Jesus nâlhaalowul di kuketaaku
24
Di kâcaalhaaku kata hîyyaayahu hata jûdewwi bûjomaru, yaaraa'uyu di kukay be di êluŋay di mûkiramu ma kubandoorum be bata ehuluŋaayay yata Jesus. 2 Na kûrimmi, di kutook huwaaliisahu ma hûcaalhenim di êluŋay. 3 Ña di kunebej, be kujukut ehuluŋaayay yata Jesus. 4 Ña di kujaahali bâmirut maama mbi kuga. Too kaŋ cab, kûynaaku egaba di kûcaalhii'to, ban ulhiimaaw watayiil di uga wajwaj. 5 Yaaraa'uyu di kuwolho, ña di kûsik to di etaam. Kûynaa'uku di keeniil: “Mata wa ma jipaamumem di anaw aroŋaaw ta kuketaaku kemmi, 6 alet ûde, nalhaalowulo ban. Jiwolho non ma abiim bi alobuul oo baroŋ Gâlileeya aanuul: 7 Añool Ajamaat manooman mbi kuŋarool kuwul bukanaku kâhoŋaaku ma kuriiŋool di êkrusay, be di hukahu hûhaajutahu mbi âlhaalowul.”8 Yaaraa'uyu, ña di kuwolho non ma Jesus abiim bi alobiil.
Anjos no Sepulcro
9 Ña na kulaañulom di husaahahu di kukay ki kuñaaŋen kumakaaku katawool kaamom kunŋen di anor, di bukan kaaku kalakotom, miñamu ma kujukulom. 10 Yaaraa'uyu kaamom, Mariya Madalena, koo di Jowana, be di Mariya iñaaw Tiyaagu, be di yaaraay yaayu ka ya kareboorum d'oo, koo kuñaaŋemmi kumakaaku katawool miña'umu. 11 Be kûynent, ma kunongoor di kaan yaaraa'uyu bûnuutaabu kûlobummi umu. 12 Ña Pedru nalhaalo ma atey be di êluŋay, nayiik dô najuk keb uhulaw wa kulhiimenumoom. Di gawool jamalaŋ mata miñamu ma ajuum, ña nalaañ.
O Túmulo está Vazio
Di buruŋabu bata Emawus
13 Di huka'uhu, egaba kata di buko koo ma kukayem be êsukay yaaneyim Emawus, yabaam ebankay yârimmi sikilometrasu seemo kunŋen di yanor be Jerusaleŋ. 14 Koo ma kukayem, ya kûcuuk mata wahaw wagam. 15 Na kugam kôkacuukem ma ya kulaañenoor, Jesus nâriiŋuu'to ma areboor di buko. 16 Be di gawiil non gaga hûup, ña kumanjutool. 17 Ña Jesus narinkiil aaniil: “Kama wah bu jilobem di wo?”
Ña di kujuum ñânkiiteni. 18 Aahu aaneyim Klewopas, nalaañenool aanool: “Kama aw amaasooraaw ûde Jerusaleŋ, aw ûmirut wahaw wagam ûde kuka'uke?”
19 Jesus naaniil: “Waamom ûwey?”
Ña di keenool: “Kama ûmirut wahaw wa kugam Jesus ata Nasare, agam Añaaŋenaaw ata elobay yata Emitay abaam sembe noon, mata miñamu ma agawem di maama alobem kayooŋ di Emitay, di poop bukanaku, 20 be yahaanay yata bumaaŋenaabu bata Emitay, di yahaanay yâtooli di kusohool ki kuga batalenabu, ma kêenul mbi abuji, ña di kuriiŋool di êkrusay. 21 Ûli noneene oo mbi amellheneen êsukay yata Israyel. Be jaat gawe ban kukaku kûhaaji na wahaw uwe ugawim. 22 Ban poop yaaraay yaayu yata di kaasaaku kâtooli, di kûgawoli uwollo, mata di êluŋay kukayum urabaw, 23 be kujukut ehuluŋaayay yata Jesus. Di kûlaañul ma kêenul kumalaakaku kujuum kaaniim omu ma arommi. 24 Kaaku kalakotom d'ûli di kukay be di êluŋay ma nki kûjukul jak non ma yaaraa'uyu kûlobolim, be kujukut Jesus.”
25 Jesus naaniil: “Bu jînaatum ume uynum, makiim jînamulenaaliyoriit, ban poop jîynenaaliyoriit miñamu ma buñaaŋenaabu bata kûboñaku kata Emitay kuloom! 26 Kama Kristu, ntuwa mo ma mbi âlaam ban nkit ampawool Emitay di egawool âyyaw ahammi wah peh.” 27 Ban nanamuleniil maama kaytaku kata Emitay kuloom matawool, ma âcukum di uytaw wata Moyses ii be di wata buñaaŋenaabu bata kûboñaku kata Emitay.
