Mâseeliyaamu mahammi ma Buynum Bunapaabu buwulem
14
Moo, jiga di sembe ma jâkinooraju jiga wahaw ûtiyaaraw di miwuul; di jiga poop di sembe ma jipaam mâseeliyaamu ma Buynum Bunapaabu buwulem. Be di jihaŋ mapaam mata jañaaŋenaju jata kûboñaku kata Emitay. 2 Mata anaw aloo'jaa silobasu sâmirutim, omu ma alobem keb be bata Emitay, alee'nalob be bata bukanaku, mata an anamulent. Ban omalobem wahaw wâñoorom di sembaasu sata Buynum Bunapaabu. 3 Mata anaw añaaŋenem kûboñaku kata Emitay, ya alob be bata bukanaku, ma agawiil ma kâynenaku katayiil kubaj sembe, nagawiil kûtik, di keeli poop kûwaayen. 4 Mata anaw alobem silobasu sâmirutim, ya aanenooro keb, be aahu añaaŋenem kûboñaku kata Emitay, ya aanen grîsiya pooyo.
5 Momakiimom nîkineene ma miwuul peh jilobeen silobasu sâmirutim, be nihaŋ mâkin ma jiñaaŋen kûboñaku kata Emitay, mata anaw añaaŋenem kûboñaku kata yo, nahaŋe aahu alobem silobasu sâmirutim; be mante an akeel aali jaa anamulen bukanaku wahaw wa aloom, ma grîsiya eeli eeneni ma ebaj sembe. 6 Moo, kutiyaay, kama îkayil jaa baabu di miwuul, îriiŋul nilob elobay yâmirutim, wa weeli ûnjariŋuul, înje bañaaŋentuul wahaw wa Emitay êbaahulommi, be mante wahaw wa enamulenommi, be mante kûboñaku kata yo, be mante wahaw wa elhikitenommi?
7 Moo, jinongoor ma mata wahaw wâyimpeyim waakutum huyiih, wagam non silhiitasu, di poop sikontiŋasu; anaw âyimp wo jaa ban bâyimperabu bûmaruloorut, bu mbi anaw anamulen maama âyimpem di mo? 8 Anaw poop ârim jaa kârimaku, ban hurimahu hata ko hûcaalhut jak, bu mbi anaw aali anamulen ma abandoor be hutiikahu? 9 Moomu poop kaŋ di miwuul, anaw aloo'jaa elobay yâmirutim, bu mbi anaw aali anamulen? Ña di ga poop non anaw umu omalobem kay bo di ehentelaay. 10 Mata silobasu simeeŋe salobeyim di etaamay, be yakeel elet yata di so ya baloberabu bata yo bujakutum. 11 Moo, înje ijamut jaa elobay ya anaw aloom d'înje, anaw umu naga poop non amaasooraaw d'înje, înje poop niga poop non amaasooraaw d'oo. 12 Moo, ma jîkimmi mâseeliyaamu ma Buynum Bunapaabu buwulem, jiga sembe ma jipaam maamu ma mbi muga ma grîsiya ebaj sembe.
13 Momakiimom, anaw alobem silobasu sâmirutim, jake ma alhaw Emitay ma aali anamulen bukanaku wahaw wa alobem. 14 Mata ilhaw jaa Emitay ma ilob elobay yâmirutim, bûyegetabu bûmbaam mbi bêemi di kalhawa'uku, be kanamulenaku kûmbaam keetubi kêemi dô. 15 Moo, bu mbi iga? Mbi ilhaw Emitay di bûyegetabu bûmbaam, nilhaw yo poop di kanamulenaku; niyeeŋ di bûyegetabu bûmbaam, niyeeŋ poop di kanamulenaku. 16 Kama aw usal jaa Emitay di silobasu sâmirutim, ban anaw aahu oo too abajutum kanamulen, bu mbi âanul amiin, mata wahaw wa usalum Emitay, oo banamulent wahaw wa uloom? 17 Malhegen palimo kalhawa'uku katayi kujake, be keeliit keenen an akeel.
18 Moo, neeliye êenul Emitay jêrejep, mata nihaŋuul peh kalob silobasu sâmirutim, 19 be palimo moo, nihaŋ mâkin kalob di grîsiya palimo kurimaku hutok ka an aalim anamulen ma eeli ilhikiteniil, di maama mbi ilob kurimaku kârimmi sînjunnaasu kunŋen (10.000) di elobay yâmirutim.
