Judas nabujooro
27
Ban nagam titijene, yahaanay peh yata bumaaŋenaabu bata Emitay, di yahaanay yata êsukay, di kukay ki kulhan maama mbi kuga ma kubuj Jesus. 2 Ña di kugenkool ban di kuŋarool ki kuwul âyyaw aamom Pilaatus.3 Ña Judas aamom aŋoonum Jesus, na ajuum kaan kunuure ma mbi kubuj Jesus, ña di mulaañool. Ña nakay ki alaañen bampeesaa'ubu bârimmi anabawo di kunŋen bata praata ki awul yahaanay yata bumaaŋenaabu bata Emitay, di yahaanay yata êsukay, âriiŋ naaniil: 4 “Înje nibaje hûbajumiñ, mata niŋoone anaw agawutum makeel.” Be yahaana'uyu di keenool: “Ûli bûtumoli bulee'bo, aw ûmiim!”
5 Ña Judas naraac bampeesaa'ubu dâada di Eluupay yata Emitay, ban nâcaalh âriiŋ nakuucooro. 6 Ña yahaanay yata bumaaŋenaabu bata Emitay, di kuŋar bampeesaa'ubu ban di kêenul: “Bancaama'ube ñônñoy ma bugawi di ekeesay yata opherta, mata bata hûsimahu.” 7 Na kugam kujamoore mata bancaama'ubu, ña di kuŋaa'bo kûnoomum tiŋatu di kaŋenaku kata ateepaaw ata silompasu kûgawum husaahahu hata emaasooraay. 8 Momakiimom tiŋa'utu ta kunommi ya teeni Tiŋatu tata Hûsimahu be jaat.
9 Ña di ga non ma añaaŋenaaw ata kûboñaku kata Emitay aaneyim Jeremiyas abiim bi alob âanul: “Kuŋare bampeesaabu bata praata bârimmi anabawo di kunŋen, baamom êpiriyaay ya kuñool Israyel kujamoorum, 10 ma kunoom tiŋatu di kaŋenaku kata ateepaaw ata silompasu non ma Ata Emit aanommi iga.”
Jesus di kuŋarool be baabu Pilaatus
11 Ban di kuŋar Jesus ki kujuumen ta Pilaatus ammi; ña Pilaatus narinkool aanool: “Kama aw ugam âyyaw ata jûdewwi?” Jesus naanool: “Aw uloomom!”
12 Be palimo ma yahaanay yata bumaaŋenaabu bata Emitay, di yahaan yaayu yata êsukay ya kusoosenoom, be oo alobut. 13 Ña Pilaatus narinkool joon aanool: “Kama aw ulee'ma ujamem maama kulobem di mo matayi?” 14 Be Jesus alobut d'oo. Ña Pilaatus nâjanaŋen noon mata ma alobutum.
15 Be di kâlundaay peh kagaweyim kata Paaskuwa, âyyaw ya awalhen an anor akullhim a êsukay kûkimmi. 16 Be nownu âynaaw dôo di ekullhay âmirnenim di êsukay aaneyim Barabaas. 17 Ña na buyooŋabu bata bukanaku kûmeboortom, ña Pilaatus narinkiil aaniil: “Aymoom a jîkimmi iwalhelluul? Iwalhelluul Barabaas, be mante Jesus aaneyim poop Kristu?” 18 Be di malhegen Pilaatus nâmire kaan koo kuŋallom Jesus ki kuwulool mata ma kûsiibuwoom.
19 Na Pilaatus agam naleehuwe di kâyyaku kata batalenabu, apañoorool naboñ ma keenool: “Aatuba ôomi di elobay yata âynaaw umu, âmirutum makeel, mata jaat nîyawute, nîlaam noon matawool.”
