Jâkinooraju jalhegenumaayaju
13
Mata palimo înje ilobe silobasu sata ejamaatay, palimo poop sata kumalaakaku, be igawut jaa an âkimmi bukan, niga non hungiliŋooraahu halhokem palabab, niga poop non mañ mawaŋi. 2 Palimo Emitay ewulom bugoroorabu bata jañaaŋenaju jata kûboñaku kata yo, nîmir huhaana peh, nîmir wah peh, niga anaw âyneyom poopii neeli îkambul kurimbiliŋaku be taatu, be iga jaa anaw âkintum bukan, ijakut makeel. 3 Palimo înje iwule kûsukateenaku wahaw peh wa ibaam, poopii niwul eniilay yûmbaam ma eboli, be igawut jaa an âkinem bukan, eetubi ibaa'to makeel.4 Mata anaw âkimmi bukan, ya amunten, ya aga anaw âsummi; naga anaw âsiibuwikoororiitum, naga anaw âgawooruworiitum; 5 anaw âkimmi bukan, ntuwa anaw âsuumutum kûlob, ntuwa anaw âkinem keb wah be batawool, ntuwa anaw ahilem hubirik, âgaworiit poop anaw atil d'oo, nagawool di êsigiray. 6 Anaw âkimmi bukan, âriririgenoriit di wah wajakut, be ya âririgen di wahaw walhegenumaayaw. 7 Anaw âkimmi bukan, ya amunten wah peh, ya âynen, âbeñuworiit.
8 Mata jâkinaju, ya jilako to be nanoonan. Be baa'jaa wahaw wa buñaaŋenaabu bata kûboñaku kata Emitay kulobem, mbi ubawo; baa'jaa silobasu salobim sa bukanaku kujamutum, mbi sibawo, baa'jaa poop majaalhaamu, mbi mubawo. 9 Mata kanamulenaku katoolaal, di kûboñaku kata Emitay ka ulobaalem kûriroriit. 10 Be na mbi wahaw wârirum ûriiŋul, waawu wârirutum di unep.
11 Mata înje di aŋilaw, ya ilobeen non aŋil, ninamulen non aŋil, ninongooreen poop non aŋil, be na igam annahaanaw, ña niwalen wahaw wata huŋiilowutenaahu. 12 Moo, wahaw wa ujukaalem di wo jaat, wowu ma ugam poop non, buul ba an ajikere di kajukoorum kagawe hûp, be di etaŋay yâreesewuum, mbi ujooŋooraal di wo, ma ujukaa'wo. Mata wahaw wa îmiim maame, wahaw winŋet, be na mbi hukahu hûriiŋ, mbi îmii'wo jak non ma Emitay êmirommi.
13 Moo, wahaw uwe ûhaaji wa mbi usohaal: kâynenaku, di jakobaju, di poop jâkinooraju. Be wahaw wahammi peh, jâkinooraju.