Mâseeliyaamu ma Buynum Bunapaabu buwulem
12
Moo, kutiyaay, mowme nîkine ma inamulenuul mata mâseeliyaamu ma Buynum Bunapaabu buwulem, mata nîkine ma jinamulen jak jak mata wo. 2 Miwuul jîmire di kaan, noo miwuul bâmirorut Emitay, ya jiŋari be tiŋ peh tata ûkiinaw waaliitum ulob makeel. 3 Momakiimom nîkine ma jîmir di kaan, mumulet bi an alob di sembaasu sata Buynum bata Emitay ma âanul Jesus oo anaw aakum kapaawaaku. Anaw poop aaliit âanul Jesus oo Ata Emit, oo balobut mo di sembaasu sata Buynum Bunapaabu.4 Mata baje mâseeliyaamu lhay ma Buynum Bunapaabu buwulem, be Buynum Bunapaabu banor. 5 Baje poop urokaw lhay, be Ata Emit anor keb. 6 Baje poop uroomiñaw lhay wâbutiyoorum wa ugawaalem, be Emitay yanor keb yagawem bukanaku ma kuga wo. 7 Mata Buynum Bunapaabu bubaje maama bugoroorem di anoowan, be be bata bukanaku peh. 8 Mata Buynum Bunapaabu ya bûwul an aahu mâmiilamkenamu, aahu di buwulool kanamulenaku; 9 aahu di buwulool kâynenaku, aahu di buwulool sembaasu sata jabuunenaju. 10 Aahu di buwulool sembaasu sata jagawaju jata miñamu mata sembaasu sata Emitay. An aahu Buynuma'ubu banorabu, di buwulool mâseeliyaamu mata jañaaŋenaju jata kûboñaku kata Emitay; aahu di bugawool abaj kanamulenaku kata ma amanj uynumaw; aahu di bugawool ma alob silob saasu sa ajamutum; aahu poop di bugawool ma aali añaaŋen mata siloba'usu. 11 Be mâseeliyaamu peh, mûcaalhumul di Buynum Bunapaabu banorabu, bawulem anoowan wahaw wa bûkimmi buwulool.
Eniilay di urebaw wata yo
12 Mata Kristu oo agam non poop non eniilay yabaam urebaw lhay. Be palimo ma urebaw umemmi, be ya ubom ma uga eniilay yanoray. 13 Mata ulaal peh di Buynum Bunapaabu banorabu nûbatiisumaalim, ma jûdewwi, di greguwi, di emiikeelay, di poop kaaku kagawutum emiikeel, ugawaal eniilay yanoray. Ban poop di Buynuma'ubu Bunapaabu banorabu, ulaal peh usibenaam.
14 Malhegen eniilay ntuwa karebaku kanor keb, be urebaw lhay. 15 Moo, kâkandumaku keeli kêenul: “Înje ma igawutum kaŋenaku, ña êemiwut di eniilay,” be palimo moo, mumulet bi kêemiwut di yo. 16 Kâjaŋayaku poop keeliye kêenul: “Înje ma igawutum ñîkilañu, ña êemiwut di eniilay,” be palimo moo, mumulet bi kêemiwut di yo. 17 Kama eniilay peh egaween jaa ñîkilañu, bu mbi an aaliyeen ajam? Eniilay poop peh egaween jaa kâjaŋayaku, bu mbi an aaliyeen ajam huputahu? 18 Be Emitay yoo egam miñoomiñ mata di eniilay tiŋatu ta memmi, non ma yo êkimmi. 19 Moo, miñamu peh mammi di eniilay, mugaween jaa miñ manor keb, eniilay mbi ebajeen? 20 Malhegen baje urebaw lhay, be eniilay yanor.
21 Ñîkilañu ñeeliit ñêenul kaŋenaku: “Înje isoholowuti.” Hûkuwahu poop, heeliit hêenul kâkandumaku: “Înje isoholowuti.” 22 Mata palimo kareb kaaku kata di eniilay kahammi marembeeli, be mumulet bi ulakuwaa'to baakut ko. 23 Ban poop kareb kaaku kata di eniilay ka oonaam kubajut ênjariŋ, be ya uhaŋaal macookooraa'ko jak. Kaaku poop kammi d'ulaal kâkojim kanaamorutum di ureb waawu, be ya uhaŋaal macookooraa'ko jak jak. 24 Be ureb waawu wata di eniilay wahammi majak, usoholowut kacookoora'uku. Moo, Emitay yoo egamom eniilay, ma urebaw waawu wahammi mâkoji uhaŋ mabaj kacookoor, 25 ma eniilay etubambi ebaj kâgiitoor, be urebaw poowo di ubom ma kanookan kucookoor kupaa'ko. 26 Moo, na mbi kareb kaaku kûsonji, woo poowo di ûsonji di manor di ko; kaaku poop kusali jaa, woo poowo poop di ûririgen di manor di ko.
27 Mata miwuul jigam eniilay yata Kristu; moo, anoowan ata di miwuul oo karebaku kata eniilay yatawool. 28 Moo, di grîsiya Emitay egam kumakaaku kata Jesus, ma kuga bukanaku kâtiyaaraku, ban buñaaŋenaabu bata kûboñaku kata yo, ban bulhikitenaabu bata elobay yata yo, ban kaaku kagawem miñamu mata sembaasu sata yo, ban kaaku ka ewuum sembaasu sata jabuunenaju jata bukanaku, ban kaaku kaanenem bukanaku, ban kaaku kagam yahaanay, ban kaaku kalobem silob saasu sa kujamutum. 29 Mata ntuwa buko peh kugam kumakaaku kata Jesus, kugawut poop buñaaŋenaabu bata kûboñaku kata Emitay, kugawut poop bulhikitenaabu bata elobay yata yo. Ntuwa poop buko peh ewuum sembaasu sata jagawaju jata miñamu mata sembaasu sata yo, 30 di poop jabuunenaju jata bukanaku, di jalobaju jata silobasu sa kujamutum, di poop janamulenaju jata eloba'uyu. 31 Moo, jipaamen di sembe mâseeliyaamu ma Buynumabu Bunapaabu buwulem mahammi majak.
Be mbi îyisuul maamu mahammi majak.