Jesus nâlhaalowul di kuketaaku
28
Na hîyyaayahu hata jûdewwi hugam hubawe, di hukahu hata kâcaalhaaku katayiil bûjomaru bîb, Mariya Madalena, di Mariya haahu, di kukay ki kûjukul êluŋay. 2 Ña etaamay di egogoroor lhînŋa, mata ma amalaakaw ata Ata Emit awalowulom hatiya di emitay âriiŋul, nâkikilen huwaaliisa'uhu, ban naleeho dô. 3 Amalaakaw umu haanaahu hatawool, di hunaamoor non kararanjuun, bulhiimaabu batawool, di bûtumpaay peretet non ehul. 4 Ña bupooyaabu di kuboboken mata ma kûkolim, ban di kuŋaŋŋo non bukan kakete. 5 Be amalaakaw umu naan yaaraa'uyu: “Aatuba jîkoli! Nîmire kaan miwuul mapaamem di Jesus ariiŋim di êkrusay. 6 Be alet ûde, mata nalhaalelli ban di kuketaaku non ma alobuum. Jîkayil ma jijuk ta atalim. 7 Jikay cab ki jeen kurebooraaku katawool, oo nalhaalelli ban di kuketaaku, be nayabiil kayooŋ be Gâlileeya ma nki kutookoo'bo. Moo, niñaaŋenuu'ban.”8 Ña di kûcaalh cab di êluŋay mata ma kûkolim, ban di êsuumaay dilo, ma kutey ki kuloo'mo kurebooraaku katawool. 9 Be koo di buruŋabu, ña Jesus nâkayil bi kupam âriiŋul naaniil: “Kâsuumaayaku kulako di miwuul!” Ña di kukay ki kûhugool, ban di kulhom ûkandumaw watawool ma kûbinkenool. 10 Be Jesus naaniil: “Aatuba jîkoli. Jikay ki jeen kutiyom, kukay be Gâlileeya, nki kutookom bo.”
Mûcalamu malobim mata ehuluŋaay yata Jesus
11 Na yaaraa'uyu kugam kukaye, bupooyaabu baabu di kukay be di hânkijahu hata êsukay kûriiŋ, di kuñaaŋen yahaanay yata bumaaŋenaabu bata Emitay wahaw peh wagam. 12 Ña yahaana'uyu, di kulhan di yahaanay yata jûdewwi ma kutabulhenoor maama mbi kuga. Ña di kuwul esellooraa'uyu bancaamabu bâamak, 13 ban di keeniil: “Mbi jêenul kurebooraaku katawool, kukaylom hukaru ûli ma uŋotum bi kûkuut ehuluŋaayay yatawool. 14 Be âyyaw âmii'mo jaa, ûli mbi ulob d'oo, ma oonool malhegen, ma makeel metuba mugawuul.” 15 Ña esellooraa'uyu na kuyaam bancaama'ubu, ña di kuga non ma yahaanay yata bumaaŋenaabu bata Emitay kulobiim. Ña hurima'uhu di huwaasoor di bukanaku kagam jûdew be kaŋ hukahu hata jaat.
Jesus nâcaalhul kurebooraaku katawool
16 Ña kurebooraa'uku katawool kunŋenay di an anor, di kukay be Gâlileeya di hurimbiliŋahu ha Jesus alobiim di ho. 17 Be na kugam kujukool, ña di kûbinkenool, be bukaaku di kumantiir. 18 Be Jesus nâkayil bi âhugiil ma aaniil: “Emitay ewulom sembaasu peh sata hatiya di emitay, di poop etaamay. 19 Moo, jikay be âmbasuk peh ki jigawiil kurebooraaku kûmbaam, ban di jîbatisiil di kañaaŋaku kata Ampoom, di kata Aŋilaw, di kata Buynum Bunapaabu; 20 ban di jilhikiteniil ma kusoh wahaw peh wa ilobuum. Be înje mbi ilako di miwuul kukaku pooko ii be di hûbanumahu hata etaamay.”