28 Na kûrimmi di jîsuka'uju, Jesus naga non ma ahulh be kayooŋ. 29 Be di kuwaasiyenoorool ma keenool: “Ulako ute d'ûli mata jaley omu ma ajon.” Ña nanebej ma alako to di buko. 30 Na kugam ma kuri, Jesus nasoh hûmburuwaahu ban nasal Emitay, ban natii'ho kûgiitoor. 31 Ña di gawiil poop haa, di kumanjool. Be ña nanep to di buko. 32 Ña di kulob ma ya kurinkoor kêenul: “Kama bu gawe sîsigirasu satoolaal silhibut nownu na ya alobulom d'ulaal di buruŋabu na ya anamulellolaam elobay yata Emitay?”
33 Ña nownu kaŋ, di kulhaalo ma kulaañ be Jerusaleŋ. Na kûrimmi, di kutook kumakaaku kunŋen di anor kaamom katawool, di poop kurebooraaku kaaku katawool koo ma kûmeboorum tanor. 34 Kumakaa'uku di keeniil: “Malhegen Ata Emit omu ma alhaalowulom di kuketaaku, Simoŋ najukool.” 35 Ña buku egabaay di kuñaaŋeniil maama kugam di buruŋabu, di maama kugam ma kumanjool na atiim hûmburuwaahu.
Jesus nâgawul weh ta kurebooraaku katawool kemmi
36 Na kugam ko kañaaŋenem di buko, Jesus nâgawuu'to kaŋ weh di tutaru tatayiil, naaniil: “Kâsuumaayaku kulako di miwuul!” 37 Ña di kuwollo, di kûkoli ma gawiil non âpurapuraw oma kujuum. 38 Narinkiil aaniil: “Mata wa di jîkoli? Mata wa ma jimantiirmem di ume? 39 Jijiker uŋenaw wûmbaam be di ûkandumaw, mbi jîmir kaan înje kaŋ. Jigorom mbi jîynen kaan înje kaŋ, mata âpurapura aakut eniil, non ma jijuum ma înje ibaayom.”
40 Na aloom ban nâyisiil uŋenaw be di ûkandumaw. 41 Di êsuumaay yaakiim, ña kûynent poop, di gawiil jamalaŋ. Jesus narinkiil aaniil: “Jibaje ute wah wata huri?” 42 Ña di kuwulool jitijaju jata jiwolaju jabolim. 43 Nayaa'jo ban natokoñ jo to ta kemmi. 44 Ban naaniil: “Moma ya ulakuwaam tanor neenuul miñamu peh maŋiicim mûmbaam di kaytaku kata kûboñaku kata Moyses, di wata buñaaŋenaabu bata kûboñaku kata Emitay, di poop kata uñaaŋaw wata jasalaju jata Emitay, mbi mulo kaŋ poomo d'înje.”
45 Ña nagawiil ma kunamulen mata kaytaku kata elobay yata Emitay. 46 Ban naaniil: “Momu ma muŋiicim di kaan Kristu mbi kubujool, be mbi âlhaalowul di kuketaaku di hukahu hûhaajutahu. 47 Ma kañaaŋaku katawool mbi kuga kârejumaku kata mata jawatatenooruwaaju, di mata japasaju jata kûbajumiñaku, cûkumul Jerusaleŋ ii be âmbasuk poopool. 48 Miwuul jigam bukanaku kaamom kajuum wahaw uwe. 49 Înje mbi ibolluul wahaw wa ampawom ammi mbi âboñul, be jilako ute Jerusaleŋ be na mbi sembaasu sata hatiya di emitay sîwalowul di miwuul.”
Jesus Aparece Ressuscitado
Jesus nalaañ be hatiya di emitay
50 Ña Jesus nakay di buko be Betaaniya, âriiŋ naralh uŋenaw ma awuliil kâsuumaayaku. 51 Na agam oo ma awulem di buko kâsuumaayaku, ya âraajuluwiil ma ya aŋari be hatiya di emitay. 52 Ña di kûbinkenool, ban di kulaañ be Jerusaleŋ di hûririgenahu harem kaŋ noon. 53 Ya kukay nanoonan ki kulako di eluupay yata Emitay ma ya kusal yo.
Grande Comissão e Ascensão
Convite para Conhecer Jesus Pessoalmente