Jalhaalaaju jata di kuketaaku
15
Moo, kutiyaay, nîkine ma iwollhenuul mata elobay yâsuumaay ya iñaaŋenuum, yaamom ya jiyaam, ban di jisoo'yo; 2 yaamom yawuluum poop kapakaku na iñaaŋenuuyom. Moo, jisohut yo jaa non ma iñaaŋenuuyom, ña kama jîynene Emitay ebeebel. 3 Mata wahaw ûtiyaaraw wa iyaam, wa îyisuum woowe: Kristu oo akeem mata kûbajumiñaku katoolaal, non ma Baŋiicerabu Bâñoyyaabu buloom, 4 ban nahoki, di hukahu hûhaajutahu, nâlhaalowul di kuketaaku non ma Baŋiicerabu Bâñoyyaabu buloom. 5 Na alhaalowulom, nâcaalhul Pedru, ban nâcaalhul poop kumakaaku katawool kunŋen di egabaay. 6 Ban nâcaalhul poop kutiyolaal kârimmi sîteemeerasu hutok (500), ma kujukool di manor. Di kutiyolaal buku kajukoom, bukaaku kukete ban, be kameeŋe kata di buko, kuroŋ to. 7 Ban nâcaalhul Tiyaagu, ban poop nâcaalhul kumakaaku katawool poopiil.8 Na âcallhom buku peh, ban inkit nâcalhom poop, înje jagam non an abajim tatawool bâriiŋut. 9 Mata înje igam anaw ahammi mâtiiti di kumakaaku katawool peh. Ban poop ijoonut ma eeni âmakaaw ata Jesus, mata înje ya îlaamemmi grîsiya yata Emitay. 10 Be kañankiitaku kata Emitay, di kugawom iga anaw a igam ume jaat. Momakiimom kañankiitaku kata yo, kugawuti ebeebel d'înje, mata nihaŋe magoroor kumakaaku katawool poopiil. Be ntuwa înje igoroorum, be kañankiita'uku kata Emitay kammi d'înje. 11 Moo, înje di buko, bajut aahe di aahe, mata ûli peh eloba'uyu nuñaaŋenem, yaamom ya jîynemmi.
12 Magam ûli nuñaaŋeñaaŋenuum kaan Kristu nalhaalelhaalellim di kuketaaku, moo, bu gawe ma bukan kaaku di miwuul kêenul jalhaalaaju jata di kuketaaku jibajut? 13 Moo, ga jaa non jalhaalaaju jata di kuketaaku jibajut, ña kama Kristu poop alhaalellooti di kuketaaku. 14 Ban ga jaa poop non Kristu alhaalellooti di kuketaaku, ña kama elobay yata Emitay ya uñaaŋenewuum, uñaaŋen yo ebeebel, ban poop kâynenaku ka jîynemmi, jîynen ko ebeebel. 15 Ban poop nuga non ûli bukanaku kacalem kuya di Emitay, mata ûli oonuum yoo elhaalelloom di kuketaaku. Moo, ga jaa non malhegen bukanaku kakeem keetubi kulhaalelli di kuketaaku, ña kama Kristu, Emitay elhaalellootool di kuketaaku. 16 Mata ga jaa non malhegen bukanaku kakeem keetubi kulhaalelli di kuketaaku, ña kama Kristu alhaalellooti di kuketaaku. 17 Ga jaa non Kristu poop alhaalellooti di kuketaaku, ña kama kâynenaku ka jîynemmi, jîynen ko ebeebel, ban kûbajumiñaku katawuul poop kupasuti. 18 Ban poop bukanaku kakeem di kâynenaku katayiil di Kristu, koku ma kunepum. 19 Moo, ga jaa non kâynenaku ka ûynenaam Kristu, kata ube keb di etaamay, ña kama ulaal ugawaam bukanaku kahammi mâñankiiteni di etaama'uye.