20 Moo, kutiyaay, aatuba jinongoor non bala. Nokoor jaa non di wahaw wajakutaaw, jake ma jiga non bala; be di banongerabu batawuul, jake ma jiga non yahaan. 21 Mata di Baŋiicerabu Bâñoyyaabu, dôdu ma ŋiicim kaan Ata Emit naane:
“Êsuka'uye, mbi ilobumiil elobay ya bukan kaaku kulobem;
mbi ilobumiil elobay yata bukanaku kagam emaasooraay,
be palimo moo, keetubi kujam d'înje.”
22 Mata silobasu sâmirutim, sigawut êmanjum be bata bûynenaabu, be ya siga êmanjumay be bata bukanaku kâynentum; be kûboñaku kata Emitay, kugawut êmanjum be bata bukanaku kâynentum, be di kuga êmanjumay be bata bûynenaabu.
23 Kama grîsiya êmeboor jaa tiŋ tanor, ban buko peh ya kulob silobasu sâmirutim, ña anaw anamulentum, be mante aahu agawutum âynena nânebejuu'dô, aatubi âanul kûkuwaku katawuul kûsuumut? 24 Be miwuul peh jiñaaŋen jaa kûboñaku kata Emitay, ma anaw agawutum âynena, be mante anamulentum ânebejuu'dô, ajam jaa wahaw wa miwuul peh jilobem di wo, mbi awatatenooro mata kûbajumiñaku katawool; 25 ña hunongoorahu hatawool hâmirutim, di hûcaalhul. Ña nâtiigen ma asal Emitay ma âanul: “Malhegen Emitay yoyu di tutaru tatawuul!”
Wahaw wa mbi grîsiya ega
26 Moo, kutiyaay, bu mbi jiga? Mbi ya jiga, na mbi jîmeboor di grîsiya, aahu nayeeŋ, aahu nalhikiten bukanaku elobay yata Emitay, aahu nañaaŋen kûboñaku ka Emitay ewuloom, aahu nalob silobasu sâmirutim, aahu nanamulen êsukay wahaw walobim di siloba'usu sâmirutim. Be wahaw uwu peh, mbi ya ugawi ma grîsiya eeli ebaj sembe. 27 Be bukanaku ka mbi kulob silobasu sâmirutim, jake ma kuga egaba, be mante êhaaji. Be mbi kuga aahu alob, ban aahu poop nalob, ban poop jake ma baj anaw a mbi anamulen êsukay wahaw walobim. 28 Be bajut jaa anaw a mbi anamulen êsukay, ña di kupato di grîsiya ma kulob keb di Emitay di sîsigirasu satayiil. 29 Bukanaku ka mbi kuñaaŋen kûboñaku ka Emitay ewuliim, jake ma kuga egaba, be mante êhaaji ka mbi kulob; bukan kaaku peh di kulaso wahaw wa kulobem di wo. 30 Be an aahu ammi ma aleehom, Emitay êbaahulool jaa ma ewulool hurim hakeel, aahu ammi ma alobem jake ma apato. 31 Moo, miwuul peh jeeliye jiñaaŋen kûboñaku ka Emitay ewuluum, be jake ma jilob anor anor, ma êsukay peh keeli kunamulen, di kûnik. 32 Be bukanaku kalobem kûboñaku ka Emitay ewuliim, jake ma kusohooro; 33 mata Emitay egawut Emit yata kâguulhoor, be yata kâsuumaayaku.
Non ma gaweyim di kâmeboor peh kata bukanaku kanapaaku; 34 yaaraay, mbi ya kupato di kâmebooraku kata di grîsiya, mata kuwuluti buruŋ ma kulob; be mbi ya kupato non ma kûboñaku kuloom. 35 Be kûkin jaa kûmir wah wakeel, di kûriiŋ di siluup, di kurink kupañooriil, mata pûñuneniye ma anñaakan alob di grîsiya.
36 Kama elobay yata Emitay di miwuul êcukumulom? Be mante poop be bata miwuul keb kakayumulom? 37 Moo, anaw anong jaa kaan oo anaw añaaŋenen kûboñaku kata Emitay, be mante oo anaw a Buynum Bunapaabu buwuum mâseeliyaamu, jake ma âmir kaan eloba'uye ya iŋiiculuum ume, kûboñaku kata Ata Emit. 38 Be anaw ahuusuu'ko jaa, aatuba jiwulool buul.
39 Moo, kutiyaay, jake ma jipaam di sembe ma ya jiñaaŋen kûboñaku kata Emitay, be poop aatuba jilat ma bukanaku kulob elobay yâmirutim. 40 Be jake ma jiga wahaw peh jororor bâguulhoorut.