynenoriitum, be uga âynenaaw.” 28 Ña Tome naanool: “Ata Emit ûmbaam! Emitay yûmbaam!” 29 Be Jesus naanool: “Mata ma ujukommi mo ma ûynenumommi? Be anaw ajukutommi, ban nâynenom, nabaje hûpiira.”