20 Be malhegen, Kristu nalhaalelhaalellim di kuketaaku, ma aga anaw âtiyaaraw ata di bukanaku kalhaalellim di kuketaaku, ma yîs kaan bukanaku kakeem mbi kulhaalelli poop di kuketaaku. 21 Mata non ma anaw anoraw aŋallom eketay, moomu poop kaŋ ma anaw anoraw aŋallom jalhaalaaju jata di kuketaaku. 22 Moo, non ma bukanaku peh kukeem mata ma kusohoorum di Adoŋ, moomu poop kaŋ ma bukanaku peh mbi kubaj eroŋ mata ma kusohoorum di Kristu. 23 Be ânoowan mbi alhaalelli jororor: be Kristu agam anaw âtiyaaraw alhaalellim di kuketaaku, ban na mbi âlaañul, bukanaku kâynemmi d'oo mbi kulhaalelli poop di kuketaaku. 24 Na Kristu mbi âbuy ûyyaw peh wajakutaaw, di yahaanay peh yata wo, di wah peh wata sembaasu, ma awul kâyyaku Emitay yagam Ampawool ban nkit hûbanumahu di hûriiŋ. 25 Mata Kristu mbi aga annahaanaw be na mbi Emitay egawool ayokosenoor kûsuumutaaku katawool. 26 Moo, âsuumutaaw âbanumaw a mbi âbuyi, eketay. 27 Mata Baŋiicerabu Bâñoyyaabu beene: “Emitay egawe wahaw peh di ûkandumaw wata yo.” Be ma yemmi “wahaw peh,” ntuwa yoo humuumahu hata yo, be yeene di ûkandumaw wata Kristu. 28 Moo, na mbi wahaw peh ugawi di ûkandumaw wata Kristu, oo poop aamom Añool yo, mbi agawooro di uŋenaw wata yo, yaamom yagam ma wahaw peh ulako di ûkandumaw watawool, ma yoo Emitay mbi eeli ega annahaanaw ata wahaw peh.
29 Moo, bajut jaa jalhaalaaju jata di kuketaaku, ña bukanaku kâbatisim di uñaaŋaw wata bukanaku kakeem, wa mbi kubaj? Kama ga jaa non malhegen bukanaku kakeem keetubi kûlhaalowul di kuketaaku, ña mata wa ma bukaaku kûbatiisumim matayiil. 30 Kama mata wa ma ulaal poop ulowumaalem di buhiiraabu hukoohuk? 31 Mata hukoohuk ya ujooŋoor di eketay. Moo, kutiyaay, ilobuul ume mata ma îririgemmi matawuul, mata kasohooraku katoolaal di Kristu Jesus, aamom Ata Emit atoolaal. 32 Mata ga jaa non mata hubajahu hata ube di etaama'uye, hohakiimom ma îkuujummi di bânunkureŋabu di êsukay yata Ephesu, ña wa nibaatom?
Moo, ga jaa non jalhaalaaju jata di kuketaaku jibajut,
“Ña kama haŋ majak ma uriyaal, nujakenaal, mata hata kajom mbi uketaal.”
33 Moo, aatuba jibuntenooro, mata jâreboorikooraju, ya jikajen hunoonahu hajake hata ajamaat. 34 Moo, jîlaañul ma jisoh buruŋabu bajakaabu. Aatuba jiga joon kûbajumiñ; mata bukan kaaku kata di miwuul kûmirut makeel mata Emitay. Moo, ilobuul ume ma ipuñenuul.
Siniilasu sa mbi ulhaalowulaal di so di kuketaaku
35 Be an aahu naaliye arink âanul: “Kama bu mbi bukanaku kakeem kûlhaalowul di kuketaaku? Siniil bu mbi kûlhaalowumul di so?” 36 Jijaa, nûnuutuwe! Kama ugiiten jaa ekoolay di etaamay, ntuwa mbi esiŋ ekuuñ, ban nkit di êpumbul? 37 Mata na mbi ugiiten wahaw, ntuwa humuumahu mbi huleep, be ekoolay yo ya mbi êgiitul, palimo trîigu, palimo poop wah waawu. 38 Be Emitay mbi ewul ekoola'uyu eniilay ya yoo êkimmi ewuu'yo; ma ega ekoolookool, di eniilay yata yo.
39 Mata ntuwa siniilasu peh sinaamoorum. Ejamaatay kubaje siniilasu satayiil, bânunkureŋabu bubaje sata bo, basuwaabu bubaje sata bo, siwolasu poop sibaje sata so.