20 Be yahaanay yata bumaaŋenaabu bata Emitay, di yahaanay yata êsukay, di kusullen êsukay ma keeniil awalhelliil Barabaas, ma abuj Jesus. 21 Be Pilaatus narinkiil joon aaniil: “Di buke egabaay, aymoom a jîkimmi iwalhelluul?” Ña di keenool: “Barabaas nûkimmi!” 22 Ña Pilaatus narinkiil joon aaniil: “Moo, Jesus aaneyim Kristu, bu mbi igawool?” Di keenool: “Mbi uriiŋool di êkrusay!” 23 Ña Pilaatus narinkiil joon aaniil: “Kama kûbajumiñ bu nagawe?” Be buko di kuhaŋ mâŋaaŋulo ma ya kêenul: “Uriiŋool di êkrusay!” 24 Na Pilaatus ajuum kaan aatubi ayetoor di êsukay, ban kokankuga bûgagaroorabu, ña naboñ ma kuwullool mumelamu ma akullhen uŋenaw watawool ta êsukay yemmi, ban naaniil: “Înje îlee'dô di eketay yata âynaaw ume, miwuul jîmiim matawool!” 25 Be êsukay di keenool: “Uwaa'bo ma kûbajumiñaku kata eketay yata âynaaw ume mbi kulo d'ûli, di poop kuñoololi!”
26 Ña nawalhelliil Barabaas, ma aboñ ma kûnagul Jesus, ban nawuliiwool ma nki kuriiŋool di êkrusay.
Esellooraay di kurinen Jesus
27 Ña esellooraay yata Pilaatus di kuŋar Jesus be di kâyyaku katawool, kûriiŋ di kuŋoomenool, 28 ban di kûjupulool, ma kûjupenool baanaabu. 29 Ban di kucookoor ênkuuhaay yata undiiŋaw, ban di kûnkuuhenoo'yo. Di kuŋar poop huyaajahu ma kugawool asoo'ho di kaŋenaku kûriraku, ban di kûtiigen ma ya kurinenool ma keenool: “Âyyaw ata jûdewwi, nusaapi!” 30 Ban di kucuhenool, di kuŋar poop huyaaja'uhu ma ya kukebool di hûkuwahu. 31 Ña na kugam kurinenool ban, di kûcaalhen baanaabu ma kûjupenool batawool, ban di kuŋarool ma nki kuriiŋool di êkrusay.
Esellooraay di kuriiŋ Jesus di êkrusay
32 Na kugam kôkacaalhem d'oo, di kupam di âynaaw ata êsukay yata Sîreeni aaneyim Simoŋ, di kugawool di sembe ma apeeno êkrusay. 33 Na kugam kûriiŋe tiŋatu taaneyim Golgota, daamom Tiŋatu tata Kusendaku, 34 di kuwulool bunukabu bâguusoorim di hutaliyaakahu ajaken. Be na acombubom, nalat kajaken bo. 35 Na kugam kuriiŋool di êkrusay, ban di kuga êtukay ma kugiitoor wañaw watawool. 36 Ban di kuleeho to ma kupooyool. 37 Ban hatiya di hûkuwahu hatawool di êkrusay, di kuŋiic dô wahaw uwe wa kemmi wa agam: “UME JESUS AAMOM ÂYYAW ATA JÛDEWWI.” 38 Na kuriiŋoom di êkrusay, di kuriiŋoor to poop di sîkrusasu bûkuutaabu egaba, aahu di kaŋenool kûrir, aahu di kaŋenool kumay. 39 Ña bukanaku ka ya kayaatom, ya kurinenool, ban ya kuga lâgalag ma ya kugelool 40 ma keenool: “Inja aw ommi mbi utah Eluupay yata Emitay, ban nuteep yo kukaku kûhaaji. Moo, umelhenooro! Uga jaa Añool Emitay, nûwalowul di êkrusay!”
41 Yahaanay poop yata bumaaŋenaabu bata Emitay, di bulhikitenaabu bata kûboñaku kata Emitay, di yahaanay yata êsukay, ya kurinenool ma keenool: 42 “Inja bukanaku namellhemmi, aaliit amellhenooro! Inja oo âyyaw ata Israyel! Âwalowul di êkrusay, ma mbi ûyinenaawool. 43 Inja Emitay nâynemmi, ma aanolaal oo Añool Emitay, mbi ujukaal mowme, mante mbi emelhenool!” 44 Bûkuutaabu poop ka kuriiŋooritom d'oo, ya kûlobikoorool.
