Jesus nâcaalhul kurebooraaku kaaku katawool
21
Ban Jesus nâcaalhul joon kurebooraaku kaaku katawool ñata hulhuwahu haaneyim Tiberiyadis. Na âcallhiim, 2 Simoŋ Pedru, oo too koo di Tome, aaneyim poop Magabaamu, di Natanayel, aamom ata Kanaaŋ yata Gâlileeya, di kuñool Jebedew, di poop kurebooraaku kaaku katawool egaba. 3 Ña Simoŋ Pedru naaniil: “Ma ikay jambaalaju.” Di keenool: “Ukaayaal.” Ña di kukay ki kumbaal, be hukaru uyu kaŋ peh, kusohut.4 Na jaley atitijemmi, Jesus nâcalhiil di hubeereeraahu hata hulhuwa'uhu, be kurebooraaku katawool kumanjutool. 5 Ña narinkiil aaniil: “Kûñumooy, jibaje pîya wah wata huri?” Di keenool: “Iyiy, ubajut.” 6 Ña naaniil: “Jîraac hûmbaalumahu karebaku kûriraku kata busaanaabu, mbi jibaj.” Ña di kuraac ho bo, di kusoh siwolasu huc, poopii keeliit kûcaalhenuu'hô, mata ma hemmi huc siwolasu.
7 Ña arebooraaw aamom a Jesus aboolaatum, naan Pedru: “Ume Ata Emit.” Na Pedru ajammi ma aloboom umu, ña nakoko humantaahu hatawool, mata akokuwent, ban nalo di mumelamu. 8 Ña kurebooraaku kaaku katawool, di kuŋar busaanaabu ma kûñakul hûmbaalumahu, mata ma tiŋa'utu tîraagiyoorutum di hubeereeraahu soŋo simeeterasu êteemeer (100), be hoo ma hemmi huc siwolasu. 9 Be na kugam kûcalho tîyaŋ, di kujuk siwolasu soo di bagekabu bata sambunasu, di kujuu'to poop hûmburuwaahu. 10 Ña Jesus naaniil: “Jîbajul di siwolasu sa jisohulom.”
11 Ña Pedru nakay be di busaanaabu âriiŋ nâcaalhenul hûmbaalumahu, ban nâhuuluu'ho be di hubeereeraahu hoo ma hemmi huc siwolasu. Siwolasu sâlagaasu sâlakodom seemo êteemeer di bukanaku egaba di kunŋen di sîhaaji (153). Be palimo ma siyejum umu, hûmbaalumahu huruusulowut. 12 Ña Jesus naaniil: “Jîkayil ma jiri.” Ña di kumanj kaan oo Ata Emit, be an akeel asokent karinkool mante oo kaŋ. 13 Ña Jesus naŋar hûmburuwaahu di jiwolaju awuliil.
14 Be huka'uhu hugam hukahu hûhaajutahu na Jesus âcallhom kurebooraaku katawool na alhaalowulom di kuketaaku.
Jesus nalob di Simoŋ Pedru
15 Ña na kurim ban, Jesus narink Simoŋ Pedru aanool: “Simoŋ añool Joŋ, nûkinom uhaŋ kupaali?” Simoŋ Pedru naanool: “Aa, Ata Emit, aw nûmire kaan înje nîkini.” Ña Jesus naanool: “Ûteken sîgaraniinaasu sûmbaam.” 16 Ban narinkool joon aanool: “Simoŋ añool Joŋ, noone nûkinom?” Pedru naanool: “Aa, Ata Emit, aw nûmire kaan înje nîkini.” Ña Jesus naanool: “Ûteken sîgaraniinaasu sûmbaam.” 17 Ban narinkool joon hûhaajutahu aanool: “Simoŋ añool Joŋ, noone nûkinom?” Ña Pedru di mulaañool mata ma Jesus arinkoom ñeemo ñâhaaji mante nâkinool. Ña naanool: “Ata Emit aw nûmire wahaw peh; moo nûmire kaan înje nîkini.” Ña Jesus naanool: “Ûteken sîgaraniinaasu sûmbaam.” 18 Ban Jesus naanool: “Ma isalheni eeni, aw baroŋ di aŋil, ya ukoko ban nukay be ba ûkimmi; be na mbi uhalhen, mbi uñuur uŋenaw watayi ma an aahu akoki, ban naŋari be ba ûkintum ukay.” 19 Jesus ma aloboom umu, ma âyisool eketay ya mbi Pedru aket, ma Emitay mbi esali. Ban naanool: “Usoolhellom.”
20 Na Pedru âtiiwowulom, najuk arebooraaw a Jesus aboolaatum, aamom akagoorunom di êsigiray yata Jesus na kurim, arinkoom mata anaw a mbi aŋoonool, oo ma âsoolhenewuum d'oo. 21 Ña na Pedru ajuum arebooraaw umu narink Jesus aanool: “Ume wa mbi ugawool?” 22 Jesus naanool: “Înje îkin jaa, nalako to baketut be na mbi îlaañul. Butumi wa bembo? Aw usoolhellom!”
23 Ña eloba'uyu di ewaasoor di bûynenaabu di kaan, arebooraaw umu aatubi aketurer. Be Jesus alobut mo, be âanul: “Înje îkin jaa, nalako to baketut be na mbi îlaañul, butumi wa bento?”