Jesus nâlhaalowul di kuketaaku
16
Ban na hîyyaayahu hata jûdewwi hugam hubawe, Mariya Madalena, di Salome, di Mariya aamom iñaaw Tiyaagu, di kunoom mûkiramu maputaamu sûum ma nki kusaas ehuluŋaayay yata Jesus. 2 Di hukahu hata kâcaalhaaku kata hîyyaayahu hata jûdewwi bûjomaru, jaley ma agam poop nâcallho, di kukay be di êluŋay. 3 Na kugam koo kareesem, ya kêenul: “Ay mbi âcaalhenolaal huwaaliisahu hammi di êtingaay yata êluŋay?” 4 Mata ma huwaaliisahu hagayitom hugam hâamak, momakiimom di kûlobum mo. Be na kujikeebom, di kujuk ma huwaaliisa'uhu hûcaalhenim. 5 Ña di kunebej di êluŋay kûriiŋ, di kûjuu'dô ajaajuwaw ma aleehom di karebaku kûriraku kata êluŋay, ban nâjupo tûmpaay. Ña di kûkoli noon.6 Be naaniil: “Aatuba jîkoli! Ntuwa Jesus ata Nasare ariiŋim di êkrusay, oo ma jipaamem d'oo? Nalhaalelli ban di kuketaaku, alet ûde. Jijiker, tiŋatu toote ta atalim. 7 Moo, jikay ki jeen kurebooraaku katawool, di Pedru kaan naane mbi ayabiil kayooŋ be Gâlileeya ma nki kutookoo'bo non ma alobiim.”
8 Ña yaaraa'uyu na kûcaadom, ya kuboboken mata ma kûkolim, ña di kutey ma kukay; ban kulobut mo an akeel.
Jesus nâgawul weh ta Mariya Madalena ammi
9 Na Jesus agam nalhaalowulo di kuketaaku, di hukahu hata kâcaalhaaku katayiil bûjomaru bîb, nâgawul weh ta Mariya Madalena ammi, aamom a âcaalhemmi kumalaku keemo hutok di egaba. 10 Ña Mariya Madalena, nakay aloo'mo kurebooraaku kata Jesus. Noo, koo to ma kûñankiitenim ma ya kukaaw. 11 Be na kujammi kaan Jesus nalhaalowulo di kuketaaku, ban kujukoore di Mariya Madalena, kûynent.
Jesus nâgawul weh joon ta kurebooraaku katawool egaba kemmi
12 Nagam ban, Jesus nâgawul weh kurebooraaku katawool egaba di haanaahu haahu hâbutim, koo di buruŋabu ma kureesem be butat. 13 Ña di kûlaañul ki kuloo'mo kurebooraaku kaaku katawool, be kûynent poop.
Jesus nalob mata jañaaŋenaju jata elobay yata Emitay
14 Ban, di hukahu hûbanumahu Jesus nâgawul weh ta kurebooraaku katawool kaamom kunŋen di an anor kemmi ma kuriyem. Ban nawatateniil mata ma kupaaliil kajukoom kulobiim kaan nalhaalowulo ban di kuketaaku kûynent, mata ma kûynenaaliyeriitum. 15 Ban naaniil: “Jikay be âmbasuk peh ki jiñaaŋen an poopool elobay yâsuumaay. 16 Anaw âynemmi ban nâbatisayi, Emitay mbi ehikulool, be anaw âynentum mbi êjimenool. 17 Be bukanaku kâynenommi, Emitay mbi ewuliil sembaasu: Di kañaaŋaku kûmbaam mbi ya kûcaalhen kumalaku kammi di bukanaku, di kulob silob saasu sa kujamutum; 18 mbi kusoh silunasu, palimo koo kuriye miñ masiki metukagayiil makeel, di kuga uŋenaw watayiil di bukanaku kâjuutum ma kulhaw Emitay be batayiil, di kûju.”
Jesus naŋari be hatiya di emitay
19 Malhegen Ata Emit aamom Jesus naloom umu ban, ña naŋari be hatiya di emitay di ammi ma aleehom di kaŋen kûrir kata Emitay. 20 Ña na kurebooraaku katawool kugam kukaye, ya kuñaaŋen elobay yata Emitay tiŋ peh. Be Ata Emit ya aaneniil ma ya kuga miñamu mata sembaasu sata Emitay, ma deeli yîs kaan eloba'uyu elhegenumaayay.