Eketay yata Jesus
45 Na jaley agam najuumene, ña etaamay peh di emuucen be kaŋ na ewooraay êhaajutay yata baheperabu êrimmi. 46 Ña na ewooraa'uyu êrimmi, Jesus nâŋaaŋulo lhînŋa ma âanul: “Eli, Eli, Lama Sabaktani?” Daamom: “Emitay yûmbaam, Emitay yûmbaam, mata wa nubetom?” 47 Be bukan kaaku kalakotom, na kujammi ma aloom umu, di kêenul: “Ômawoolem di Êliyas.” 48 Ña aahu ata di buko natey ki âŋarul jiponsaju, ma abojen jo di bunukabu bahiraabu, ban naga jo di hunjaamahu ma aga Jesus ajaken. 49 Be bukaaku di kêenul: “Jiwalhoo'bo ma mbi ujukaal mante Êliyas mbi âkayil bi apakenool.” 50 Be Jesus nalaañ joon âŋaaŋulo lhînŋa, ban naket. 51 Ña hûridaahu hata di Eluupay yata Emitay, di hûruusulowumul hatiya ii be di etaam. Ña etaamay di egogoroor, kuwaaliisaku poop di kupajulo; 52 sîluŋasu di sîbaahulo, ma bukan kameeŋe kâynemmi Emitay kakeem kûlhaalowul di kuketaaku, 53 ma kûcaalhul di sîluŋasu; ban na Jesus alhaalowulom di kuketaaku, di kunebej Jerusaleŋ yagam êsukay yanapaay, ma bukan kameeŋe kujukiil. 54 Ña annahaanaw ata esellooraay yata Rooma, di poop esellooraay yatawool ka ya kapooyum Jesus, na kujuum ma etaamay egogoroorum, di poop wahaw peh wagam, ña di kûkoli noon, ma kêenul: “Malhegen âynaaw ume, oo Añool Emitay.”
55 Yaaraay kameeŋe koo to râagi, ma ya kûjikerul. Yaaraa'uyu, koo kureboorlom d'oo Gâlileeya, ma ya keenenool. 56 Be di yaaraa'uyu, aahu yaani Mariya Madalena, aahu Mariya, aamom iñaaw Tiyaagu, koo di Jose, di poop apañoor Jebedew.
Huhokahu hata Jesus
57 Na jaley agam nalowe, âynaaw aahu asaanumom ata êsukay yata Arimateeya, aaneyim Jose, agam poop arebooraaw ata Jesus nâkayil. 58 Na ârillom, nakay ki alhaw Pilaatus ma awulool ehuluŋaayay yata Jesus. Ña Pilaatus naboñ ma kuwuloo'yo. 59 Ña Jose, naŋar kâmiisaaku kunkulaku kariirumim ehulay, ma alhiimen ehuluŋaayay, 60 ban naŋaa'yo ki aga di êluŋay yatawool yunkulay ya awokum di hurimbiliŋahu. Ban nâkikilen huwaaliisahu hâamak aga di êtingaay yata yo, ban nakay. 61 Nownu too di êluŋay, Mariya Madalena, di Mariya aahu koo too ma kuleehom.
62 Ña hata kajom, naamom nagam hîyyaayahu hata jûdewwi, yahaanay yata bumaaŋenaabu bata Emitay, di phârisewwi, di kukay ki kulob Pilaatus, 63 ma keenool: “Ây, ûli nuwolhuwe kaan agugujooraaw umu oo baketorut, moo naloom âanul, na mbi aket aga kukaku kûhaaji, mbi âlhaalowul di kuketaaku. 64 Moo, mbi uboñ ma êluŋay epooyi ii be huka'uhu hûhaajutahu, ka mbi kurebooraaku katawool kûkayil bi kûkuut ehuluŋaayay, ban di kêenul êsukay oo alhaalowulom di kuketaaku. Ban mûcala'umu mâyoolim, mbi muhaŋ maamu mûtiyaaramu.”