40 Moo, baje siniilasu sata hatiya di emitay, di baa'poop siniilasu sata ube di etaamay. Be majakaamu mata siniilasu sata hatiya di emitay, mûbutiye di mata siniilasu sata ube di etaamay. 41 Mata saasu majaaŋaamu mata so, mbi munaamoor di mata jaley; saasu mata so, di munaamoor di mata hulheeŋahu; saasu mata so, di munaamoor di mata bootabu; mata palimo poop bootabu, majaaŋaamu mata bo, ya mûbutiyoor.
42 Moomu poop kaŋ ma bukanaku kakeem, mbi ga na mbi kulhaalelli di kuketaaku. Mata, ma eniilay mbi ehoki di ekuuñ, be na mbi elhaalelli di kuketaaku, yeetubi eketurer. 43 Mata na mbi ehoki, yoo ma êkojim, ban di elhaalh, be na mbi elhaalelli di kuketaaku, mbi ejak, ban di êlag. 44 Mata eniilay yahokim di etaamay, yoo eniilay yaketem, be na mbi elhaalelli di kuketaaku, di ega eniilay yata di Emitay. Moo, ga jaa non eniilay yaketem ebaje, ña kama eniilay poop yata di Emitay, ebaje.
45 Mata dôdu ma ŋiicim di elobay yata Emitay kaan: Anaw âtiyaaraw aamom Adoŋ, oo awulim huyiihahu ma aroŋ. Be Adoŋ âbanumaw, oo buynumabu bawulem eroŋay. 46 Mata anaw ata di Emitay, ntuwa oo asingum âkayil, be aahu agam ata eniilay yaketem asingum, ban nkit aahu ata di Emitay. 47 Momakiimom ma anaw âtiyaaraw âcookoorumim bukapabu bata di etaama'uye, aahu agabutaw nâcaalhumul hatiya di emitay. 48 Mata bukanaku kata di etaamay, kuga poop non anaw âtiyaaraw acookoormim bukapabu, be kata hatiya di emitay, buko poop kuga non anaw agabutaw âcaalhumulom hatiya di emitay. 49 Moo, non ma ugawaam bukanaku kanaamoorum di anaw acookoormim bukapabu, moomu poop kaŋ ma mbi unaamooraal di anaw âcaalhumulom hatiya di emitay.
50 Moo, kutiyaay, wahaw wa îkimmi iñaaŋenuul, neene: eniilay yagam eluway, di poop hûsimahu, eeliit ekay be di kâyyaku kata Emitay, wahaw poop wakaañuwem, weeliit wêemi di waawu wâkaañuworiitum.
51 Moo, jitallhen ma iñaaŋenuul malhegenumaayamu mâñoorim: Mata ntuwa ulaal peh mbi uketaal, be ulaal peh siniilasu satoolaal mbi sitiinoori too kaŋ cab, 52 non poop non an amoye. Mata na mbi kârimaku kûbanumaku kulhok, ña bukanaku kakeem mbi kulhaalelli di kuketaaku, ban keetunki kuketurer joon; be ulaal jammi ma uroŋaam, mbi utiinooraali. 53 Mata jake ma wahaw wakaañuwem utiinoori ma ugawi waawu wâkaañuworiitum, waawu waketem di ugawi waawu wâketoriitum. 54 Na mbi waawu wakaañuwem utiinoori ma ugawi waawu wâkaañuworiitum, waawu poop waketem di ugawi waawu wâketoriitum, ña di ga non ma Baŋiicerabu Bâñoyyaabu buloom kaan: “Eketay ehaati ban, ma ekajeni!”
55 Eketaye, kama sembaasu satayi sôosey?
Kama katahaaku katayi, kôokey?
56 Mata katahaaku kata eketay kûbajumiñaku, sembaasu sata kûbajumiñaku, kûboñaku kata Emitay. 57 Be oonaal Emitay jêrejep mata ma ewulolaam sembaasu ma uhaataal, mata Ata Emit atoolaal aamom Jesus Kristu.
58 Moo, kutiyom ka iboolaatum, jijuum tir ma aatuba jîlandeel, jîwaayen ma jenken di bugoroorabu bata Ata Emit, non ma jîmiim kaan wahaw wa jigawem di wo be batawool, ntuwa ebeebel.